আপডেট:
image

ওজা সনাজাওবগী ১৪ শুবা কুমওন পাঙথোকখ্রে

ইম্ফাল, দিসেম্বর ১৩ : ইনস্তিত্যুত অমগী শক্তম ওইরিবা ওজা সনাজাওবনা ইরম্বা লাইরিকশিং অসি মীয়াম পূন্না হনগৎনা পামিন্নদুনা মণিপুরদা হৌজিক থোকলিবা ঈরাং অসিগী ৱারোইশিন পুরকপা য়াগনি অমসুং মণিপুরগী তুংলমচৎ ঙাকপা ঙমগনি হায়না ও এস এম তিগী মেনেজিং ত্রাস্তি এস ভুবোননা ফোঙদোকখ্রে।

ওজা সনাজাওবা লৈখিদবগী ১৪ শুবা নীংশিং কুমওন থৌরম ঙসি ও এস এম তি (ওজা সনাজাওবা মেমোরিয়েল ত্রাস্ত) না শীন্দুনা লাইরিকয়েংবম লৈকায়দা লৈবা ওজা সনাজাওবা মেমোরিয়েল কমপ্লেক্সতা পাঙথোকখি।

লৈখিদ্রবা ওজা সনাজাওবগী ফোটোদা হৈকৎ-লৈকৎ তমদুনা পাঙথোকখিবা থৌরম অদুদা এস ভুবোননা হায়, ঙসি অসি মীয়াম্না ‘ওজা’ হায়না খঙনরিবা প্রোঃ নাওরেম সনাজাওবা লৈখিদবগী ১৪ শুবা কুমওন থৌরম্নি। লমদম অসিদা মে ৩ দগী হৌরকখিবা ঈরাং অসি ওজা সনাজাওবনা মহৈরোয় ওইরিঙৈদগী হৌনা লৈখিদবা মতম অদু ফাওবদা মণিপুরগীদমক্তা হোৎনরম্বা অদুবু খ্বাইদগী চৈথেং পীবা নুংঙাইতবা থৌদোক্নি হায়না ও এস এম তিনা খঞ্জবগা থৌরম অসি চহী অসিগী ওইনা অচম্বা মওং দা পাঙথোকপনি।

মহাক্না হায়, ওজা সনাজাওবনা মহৈরোয় ওইরিঙৈ ১৯৬০ গী মতমদা ‘কদোমদা হয়েংগী মণিপুর’ হায়রিবা আর্তিকল অসি ইখ্রবা মতুং ২০০৯ গী লোইরমদায় ফাওবা চপ মান্নবা মমিংদা আর্তিকল ময়াম অমা ইদুনা শম্না মফৈ অমা ফাওবা মণিপুরগী নেসনেলিজমদগী হোংদোক্তনা চীংমী-তম্মী ফুরুপ ৩৬ কী অপূনবগী শক্তম, মণিপুরগী এথনিক বাউন্দারি, ১৯৪৯ দা ইন্দিয়াদা মর্জ তৌদ্রিঙৈ মতমগী পুৱারীন বশিং অসি মীয়ামদা চেৎনা শিন্নরম্মী।

মহাক্না মপুং ওইনা লাইরিক ৩০গী মথক্তা ইরম্বগা লোয়ননা আর্তিকল ৫০০ গী মথক্তা থম্বীরম্মী।

এস ভুবোননা হায়, অব্রাহম লিনকোননা উমং ৱাংমদগী হ্বাইত হাউস য়ৌখিবগুম্না ওজা সনাজাওবসু ৱানা হৌরকপা, মফম অমদগী মফম অমদা চোইনা চোইনা লৈদুনা লাকখিবদগী মরোমদোম লাইরিক তম্নবা হোৎনরক্তুনা গুৱাহাতি য়ুনিভার্সিটিদা লোগী প্রোফেসার অমসুং দিন ফাওবা ওইরম্বা মীশক অমনি।

মহাক্না মখা তানা হায়, ওজানা নহা ওইরিঙৈ ১৯৬০ গী মতম ২০০৯ গী লোইরমদায় ফাওবদা আর্তিকলশিংগী মরক্তা একাদেমিক অমসুং ইন্তলেকচুয়েলগী থবক থৌরম কয়া অমা তৌরমখি। ফুরুপ ৩৬ না শাগৎলকখিবা মণিপুর অসি হেক কায়বদা চোইনা চোইনা তারবা ফুরুপশিংগী তুংলমচৎ অমত্তা লৈরোই হায়বসি মালেমগী তোঙান তোঙানবা মফমদগী রিফরেন্স লৌদুনা ওজাগী অইবশিংদা ময়েক শেংনা ইদুনা থম্বীরম্মী।

মহাক্না মখা তানা হায়, মণিপুরদা লৈরিবা উংখৎনবশিং কাঙলূপ-কাঙলূপকী ঈরাংবু ওইরো, পোলিতিকেল, ইকনোমি, তোপোগ্রাফি নৎতগ্রা ইলিগেল মাইগেসনগীবু ওইরো, হীরম খুদীং গী সোলুসন ওসি ওজানা থম্বীরম্বা অইবশিংদা শুংশোয় শোয়দনা য়াওরবনি। মরম অদুনা ময়াম পূনমিন্নরগা ওজা সনাজাওবনা মণিপুরদা থোক্লিবা থৌদোকশিং অমসুং মণিপুরগী তুংলমচৎ অসি করি ওইরকপা য়াই হায়বা খঙগে হায়রগদি ওজানা ইরম্বা লাইরিকশিং হনগৎনা পামিন্নবা চঙই। লাইরিকশিং অদুদগী আইদিয়া লৌমিন্নদুনা অনৌবা ৱাখল্লোন হাপচিন্দুনা উংখৎনরিবশিং অসিগী ৱারোইশিন অমা পুরকপা য়াগনি।

ওজা অসি ইনস্তিত্যুত অমগী শক্তম্নি। মহাক অসি কনানো অমসুং মহাক্না ইরম্বা লাইরিকশিং নৈনবা অমা চঙই। মহাক্না ইরম্বা মণিপুর পুৱারী ২১ শুবা চহীচা হায়বা লাইরিক অসি এদিসন অহুম্লক ফোঙদুনা খ্বাইদগী মশীং য়াম্না চৎপা লাইরিক ওইখ্রবনি। লাইরিক অসি মীয়াম্না পারবদি মণিপুরগী তুংলমচৎ ঙাকপা ঙমগনি’ হায়না এস ভুবোননা ফোঙদোকখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: