দাঃ রোনাল্ডো লাইশ্রমনা পুথোকপা অনৌবা গেলেক্সিগী স্ত্রকচর 'লোক্তাক' হায়না মিংথোনখ্রে
ইম্ফাল, মে ২৬: মণিপুরদগী এস্ত্রোফিজিসিন্ত দাঃ রোনাল্ডো লাইশ্রমনা লুচিংবা রিসার্ছরগী কাঙবু অমনা চহী বিলিয়ন ১২.৬ শুরবা অনৌবা গেলেক্সিগী স্ত্রকচর অমা পুথোকপগা লোয়ননা স্ত্রকচর অদুবু মণিপুরগী লোক্তাকপাৎকী মিং লৌদুনা 'লোক্তাক প্রোতোক্লস্তর' হায়না মিং থোনখ্রে।
জাপানগী নেসনেল এস্ত্রোনোমিকেল ওবজার্বেতরিগী রিসার্ছর অমসু ওইরিবা এস্ত্রোফিজিসিস্ত দাঃ রোনাল্ডো লাইশ্রমনা লুচিংবা ইন্তরনেসনেল রিসার্ছর তিম অসিনা সুবারু তেলিস্কোপ অমদি দি জেমস ৱেব স্পেস তেলিস্কোপ (জে দব্লিউ এস তি), 'দিস্তেন্স স্ত্রকচর'দা নৈনবগীদমক ওবজার্বেসন তৌখিবনি। মদুদগী ফংলকপা ফাইন্দিংশিংনা অচৌবা মায় পাকপা অসি ওইরকপনি হায়রি।
হীরম অসিগা মরী লৈননা মণিপুর এস্ত্রোনোমিকেল সোসাইতিনা শীন্দুনা পাঙথোকখিবা পাউগী মীফম অমদা দাঃ রোনাল্ডো লাইশ্রমনা হায়, দি এস্ট্রোফিজিকেল জর্নেল লেতর্স কৌবা মালেমনা শকখঙনরবা জর্নেল অসিদা ফোঙবা প্রোতোক্লস্তর অসি লোক্তাক হায়না মিংথোল্লিবা অসিগী মরমদি লোক্তাক পাৎ অসি মণিপুরগী শকয়েং মিংশেলনি হায়বসি মালেমদা শক্তাক্লবনি। লোক্তাক পাৎ মুৎখ্রবসু শুন্দ্রংগী তাইবংদা মুৎনাইদনা লৈহৌনবা পাৎ অসিগী মমিং লৌদুনা থোনবনি।
মহাক্লা হায়, ২০২৫গী ওক্তোবরদগী হৌরকখিবা রিসার্চ অসিগী রিসার্ছরশিংনা থেংনরকপা ক্লস্তর অদুগী মশক অদু লোক্তাক পাৎকী ফুমদিশিংনা মশক হায়রপ মান্নৈ। ক্লস্তর অসি লোক্তাক পাৎকী মিং লৌদুনা থোনবা অসিনা মণিপুর অমসুং য়ুনিবর্স অনীগী মরক্তা মরী অমা শাগৎপা ঙম্লগনি।য়ুনিবর্সকী মতাঙদা খন্নরকপা মতমদা লোক্তাক হায়বা মিং অসি অদুমক চিত্থবা য়াদনা লৈহৌরগনি হায়খি। দাঃ রোনাল্ডো লাইশ্রম থৌবাল দিস্ত্রিক্তকী খাঙবোক্তগীনি।
মহাক তোহোকু য়ুনিবর্সিতিদগী মাস্তর দিগ্রী অমসুং পি ঐচদি লোইশিল্লবা মতুং জাপানগী নাওজতা বেজ তৌদুনা লৈরি। মহাক্লা এস্ত্রোনোমিগী মতাঙদা মালেমদা ফোঙবা চেফোঙ কয়াদসু মতেঙ পাংখিবা লৈখ্রে। রোনাল্ডো নৌরিঙৈদগী হৌনা এস্ত্রোনোমিদা থৱায় য়াওরকখি। মহাক চহী ১৮ শুরকপদা প্রিলিমিনরি এস্ত্রোইদ দিস্কোভর তৌখি। মদুগীদমক মতম অদুগী ইন্দিয়াগী প্রসিদেন্ত দাঃ এ পি জে অব্দুল কলামনা মহাকপু ওকখি।
সোর্স - পোক্নফম
0 কমেন্ট:
কমেন্ট তৌবিয়ু