সনামহি অমসুং হিন্দু লাইনিং চৎপা মৈতৈশিং মাইনোরিতি ওইহন্নবা রিকমেন্দ তৌখ্রে
ইম্ফাল, সেপ্টেম্বর ২১ : ঙরাং ফমখিবা স্তেত কেবিনেতকী মীফম্না স্তেত অসিগী য়েলহৌমীশিংগী মনুংদা মৈতৈ সনামহি লাইনিং চৎপা অমসুং মৈতৈ হিন্দুবু ইন্দিয়া গভর্ণমেন্তনা মাইনোরিতি ওইনা শক খঙবীনবা রিকমেন্দ তৌখ্রে হায়রি। ঙরাং অয়ুক চীফ মিনিস্তর সেক্রেটারিয়েটকী কেবিনেট হোলদা পাঙথোকখিবা স্তেত কেবিনেতকী মীফমদা হৌখিবা ইং ২০১১ দা পাঙথোকখিবা সেন্সসকী রেকোর্দ অদু পুথোক্তুনা নৈনরবা মতুংদা হায়রিবা ৱারেপ অসি কেবিনেত মীফম্না লৌখিবনি হায়রি।
ইং ২০১১ গী সেন্সস রেকোর্দকী মতুংইন্না স্তেত অসিদা সনামহি লাইনিং চৎপা অপূনবা মী ২,২২,৩১৫ লৈদুনা অপূনবা মীশীংগী চাদা ৭.৮ ওই হায়না পীরি। অদুগা হিন্দু লাইনিং চৎপনা পূন্না মী ১১, ৮১, ৮৭৬ লৈদুনা অপূনবা মীশীংগী চাদা ৪১.৪ নি হায়না পীরি। সেন্সস রেকোর্দ অসিগী মতুংইন্না ইস্লাম লাইনিং চৎপনা মীশীং ২,৩৯,৮৩৬ (চাদা ৮.৪), খৃষ্টান লাইনিং চৎপনা অপুনবা মীশীং ১১,৭৯,০৪৩ (চাদা ৪১.৩), সিখ লাইনিং চৎপনা মীশীং ১৫২৭ (চাদা ০.০৫), বুধিস্ত লাইনিং চৎপনা মীশীং ৭,০৮৪ (চাদা ০.২), জেইন লাইনিং চৎপা মীশীং ১৬৯২ (চাদা ০.০৬), অতৈ লাইনিং চৎপশিংনা মীশীং ১১,৪৫২ (চাদা ০.৪) অমসুং করম্বা লাইনীং চৎলি হায়না ফোঙদোক্তবা মীশিংনা ১০,৯৬৯ (চাদা ০.৪) হায়না পীরি।
মরকসিদনা, মীশীং য়ামশিল্লক্ত্রবা লমদমসিগী য়েলহৌমী সনামহি লাইনিং চৎলিবশিংগীদমক অখন্নবা মীৎয়েং চঙদুনা থা অসিগী ২০দা ফমখিবা মণিপুর গর্ভনমেন্তকী স্তেত কেবিনেত মীফম্না সনামহি লাইনিংবু মাইনোরিটি ওইনা ইন্দিয়া গভর্ণমেন্তনা শকখঙবীনবা রিকমেন্দ তৌখিববু লাইনিংথৌ সনামহি তেম্পল বোর্দকী মায়কৈদগী তরাম্না ওকপগা লোয়ননা থাগৎপা অমসুং নুংঙাইবা ফোঙদোরক্লি।
বোর্দ অসিগী মেম্বার সেক্রেটারিগী চেরোল অমদা, ইং ২০১১ গী ইন্দিয়াগী মীকোক থিবদা লমদমসিগী সনামহি লাইনিং চৎপা মীশীং চাদা ৭.৮ খক ওইদুনা নিক নিক লাউরবা ফীবম অসিদা অসিগুম্বা খোঙথাং অমা লৌখৎলকপা অসিনা লাইনিং অসিবু চৎলিবশিংনা চাওখৎনবা হোৎনবদা অচৌবা পাম্বৈ ওইরগনি হায়রি। স্তেত এসেমব্লি মীফম্না ইন্দিয়াগী মীকোক থিবদা সনামহি লাইনিং চৎলিবশিংবু ‘আর্দশ’ কী মনুঙদা লৈরিবা অসি তোঙানবা সেন্সস কোদ নম্বর পীনবা ৱারেপ লৌখিবগীদমক্তসু নুংঙাইবা ফোঙদোরক্লি।
সোর্স: পোক্নফম
0 কমেন্ট:
কমেন্ট তৌবিয়ু