হোজাইগী মণিপুরী সাহিত্য পরিষদ শঙলেনদা পাঙথোক্কদৌরিবা ৮৩ শুবা নুপীলাল নীংশিং থৌরমদা শরুক য়ানবগীদমক খোঙশানখ্রে
ইম্ফাল, দিসেম্বর ০৯: লাক্লিবা দিসেম্বর ১২ দা য়ুনাইটেদ মণিপুরী এসোসিয়েসন আসাম (উম্মা) হেন্দলুম কম্মিটি হোজাই দিষ্ট্রিক্ট অমদি মণিপুরী উইমেন এসোসিয়েসন (মণিপুরী নুপী লূপ) আসাম হোজাই অনীনা খুৎশম্নদুনা হোজাইগী মণিপুরী সাহিত্য পরিষধকী শঙলেনদা পাঙথোক্কদৌরিবা ৮৩শুবা নুপীলাল নীংশিং থৌরমদা শরুক য়ারুনবগীদমক পোইরৈ লৈমরোল মৈরা পায়বী অপূনবা মণিপুর, অমৱাভা অমদি অমুকোগী অপূনবা মীওই ১২না শাবা টিম অমা ঙসি অয়ুক পুং ৯দগী অমুকোগী ওফিস মমাঙদগী খোঙশানবা হৌখ্রে।
হোজাইগী খোঙচৎ অসিদা পোইরৈ লৈমরোল মৈরা পায়বী অপূনবা মণিপুরগী প্রেসিদেন্ট লোংজম মেমচৌবী, অমৱাভাগী প্রেসিদেন্ট য়ুমখাইবম কুঞ্জরানি অমদি অমুকোগী ভাইস প্রেসিদেন্ট কোইজম হেলেনসু য়াওরি। ঙসি অয়ুক পুং ৯দগী অমুকোগী ওফিস মমাঙদগী হোজাইদা পাঙথোক্কদৌরিবা নুপীলাল নীংশিং থৌরম য়াওননবগীদমক খোঙশানবা হৌখিবা টিম অদু অমুকোগী প্রেসিদেন্ট ফৈরোইজম নন্দো লুৱাংনা লমথাকি। মমাঙ চহী ২০২১ দা আগরতলাগী মণিপুরী লিটরেরি এন্দ কালচারেল ফোরাম ত্রিপুরা অমদি অমুকোনা পুন্না শীনমিন্নখিবা নুপীলালগী থৌরম অদুদা লূপ অহুম অসিনা শরুক য়াখিবা অদুগী মখা চত্থরকপা ওইনা হন্দক্না আসামগী হোজাইদা পাঙথোক্কদৌরিবা ৮৩শুবা নুপীলাল নীংশিং থৌরম অসিদা শরুক য়ানবা চৎপনি।
দিসেম্বর ১০দসু নুপীলালগী থৌরমগীদমক অমুকোগী প্রেসিদেন্ট ফৈরোইজম নন্দো লুৱাং অমদি এদভাইজর য়াংসোসোং কোইরেংনা লুচিংবা মীওই মরিসু আগরতলাদা চৎকনি। লোয়ননা আগরতলাগী রানির বাজারদা লৈবা নলগড়িয়া রাধা মাধব দেবতা বাড়ি কমফ্লেক্সতা নুপীলালগী মীতম অমা খিনবগী উরেপ-উয়ুং অমসুংতমগনি।
ঙসি ক্বাকৈথেলদা লৈবা অমুকোগী ওফিসতগী আসামগী হোজাইদা পাঙথোক্কদৌরিবা ৮৩ শুবা নুপীলাল নীংশিং থৌরমদা শরুক য়ারুনবগীদমক লমথাখিবা থৌরম অদুগা মরী লৈননা অমুকোগী প্রেসিদেন্ট ফৈরোইজম নন্দো লুৱাংনা ফোঙদোকখিবদা, মণিপুরীশিং অসি মালেমগী মফম কয়াদা ফীভম মতমগী মতুংইনা চোইনা চোইনা খুন্দ্রাখ্রবসু ঐখোয় মণিপুরীশিং অসি অমত্তনি। মণিপুরীশংনা মতম পুম্বদা অমত্তা ওইবগী ৱাখল্লোনদা থবক তৌমিন্ননবা মণিপুরগী ৱাংমদা খুন্দাখ্রবা মণিপুরীশিং অসি হৌরকফম মরৈবাক মণিপুর অমদি মফুরুপ অসিবু হেন্না নুংশিনবা অমসুং মমাংঙৈদগী লৈরক্লবা থৌনা লিংজেল অদু মাঙদনবা ঐখোয়না ঐখৈায়গী থৌনা ফরবা ইপা-ইপুশিং অমদি ইম-ইবেলশিংগী ৱারী অমদি মখোয়গী মরী লৈনবা থৌদাকশিং অদু ঙসিগী অমদি তুংগী মীরোলদা হেন্না ময়েক শেংনা খঙহৌনবগীদমক্তা মখোয়গী নীংশিং থৌরমশিং পাঙথোকপা অমদি মখোয়গী মীতম শাদুনা খিনবা হায়বসি য়াম্না তঙাইফদবা থবক অমনি হায়খি।
লমথাবগী থৌরম অদুদা মহাক্না মখা তারদুনা হায়খি, হৌজিক্কিী ওইরক্লিবা ফীভম কয়া অসিদা ঐখোয়না ঐখোয়গী ইরমদম মণিপুর অসিগী মনুং খখ্তদা থবক তৌদুনা লৈবগী মহুৎতা খরা পাকথোক চাউথোক্না মণিপুরীশিংনা খুন্দারিবা মালেমগী মফম কয়াদা চৎতুনা অপূনবা পাঙ্গল অমা শাগৎপা অমদি ঐখোয় মশেলগী য়াম্না নক্না মরী অদু অদুম্মক লৈহন্নবা হোৎনগদবনি। মসিদা ঐখোয়গী ইরমদম অসিগী চাউথোকচনিংঙাই ওইরবা ফজরবা কালচার, পুৱারী, ইমালোল অমদি য়েলহৌ মশান্নশিং, মিংগৌ অমদি লাই হরাওবগী ফজরবা মশকশিং অসিনচিংবশিং অসিদা হেন্না মীৎয়েং থমদুনা থবক তৌমিন্নসি। পোইরৈ, অমৱাভা অমদি অমুকোনা মণিপুরগী মপান লমদা খুন্দারিবা মণিপুরীশিংগা হেন্না অফবা মরী শাগৎনবগীদমক্তা পাঙথোরক্রিবা থবক থৌরমশিং অসিদা মণিপুরগী মীয়াম্নসু মতেং পাংবীয়ু হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু