সিলেটতা কাং চিংবগী অরোইবা নুমিৎকী থৌরম পাঙথোকখ্রে
সিলেট, ১৬ জুলাই : বাংলাদেশকী সিলেট সিটিদা ধর্ম্মগী অমদি মহৌশাদগী চৎনরক্লবা ইঙেলগী নিনী পানবা নুমিৎতগী পাঙথোক্তুনা লাকখিবা কাং চিংবগী অরোইবা থৌরম ওইনা ঙসি সিলেট সিফাই কৈথেল (রিকাবীবাজার) লম্পাক্তা পাঙথোকখ্রে।
সিলেট লৈপাক পঞ্চায়েত অমসুং সিলেট দেবালয় রথয়াত্রা উদযাপন কমিটিনা শীন্দুনা ঙসি পাঙথোকখিবা কাংলেনগী থৌরম অদুদা শ্রীশ্রী জগন্নাথ, বলভদ্র, সুভদ্রগী মিতমশিং লোয়ননা নিতাইনন্দ মহাপ্রভুগী মিতমশিংনা কাং মথক্তা লেঙশিল্লবা মতুং সিলেটতা খুন্দারিবা মৈতৈ লৈকাই মন্ডপকী কাং অদু চিংদুনা সিফাই কৈথেল অসিদা পুনখি।
মথংদা লাইনিং থৌরম মতুং ইন্না দশবতার শ্লোক অমসুং জয়দেব ঈশৈ, নিতাইপদ শক্লবা মতুংদা জগন্নাথ আরতি শক্লদুনা ময়াম লৈকাই লৈকাইদা অমুক কাং চিংদুনা হন্নখি। হন্দক্কী থৌরম অসিদা মহৌশাগুম লামাবাজার লৈকাইনা আরতি অমসুং ঈশৈগী থৌগল তৌখি। ঙসিগী থৌরম অসিদা ভক্ত ময়াম্ন মান-মানা ঙমজবা হৈ-লৈনচিংবা কৎতুনা শ্রীশ্রী জগন্নাথ, বলভদ্র অমদি সুভদ্রাগী মফমদা থৌনিজখি।
পনবা য়াবদি সিলেটতা কাং চিংবগী থৌরম অসি ইনিংথৌ গম্ভীরসিংহ হাক্তকতগী মফম অসিদা অসুম্না ময়াম পুল্লদুনা কাংগী থৌরম অসি চহিগী ওইনা পাঙথোক্তুনা লাকখি।
সিলেটতা মৈতৈনা খুন্দারিবা লৈকাই পুম্নমক মীং ওইনা পনলবদা শিবগঞ্জ তগী ২, নয়াবাজার, কোনুং (মণিপুরী রাজবাড়ী), লৈচোম্বম লৈকাই (লামাবাজার), শাপমলৈকাই (লালাদিঘীর পাড়), নরসিংটিলা (মথক লৈকাই), নরসিংটিলা (মখা লৈকাই), পুখ্রিমাপল (সাগরদিঘীর পাড়), খুনৌ (সুবিদবাজার), থৌদাম লৈকায়(আম্বরখানা), নোংমাইথেম (বড়বাজার) লোয়ননা অতোপ্পা ফুরুপকী কাং অহুমসু শরুক য়াখি।
0 কমেন্ট:
কমেন্ট তৌবিয়ু