আপডেট:
image

ইম্ফাল লিতরেচর ফেস্তিবেল-২০২২ হৌখ্রে

ইম্ফাল, নভেম্বর ২৫: মণিপুর সঙাই ফেস্তিবেলগী শরুক অমা ওইনা সথৌলুপ (সাহিত্য থৌপাং লূপ) ইম্ফালনা, মণিপুরী সাহিত্য পরষদ মেঘালয়, ফুঙ্গা হেরিতেজ শিল্লোং অমসুং জে এন মণিপুর ডান্স একাদেমি ইম্ফালনা খুৎশম্নরগা নুমিৎ হুম্নি চুপ্না চত্থগদগবা ইম্ফাল লিতরেচর ফেস্তিবেল-২০২২ ঙসি হৌদোকখ্রে। আই সি সি আর (ইন্দিয়ান কাউন্সিল ফোর কালচারেল রিলেসন) নোর্থ-ইস্তকী জোনেল দিরেক্তর মুনিশ নিংথৌজমনা প্রিসাইদ তৌদুনা ঙসি জে এন মণিপুর ডান্স একদেমিগী ওদিতোরিয়ামদা পাঙথোকখিবা লিটরেচার ফেস্তিবেল অসি হৌদোকপগি থৌরম অদুদা এদজুকেসন মিনিস্তার তিঐচ বসন্ত কুমার সিংহনা চীফ গেস্ত, বাংলা একাদেমি ঢাকাগী ডিপুটি দিরেক্তর মো: শাহাদাত হোসেন অমসুং শ্রীলঙ্কাগী ইমিনেন্ত রাইটার অয়াতুরাজ সন্থননা গেস্ত ওব ওনার ওইনা শরুক য়াখি।

থৌরম অদুদা মিনিষ্টার তিঐচ বসন্ত কুমারনা হায়খি, মণিপুর গবর্ণমেন্তনা হৌজিক লোল তম্বগী প্রোগ্রাম অমা পায়খৎপা হৌরে। মসিগী মখাদা লমদম অসিগী তোঙান-তোঙানবা এথনিক লেঙ্গুয়েজশিং থা অনী/অনী তম্নবা গবর্ণমেন্তনা স্তাইপেন্দ /ইন্সেন্তিব পীরগনি। অমত্তা ওইবা অমসুং অপূনবগী শক্তম শাগৎপদা লোলসু য়াম্ন মরূ ওই। মিনিস্তরনা হায়, লমদম অসিদা ফুরুপ কয়ানা খুন্দামিন্নরি। ফুরুপশিং অসিগী তোঙান-তোঙানবা লোল, কালচার অমসুং ত্রেদিসন লৈ। লৈমিন্নরিবা ফুরুপশিং অসিগী এথনিক লেঙ্গুয়েশিং অসি খঙমিন্ননবনা অপুনবগী শক্তম শাগৎপদা মতেঙ চাউনা ওইগদৌরিবনি। ৱাখলোন অসিগী মখাদা হায়রিবা লেঙ্গুয়েজ লার্ণিং প্রোগ্রাম অসি পায়খৎপনি।

বসন্তনা হায়খি, মালেম অসি অপিকপা খুঙ্গং অমগুম ওইনা লৌনরবা মতম্নি। হৌজিক অসি নোলেজ ৱার্ল্ড অমা ওইরকপনা লিতরেচর অসি হেন্না-হেন্না মরু ওইবা হেনগৎলক্লি। অসিগুম্বা চৈরক অসিদা তোঙান-তোঙানবা লৈবাকশিং শরুক য়াদুনা অসিগুম্বা লিতরেচর ফেস্তিবেল অমা পাঙথোকপা অসি মতাঙ চাবা, অফবা থৌশীল অমা ওই। লৈবাক অমা অমসুং স্তেত অমা মাঙজিন থানা পুখৎপদা অমসুং কালচারবু চাওখৎহনবদা লিতরেচারনা মরু ওইবা থৌদাং লৌরিবনি।

লিতরেচর ফেস্তিবেল অসিনা শরুক য়ারিবা তোঙান-তোঙানবা লৈবাকশিংদগী দেলিগেতশিং অসি ইন্তরেক্সন পাঙথোক্তুনা মাগী-মাগী ৱাখল্লোন অমসুং কালচার শেয়ার তৌবগী তাঞ্জা ফংলগনি। মণিপুরগী কালচারবুসু এক্সপোজ তৌবদা মতেঙ ওইহল্লগনি। মণিপুর সঙাই ফেস্তিবেলগী শরুক অমা ওইনসু লিতরেচার ফেস্তিবেল অসি পাঙথোকপসি হেন্না খুদোংচবা, কান্নবা ওইহল্লি। গবর্নমেন্তনা মণিপুরবু মালেমগী তুরিজম মেপ্তা য়াওহন্নবা পান্দমদা পাঙথোক্লিবা স্তেত অসিগী কেলেন্দার ফেস্তিবেল অসিদা তুরিস্তশিংগী পূক্নিং হেন্না চিংশিন্নবা হোৎনবা লিতরেচার ফেস্তিবেলসিনা মতেঙ পাংলগনি হায়না লো এন্দ লেজিসলেটিব এফিয়ার্স মিনিস্তরসু ওইরিবা তিঐচ বসন্ত কুমারনা ফোঙদোকখি।

ঙসিগী থৌরম অদুদা ব্রজ কে সরকার অমসুং বিনে লহানা এদিট তৌবা ‘ভয়েসেস নাউ ৱার্ল্ড পোইত্রি টুদে-ইন্তারনেসনেল এন্থোলোজি ওব ইংলিশ পোইত্রি’, জি বিনমাধব শর্ম্মানা ইবা এসে লাইরিক ‘লৈগী লাইশঙ’ অমসুং এন রঞ্জিতানা ইবা শৈরেং লাইরিক ‘মঙালগী লম্বী’ হায়রিবা লাইরিক অহুম অসিসু চীফ গেস্ত ওইনা শরুক য়াখিবা মিনিস্তার তিঐচ বসন্ত কুমারনা ফোঙখি। মসিগা লোয়ননা এনভাইরোনমেন্তেল সোসিয়েল রিফোর্মেসন এন্দ সঙাই প্রোতেক্সন ফোরাম, কৈবুল লমজাওদা সঙাই এৱার্দ খূৎশিন্নখি। লোইশিল্লকপদা শৈরেং অমসুং ৱারী মচা পাথোকপগী থৌরম অমসু পাঙথোকখি।

পনবা য়াই, মণিপুর গবর্নমেন্তকী টুরিজম দিপার্টমেন্তকী শেন্থং মখাদা আই সি সি আর, নোর্থ-ইস্তকী মতেঙগা লোয়ননা পাঙথোক্লিবা ইম্ফাল লিতরেচার ফেস্তিবেল-২০২২ অসি থা অসিগী ২৭ ফাওবা চত্থগনি। মণিপুর সঙাই ফেস্তিবেল তোঙান-তোঙানবা ভেন্যুশিংদা হায়রিবা লিতরেচার ফেস্তিবেল অসিগী প্রোগ্রামশিং পাঙথোক্কনি। ফেস্তিবেল অসিগী ঙসি অহানবা নুমিত্তসু মার্জিং পোলো কমপ্লেক্সতা শৈরেং অমসুং ৱারী মচা পাথোকপা অমসুং লোক্তাক পাৎকী মন্ধা আইলেনদা শৈরেং পাঙথোকপগী থৌরমশিং পাঙথোকখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু