সনাজাওবা লৈশেম্বনা রাজ্য সভাদা ইন্দো-ম্যান্মার ঙমখৈগী ৱাফম পুখৎখ্রে
ইম্ফাল, দিসেম্বর ০৯ : থা অসিগী ৭তগী হৌরদুনা সিট্টিং ১৭ লৈগদবা রাজ্য সভাগী নীংথম মীফমদ শরুক য়ারিবা মণিপুরগী মেম্বার নিংথৌ লৈশেম্বা সনাজাওবনা রাজ্য সভাগী ‘স্পেসল মেন্সন’ গী খুদোংচাবা লৌরদুনা চহী খরগী মমাঙদগী ইন্দো-ম্যান্মার বোর্দার পরিংদা থোরক্লিবা ৱাথোকশিং লোইশিনবগা লোয়নন ঙমখৈ পরিং অসিদা চত্থরক্লিবা শম্বল খাবগী থবক লোইশিন্নবা ৱাফম পুখৎখ্রে।
এম পি লৈশেম্বা সনাজাওবনা ৱাফম অসি পুখৎলদুনা ইন্দো-ম্যান্মার ঙমখৈ পরিংদা শম্বল খাবগী থবক মপূং ফানা লোইশিন্দুনা লোনা য়াদবা মওংদা ঙমখৈ ৱাংমদগী ইল্লিগেল দ্রাগশিং পুশিল্লকপা অমসুং লোগী ৱাংমদা মীওই কয়া লৈবাক অসিগী ঙমখৈ লান্দুনা চঙশিল্লকপদা থিংবা ঙমগনি। থবক অসিমক্না মণিপুর লৈঙাক্কী মায়কৈদগী চঙশিল্লক্লিবা ৱার ওন দ্রাগসকী কেম্প্যেনদসু মতেং পাংগনি হায়বা ৱাফম ফোঙদোকখি।
ঙরাং মহাক্না রাজ্য সভাদা পুখৎখিবা ৱাফম পল্লদুনা টুইটার ৱাফমশিং অসিমক নৌহৌনন ফোঙদোরক্তুনা মীয়ামদসু খঙহল্লকখিবনি। পনবা য়াবদি, চহী খরগী মমাঙদগী ইন্দো-ম্যান্মার ঙমখৈ পরিংদা য়ুশথংনরিবা ম্যান্মারগী ওথোরিটিনা ঙমখৈ লান্না চঙশিল্লক্তুনা মখোয়গী সিক্যুরিটিগী আউট পোষ্টশিং শাজিল্লক্লে অমসুং ঙমখৈ পরিংদা লৈবাক অনগী ঙমখৈ খঙদোক্নবগীদমক য়ুংলিবা বোর্দার পিল্লাশিং হোংদোক হোংজিন তৌরক্লে হায়বগী ৱাথোক লৈরকখিবনি। মসিগীদমক মণিপুরগী তোঙান তোঙানবা পোলিটিকেল পার্টিশিং য়াওনা মীয়ামগী লূপশিংগী মীহুৎশিংনা ঙমখৈ পরিংদা য়াম্না তোয়না চৎতুনা লৈবাক অনীগী মরক্তা লৈরক্লিবা ঙমখৈগী চয়েৎনবশিং লোইশিন্নবা মরী লৈনরিবা মণিপুর অমসুং ইন্দিয়া লৈঙাক্কী ওথোরিটিশিংদা তক্নদুনা লাক্লিবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু