শিলচর,  ০৯ সেপ্টেম্বর : এংগ্রি পোয়েট, অশাওবা কবি হায়না ময়াম্না খঙনরবা কবি লৌখাম নন্দকুমারগী ৩শুবা শৈরেং লাইরিক ‘সনাগী হি’ ফোঙখ্রে। চৎখিবা সেপ্টেম্বর ৪, সাউথ বরাক হোল বিন্নাকান্দি লক্ষিপুরদা পাঙথোকখিবা চীংলেম্বা থৌরম অমদা লাইরিক অসি ফোঙখি। থৌরম অদু শক্নাইরবা অশৈবা লৌখাম অতোল সিংহনা মীফম মপু ওইরগা মণিপুরী সাহিত্য পরিষদ আসামগী প্রেসিডেন্ট ঙাঙোম জয়কুমারনা মীথুংলেন ওইখি। অদুগা টিএইচ অঞ্জনা, আই.এস.থিংগোম অমসুং এন রাজেননা অখন্নবা মীথুং ওইনা শরুক য়াখি।

কবি সিএইচ বিদিতকুমারগী শৈহৌনা হৌদোকখিবা থৌরম অদুদা কবি এল নন্দকুমারগী ‘সনাগী হি’ হায়বা অহুমশুবা শৈরেং লাইরিক মায়খুম হাংদোকপীখি। ড. মেরিনা সাগপমনা লাইরিক অসি নৈনখি। লাইরিক অসি ফোঙবদা অচৌবা দায়িত্ব লৌদুনা মতেঙ পাঙবিখিবা বিন্দিয়া পাব্লিকেশনগী মপু শক্নাইরবা অইবা কুঞ্জলাল য়েন্দ্রেম্বমনা অফোঙবগী ৱারোল পীখি। পনবা য়াবদি মশাগী অকনবা লায়না অমনা মরম ওইদুনা সাহিত্যবু থম্মোয়না পামজবা এল নন্দকুমারগী লাইরিক অসি ফোঙবদা ময়াম্নসু মতেং পাংবিখি। থৌরম অসিগা মরী লৈননা মোইরাংথেম সবিতানা ‘লক্ষিপুর লমদমগী মণিপুরী সাহিত্য’ হায়বা হীরমসিদা নৈন চেরোল অমসু পাথোকখি। শক্নাইরবা থিয়েটার এক্টিভিষ্ট সমর লুৱাংনা কন্ডাক্ট তৌদুনা থৌরমদু চীংলেম্না পাঙথোকখি।    

: সোর্স : মরূপ