হৈক্রুজম শ্যামসুন্দরগী 'মনা মশিংতমক চারবী' অমসুং 'গীতাঞ্জলি' ফোঙখ্রে
ইম্ফাল, মার্চ ৮ঃ হৈক্রুজম শ্যামসুন্দর সিংহগী 'মনা মশিংতমক চারবী' অমসুং 'গীতাঞ্জলি' হায়না মিংথোনবা লাইরিক ২ ঙসি নিত্যাইপাৎ চুথেক্তা লৈবা দি আই পি আর (দিরেক্তোরেত ওব ইনফোর্মেসন এন্দ পব্লিক রিলেসন্স) কী ওদিতোরিয়মদা ফোঙখ্রে।
সাহিত্য একাদেমি ত্রান্সলেসন - প্রাইজ ফংখ্রবা অইবা লাইময়ূম বিরেন্দ্রকুমার শর্ম্মনা প্রিসাইদ তৌদুনা পাঙথোকখিবা লাইরিক ফোঙবগী চীং লেম্লবা থৌরম অদুদা মণিপুরী সাহিত্য পরিষদ, ইম্ফালগী প্রসিদেন্ত লোংজম জয়চন্দ্রনা চীফ গেস্ত ওইনা শরুক য়াখি।
ঙসি ফোঙখিবা হৈক্রুজম শ্যামসুন্দর সিংহগী 'মনা মশিং তমক চারবী' হায়না মিংথোনবা লাইরিক অসি নোবেল প্রাইজ ফংখ্রবী সাউথ কোরিয়াগী অইবী হান কাংগী 'দি ভেজ্টরিয়ন' হায়রিবা নোবেল অসিদগী অদুগা 'গীতাঞ্জলি' হায়রিবা লাইরিক অসিনা রবিন্দ্রনাথ তেগোরগী মমীং লৈরবা শৈরেং 'গীতাঞ্জলি' দগী মহাক্লা মণিপুরীদা হন্দোকপনি। লাইরিক অনীমক অসি কে পি এল (কমলা পব্লিশর্স লিমিতেদ), ইম্ফালনা ফোঙবনি। লাইরিক ২ অসি থারগা হৈক্রুজম শ্যামসুন্দর সিংহগী ফোঙখিবা লাইরিক পূন্না ১৩ শুখ্রে।
অইবা হৈক্রুজম শ্যামসুন্দর সিংহনা হায়, হান কাং গী নোবেল 'দি ভেজ্টরিয়ন' অমসুং রবিন্দ্রনাথ তেগোরগী শৈরেং 'গীতাঞ্জলি' হায়রিবা অনীমক অসি মমল নাইদ্রবা লাইরিকশিং ঙাক্তনি হায়বদা হায়মনবা থোক্লোই। মালেমগী শক্নায়রবী সাউথ কোরিয়ান রাইতর হান কাংনা মহাক্কী লাইরিক অহুমগীদমক নোবেল প্রাইজ ফংখিবা মতমদা হায়রিবা 'দি ভেজ্টরিয়ন' হায়রিবা নোবেল অসিসু য়াওরিবনি। অসিগুম্বা মমল নাইদ্রবা লাইরিক ২ অসি মণিপুরীদা হন্দোক্তুনা ফোঙনিংবগী ঈথিল অমা য়ান্না কন্না ফাওবদগী লাইরিক অনী অসি মহাক্লা হন্দোক্তুনা ফোঙবনি। 'গীতাঞ্জলি' অসি মণিপুরীদা হন্দোকপা মতমদা লিতররি দিভাইস কয়া অমা য়াওবনা হন্দোকপদা অৱাবা ওইখি।
থোইদোক্লা রবিন্দ্রানাথ তেগোর মশামক্কী 'গীতাঞ্জলি' গী মহাও অমদি অইবা মশামক্কী মমি অদু তাহন্নবা য়ান্না কন্না হোৎনরগা হন্দোকখিবনি। অদুবু মসিনা মপুং ফারে হায়বদি নত্তে। অদুমকপু অপাবশিংনা পাবদা রবিন্দ্রনাথ ওইনা উবা ঙম্লবদি হন্দোকপগী মহৈ য়াল্লে লৌজগনি হায়নসু হৈক্রুজম শ্যামসুন্দরনা মখা তানা ফোঙদোকখি।
ঙসি ফোঙখিবা লাইরিক ২ অসিগী মরমদা সাহিত্য একাদেমি এৱার্দি থোকচোম ইবোহনবী সিংহ অমসুং ত্রান্সলেতর অমসুং ক্রিতিক লাইশ্রম মেমো সিংহ অনীনা ৱা ঙাঙখি।
Photo @ Alex Babu
সোর্স - পোক্নফম
0 কমেন্ট:
কমেন্ট তৌবিয়ু