দা. শান্তিবালাবু হরাও তরাম্না ওকখ্রে
ইম্ফাল, মার্চ ২৬ : লৈকোল (লৈমরোল খোর্জেকোল), ইম্ফালনা শিন্দুনা ঙসি নুংথিল সাহিত্য একাদেমি এৱার্দ ২০২৩ ফংলক্লবী দা. কোইজম শান্তিবালাবু হরাও তরাম্না ওক্তুনা ইকাইখুম্নবা উৎখ্রে।
ক্বাকৈথেল মোইরাংপুরেল লৈকাইদা লৈবা লুপ অসিগী শঙলেন্দা পাঙথোকখিবা হরাও তরাম্না ওকপগী থৌরম অদুদা লৈকোলগী প্রেসিদেন্ট ক্ষেত্রিময়ুম সুবদনিনা থৌরম মপু ওইনা শরুক য়াখি।
কুমজা ২০১৮ দা পাঙথোকখিবা ইরোন্নুং হায়না মীংথোনবা শৈরেংগী লাইরিক অসিগী অইবী কোইজম শান্তিবালা লেমজনিংঙাই ওইরবা সাহিত্য একাদেমি এৱার্দ ২০২৩ পীরকপদা থোইদোক্না নুংঙাইবা ফাওই হায়না লৈকোলগী প্রেসিদেন্ট ক্ষেত্রিময়ুম সুবদনিনা ফোঙদোকখি।
মহাক্না মখা তানা হায়খিবদা ‘মণিপুরগী নুপী অইবীশিংনা য়াম্না থৌনা লৈনা ইগদবনি। অইবীশিংনা খুন্নাইসিদা পীদা হেন্না চাওনা লৈরক্কনি। নুপী অইবীশিংনা য়ুমগী কুপ্নোমদগী হেন্দোক্তুনা খুন্নাইসিদা অচৌবা থৌদাং লৌরক্লবা মতমদা ইরমদম অসি হেন্না হেন্না চাওখৎলক্কনি’।
সুবদনিনা মখা তানা ফোংদোকখিবদা ‘লৈমরোল খোর্জৈকোল অসি ইমাসি এমকে বিনোদিনিনা লীংখৎপীরম্বা নুপীশিংতগী ওইবা অহানবা লিটরেরি ওর্গানাইজেসন অমনি। ওর্গানাইজেসন অসিদা লমদমসিগী নুপী অইবীশিংনা য়াওরক্তুনা ওর্গানাইজেসন অসিবু চাওখৎনবা হোৎনবদা চাওনা মতেং পাংবীরকপসি চাওথোকপা ফাওই’।
সাহিত্য একাদেমি এৱার্দ ২০২৩ ফংলবী অইবী দা. কোইজম শান্তিবালানা ৱাফম কয়া ফোংদোক্লদুনা হায়খিবদা ‘ঐনা ইবা হৌরকপা মতমদা ইমুং মনুংগী ওইবা অৱাবা কয়া মায়োক্নখি। অসিগুম্বা লেমজনিংঙাই ওইরবা সাহিত্য একাদেমি এৱার্দকুম্বা অমা ঐহাক্না ইবা লাইরিক্তা ফংলক্কনি হায়বসি নোংমতা খল্লুদে। অদুবু ঐহাক্না ৱাজরকপা অমদি হোৎনবা লেপ্তবগী মহৈ অমা ওইনা মনা অসি পীরকপনি হায়না খল্লি। সিদগী হেন্না নুংশিংবা মীকুপ ঐগী পুন্সিদা থোক্ত্রি’।
শান্তিবালানা থম্মোয় শোক্না পাওদম্লদুনা হায়খিবদা অথাপ্পা মফমদা সাহিত্যগী থৌরম য়াওনিংদুনা চৎলগা হল্লকপদা য়াম্না থেংবসু য়াওখি। নুপী অমা ওইনা থেংনা হল্লকপদা কৈরোই লৈকাইনা ঐখোয়দা য়েংখিবা মীৎয়েং কয়াগী চৈনা খাংদুনা লাকখি। অৱা চৈথেং কয়া অদুনা ঐগী ইবগী খোঙচত্তা অচৌবা থৌনা অমদি ওইখি। লমদমসিদা ইমাসি বিনোদিনিনা লুচিংদুনা লৈকোল লীংখৎপীরম্বা অসিনা ঐখোয়গী ইবগী লম্বীদা অচৌবা মঙাল অমা পীবীরকখিবনি। ঙসিগী মীকুপ অসিদা ইমাসি বিনোদিনিবু য়াম্না নিংশিংই।
ঙসিগী থৌরম অদুদা লময়ানবা ওর্গানাইজেসন ত্রিপুরাগী সেক্রেটারি ওইরিবী লৈকোলগী লাইফ মেম্বার ক্ষেত্রিমুয়ম মাধবীবুসু ঙসিগী থৌরম অদুগী মনুং চন্না হরাও তরাম্না ওকখি। ঙসিগী থৌরম অদুগী মতাংদা লৈকোলগী সেক্রেটারী ঘনপ্রিয়ানা ৱাফম কয়া ফোংদোক্লদুনা লৈকোলগী মেম্বার অমসু ওইরিবী দা. কোইজম শান্তিবালানা ইবা ‘ইরোন্নুং’ মীংথোনবা শৈরেংগী লাইরিক অসিদা সাহিত্য একাদেমি এৱার্দ ২০২৩ পীরকপা অসিমক লমদমসিগী নুপী অইবীশিংদা পাঙ্গল থৌনা হাপ্পীরকপনি হায়না লোই। লমদমসিগী নুপী অইবীশিংনসু থৌনা হনবা লৈতনা ঐখোয়গী লোল, ময়েক অমদি সাহিত্য চাওখৎনবগীদমক হোৎনবা য়াবা হোৎনমিন্নিসি হায়নসু ফোঙদোকখি।
ঙসিগী থৌরমদা প্রোফেসার নহাকপম অরুনা, চিংথাম সুবদনি, দা. ৱাহেংবম কুমারী, দা. ময়া নেপ্রম, দা. ইকাধিনিনচিংবা অইবী কয়ানা শরুক য়াখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু