লৈকোলগী মপোক কুমওনদা এমকে বিনোদিনি ইকায় খুম্নখ্রে
ইম্ফাল, অক্টোবর ৩ : লৈমরোল খোর্জৈকোল, লৈকোল ইম্ফাল লিংখৎখিবগী ২২শুবা থৌরম ঙসি মণিপুর প্রেস ক্লাবতা পাঙথোকখ্রে। মণিপুরগী শক্নাইরবী লৈখিদ্রবী এমকে বিনোদিনিগী চহি ১০০ শুবা মপোক নুমিৎকা মরী লৈননা পাঙথোকপা থৌরম অদুদা মণিপুর হেন্দলুম এন্দ হেন্দিক্রাফট দিবলপমেন্ট কোর্পেরেসন লিমিটেদকী চিয়ারমেনসু ওইরিবা লম্লাই এসেমব্লি কন্সটিটুয়েন্সিগী এমএলএ খোংবান্তাবম ইবোমচানা চীফ গেষ্ট, লৈকোলগী প্রেসিদেন্ট ক্ষেত্রিময়ুম শুবদনিনা থৌরম মপু ওইনা দাইজদা ফমদুনা শরুক য়াখি।
২২ শুবা লিংখৎখিবগী থৌরম অদুগী শরুক অমা ওইনা লৈকোলগী সিনিয়র ওইরবা মেম্বারশিংবু ইকায়খুম্নবা উৎতুনা ওকপগা লোয়ননা লৈকোলগী ফাউন্দার মেম্বার ওইনা লৈরম্বা শক্নাইরবী লৈখিদ্রবী এমকে বিনোদিনিগী মরমদা সাহিত্য একাদেমি এৱার্দি শরতচান্দ থিয়ামনা ‘মরৈবাক্কীদমক মজা ইবেম্মা বিনোদিনি’ হায়বা হিরমদা ৱা ঙাঙখি।
থৌরম অদুদা চীফ গেষ্টকী ৱারোল পীরদুনা মণিপুর হেন্ডলুম এন্দ হেন্ডিক্রাফট দিভলপমেন্ট কোর্পোরেসনগী চিয়ারমেন এমএলএ খোংবান্তাবম ইবোমচানা এমকে বিনোদিনি অইবা অমা ওইনা হিরম কয়াদা খঙ হৈবগা লোয়ননা মণিপুরগীদমক্তা কত্থোক্লম্বা, মাগী কত্থোকপা অদুবু লৈবাক্না মশক খঙবীদুনা পদ্মশ্রী এৱার্দ পীদুনা লৈবাক অসিনা ইকায়খুম্নবা মীশক্নি হায়না শিংথাখি।
লৈকোলগুম্বা মণিপুরগী লাইরিক লাইশু নিংথিনা হৈরবা নুপী ইন্টলেকচুয়েল কয়াগী প্লেটফোর্ম অমা লৈ হায়বসি মীয়াম্না খঙবীফম থোকই। প্লেটফোর্ম অসিনা মণিপুরগী অইবী কয়াবু লমজিংগদৌরিবনি হায়বা ৱাফম এমএলএ খোংবান্তাবম ইবোমচানা থমখি। থৌরম অদুবু প্রিসাইদ তৌখিবা লৈকোলগী প্রেসিদেন্ট ক্ষেত্রিময়ুম শুবদনিনা হায়, চীফ মিনিষ্টার ও ইবোবীগী মতমদা লৈকোলগী ওইনা আর্ট এন্দ কালচারদা রিকরিং গ্রান্ট ওইনা লুপা লাক্ষ অমা হাপ্পীরম্মী অদুবু হৌজিক্তি লাক্ষ অমদু ককথৎখ্রে।
রিকরিং গ্রান্ট অদুগী ওন্ন তৈনবদা চীফ মিনিষ্টারগী হকশেলগী তেংবাং হায়না ওন্থরকপদগী ফংহৌদবা পৈশা খরা ফংনবা তান্নরি। ফংগদ্রা ফংলোইদ্রা হায়বদি খঙদে। লৈঙাক্না লিটরেচার হায়বসিদা খজিক্তং মিরাইবগুম তৌই। শান্নবগীনি হায়রগদি, কালচারগীনি হায়রগদি পৈশা য়াম্না পী। পৈশা য়াওদ্রবদি লিটরেচার চাওখৎহনবা ঙম্লোই। অইবা য়াওদনা করম্না মহৈরোয়শিংনা লাইরিক তমগনি। হিরম অসিদা লৈঙাক্না মীৎয়েং চঙহন্নিংই হায়বা ৱাফম ক্ষেত্রিময়ুম সুবদনিনা মখা তানা হায়খি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু