দাঃ সোহিনী রেদা তেগোর নেসনেল স্কোলরশিপ পীরক্লে
ইম্ফাল, মার্চ ১১: য়ু এস এ'গী কেলিফোর্নিয়া য়ুনিবর্সিতি অমদি নিউ য়োর্ক য়ুনিবর্সিতিগী ডান্স দিপার্টমেন্তকী সেলেবসতা মণিপুর জগোয় য়াওহন্দুনা মণিপুরী কলচরবু মশক তাক্লিবী ৱেস্ত বেঙ্গলদগী দাঃ সোহিনী রে (Sohini Ray)দা লেমজনিঙাই ওইরবা তেগোর নেসনেল স্কেলারশিপকী মনা খুৎশিন্নরক্লে।
কলচরেল রিসার্ছকী লমদা মিনিস্ট্রি ওব কলচরনা পীবা খ্বাইদগী ৱাংবা মনাশিংগী মনুংদা অমা ওইরিবা তেগোর নেসনেল স্কোলরশিপ অসিবু মণিপুরী আর্তসকী লমদা ফংবা ঙম্বা অসি মহাক্না অহুমশুবা ওইবগা লোয়ননা নুপী লক্তগী অহানবা অমদি মণিপুরী জগোয় শাবীশিংগী মরক্তগীনা অনীশুবা ওইরে।
নুমিৎ খরনিগী মণিপুরগী খোঙচৎতা ইম্ফালদা লৈরমখিবা দাঃ সোহিনী রে'গা ঙসি মোইরাংখোম সৌগাইজম লৈরক্তা লৈবা শক্নাইরবা মণিপুরী জগোয়গী গুরু বিপিনগী য়ুমদা পাউমীশিংগা উনবদা মহাক্না হায়, মণিপুরী জগোয় খক নত্তনা মৈতৈ ময়েক্কী কলচরেল হিস্তরি হায়বা হীরমদা মহাক্না রিসার্ছ তৌদুনা মণিপুরবু য়ু এস এ দা মশক তাক্নবা অঙম্বা থাক্তা হোৎনরি।
গোবিন্দজি নর্তনালয়গী রিতয়ার্দ প্রিন্সিপাল গুরু রঞ্জিৎ অধিকারিময়ুম অমদি ফিল্ম মেকর বোবি ৱাহেংবমগী মতুং অহুমশুবা ওইনা মনা অসি ফংবনি হায়রদুনা মহাক্না হায়, মশাগী চহী ৫ শুরকপদগী কোলকতাগী কালিঘাত্তা লৈবা স্কুল অমদা জগোয় তম্বা হৌরকখি। মসিগী মতুং গুরু বিপিনগী মখাদা কোলকতাদা হাংবা মণিপুরী নর্তনালয়দা মশাগী চহী ৭ শুরকপা মতমদগী মণিপুরী জগোয় অসি তম্লকখিবনি।
মহাক্লা হায়, মণিপুরী কলচরবু খোইদাজবনা ১৯৭৫দা পুথোকখিবা নর্তনালয় অসিগী অহানবা প্রদক্সনদা আর্তিস্ত অমা ওইনা শরুক য়াখি। মশাগী চহী ১০ শুরকপদগী মৈতৈ পূং ফাওবা তম্লবা মতুং চহী ১৪দগী গুরু বিপিনগী রিসার্ছ এসিস্তেন্ত ওইদুনা গুরু অসিনা পুথোকপা মণিপুরী জগোয়গী প্রদক্সনশিংদা শরুক য়াদুনা লাকখি।
য়ু এস এদা মহাক্না মণিপুরী জগোয় শন্দোক্লিবা অসিগী মতাঙদা পাউমীশিংনা হংবা ৱাহংগী পাউখুম পীরদুনা দাঃ সোহিনী রে না হায়, য়ু এস এগী য়ুনিবর্সিতি ওব কেলিফোর্নিয়াদা মহাক্না কলচরেল হিস্তরি ওব মৈতৈ ময়েক হায়বা হীরমদা এন্থ্রোপোলোজিদা পি ঐচ দি তৌখি। মৈতৈ ময়েকপু অৱাংবা থাক্তা পুখৎনবা হোৎনবদা অচৌবা থৌদাং লৌরম্বা লৈখিদ্রবা ওজা অকাবগী পাউতাকশিং লৌদুনা পি ঐচ দি অসি লোইশিনখি। মসিগী মতুৎদা লোস এঞ্জেলসতা মণিপুরী দান্স ভিজন্স হায়না মিংথোনবা ইনস্তিত্যুত অমা চল্লাইদুনা মফম অদুগী মীয়ামদা মণিপুরী জগোয়শিং শন্দোক্তুনা লাক্লি।
লৈবাক অসিগী মমিং লৈরবা জগোয় মখল খরা মিং ওইনা পল্লবদা ভারতনাত্যম অমদি কথাকলিনচিংবা য়ু এস এগী মীয়ান্না খঙনরম্লবসু মণিপুরী জগোয় অসিদি খঙনরমদে। মহাক্না য়ুনিবর্সিতি ওব কেলিফোর্নিয়া অমদি নিউ য়োর্ক যুনিবর্সিতিদা মণিপুরী জগোয় তন্বীবা হৌবদগী ঙসিদি জগোয় অসিগী মতাঙদা খঙনরক্লে, মখা তানসু মণিপুরী কলচর শন্দোক্নবা হোৎনখিগনি হায়খি।
মণিপুরী জগোয়বু মালেমগী থাক্তা পুখৎলিবী শক্নাইরবা জগোয় শাবী দাঃ সোহিনী রে না লৌরিবা থৌদাংবু শীংথাবা ওইনা ২০০৮দা গ্রেমি এৱাৰ্দকা মান্নবা লেমজনিঙাই ওইরবা লেস্তর হোর্তন এৱাদ পীদুনা ইকায় খুম্নাখিবগী মথক্তা দেবদসি নেসনেল এৱাদ, ওদিষা ফংবা অহান্বা মণিপুরী দান্সর ওইরিবনি।
সোর্স - পোক্নফম
0 কমেন্ট:
কমেন্ট তৌবিয়ু