নুংবী চফু শাবা মচিহন সাসাদা পদ্মশ্রি পীরগনি
ইম্ফাল, জানুয়ারি ২৫ : লৈবাক অসিগী ওইনা শক্নাইরবা মীওই ৩৪ দা চহী অসিগী পদ্মশ্রি এৱার্দ পীনবা লাউথোকপদা নুংবী চফু শাবদা মায় পাক্লবা মচিহন সাসা য়াওরক্লে। মচিহন সাসা, উখ্রুল দিস্ত্রিক্তকী মনুং চনবা নুংবী কাজুই নত্ত্রগা লোংপি কাজুই হায়না খঙনবা খুলদগীনি। ইং ১৯৫০ গী এপ্রিল ১০ দা পোকখিবা মচিহন সাসানা মশাগী চহী ২০ দগী তোপ তোপ্পা মখলগী চফু অমা ওইরিবা নুংবী চফু শাবগী থবক অসি মহাক্কী অপোকপা কুইশিম সাসাগী মখাদা তৌরকখি।
মায় পাক্লবা মাস্তার ক্র্যাফ্ট্সম্যান অমা ওইনা মহাক্কী মচা নুপা অহুম অমসুং মচানুপী অমসু চফু শাবগী থাবক চত্থরি। মহাক্কী মচানুপা অতোনবা মেথিউ সাসানা নিউ দিল্লীগী কিদৱাই নগরদা ‘নুংবী চফু’ হায়না মিংথোনবা চফু য়োনবগী আউতলেত অমা হাংদোক্লে। মচানুপা অহল ফনিংফম, মচানুপী ৱানয়োলা সাসা অমসুং সোমি সাসাসু অমুবা মচুগী নুংবী চফু শাবগী থবক তৌরি।
পদ্মশ্রি এৱার্দ পীনবা খল্লবা মচিহন সাসা, মণিপুরগী গবর্নর অমসুং দিপুতি ইন্সপেক্টর জেনারেল ওব আসাম রাইফেল্স (সাউথ) না স্পিসিয়েল এৱার্দ পীদুনা ইকায়খুম্নবা উৎখ্রে। মহাক ইং ২০০৮ গী ফেব্রুয়ারি ২৮ দা লেমজনিংঙাই ওইরবা শিল্প গুরু এৱার্দ য়াওনা তোঙান তোঙানবা এৱার্দ কয়াসু ফংখিবা লৈখ্রে।
সোর্স: পোক্নফম
0 কমেন্ট:
কমেন্ট তৌবিয়ু