• 695
• ২৬শে অগাস্ট ২০২২ ইং
• Share on:

রতন থিয়ামগী “তাবীদ্রবা তেংথাখোল” শৈরেং লাইরিক অসিদা মিৎয়ং অমা -- তোংব্রম অমরজিৎ

মতমগী অকনবা শহুমদা অহোংবা অওনবা কয়াগী মরক্তা খুনাইগী শক্তমশিং অইবগী থম্মোয় চেবাংদা লাচনবা লেপ্তে। মসিগী ময়েক লারবা মশক অমনি ‘তাবীদ্রবা তেংথাখোল’ মিংথোনবা শৈরেং অসিনা ফোংদোক্লিবসিসু।  শৈরেং লাইরিক অসিমক কবিগী অপোকপীগী মফমদা কত্থোক্লি, ‘ইমাগী নুংশিরবী খূয়া তীর্থদা’ হায়না নুংশিনা। লাইরিক অসিদা পুন্না শৈরেং ২৯ য়াওরি। হৌজীক্কি অনৌবা মীরোল অমসুং মৈতৈ ময়েক্তা কয়া খুৎলোইহৌদ্রবা হান্নগী মীরোল অনিমকনা পাবদা হেন্না খুদোংচানবা হায়দুনা বাংলা অমসুং মৈতৈ ময়েক অনীমক্তা পংশাং শাংদবা শৈরেং ওইনা ইবা থেংনৈ। লাইরিক অসিদা অনৌবা মওং অমদা লাইরিক অসিগী ৱাহৌদোক অমসুং কন্তেন্ট হাপ্তে। মসিসু তোঙানবা মহাও অমনি। শৈরেংশিং অসিমকনা ৱাহৌদোকনি অদুগা কন্তেন্ট হায়রগদি লাইরিক অসিমক লোয়বা ফাওবা পাহননিংবা অমদি ফাওহল্লি।

লাইরিক্কী মমিং- তাবীদ্রবা তেংথাখোল (২০১৮)
অইবা- রতন থিয়াম 
অফোঙবাঃ থিয়াম ওংবী দময়ন্তী দেবী 
লাইরিক্কী মখল- শৈরেং
লমায় মশিং- ৫৮
লাইরিক মমলঃ লুপা ১০০ 

তুরেলগুম্না চেন্থরি মীওইবগী পুন্সিনা। অমুক হল্লক্কনি হায়বা কনাসু থাজবা ঙমদে। অমুক্তং পোক্লিবা পুন্সি অসিমক ওন্থোকনা মমল য়াম্না নুংশিনা খনবা, পাম্মুজবা অমদি পুন্সি অমনা হিংলম্মি হায়বসি খঙনবা হোৎনজবা মীওই কয়াসু মলেমসিদা মরাং কায়না অদুমক লৈরি। হিংলম্মি অমসুং লেপ্তনা মলেম তাইবঙপান অসিদা করিগুম্বা য়াইফবা থবক খরদি তৌরমদবা য়াদে খনবা অচংবা মি্রোল কয়াসু লৈতবা নত্তে। মনিপুরবু  মলেমদা ঠিএতরগী লমদা শক্তাক্লিবা, মনিপুর অসিমক মলেমগী ঠিএতরগী মেপ অমদা য়াওহনবা ঙম্লিবা থোইদোকনা শকনাইরবা দাইরেক্তর অমনি রতন থিয়াম। নেস্নেল স্কুল ওফ দ্রমাদা তম্লকখি অদুগা অমুক লেমজনিংঙাই ওইরবা ইন্সতিত্যুট অসিগী চেয়রমেন ফাওবা ওইরম্মি। অঙকপা ফংনা ঠিএতরদা মায় পাক্লবা পর্স্নেললিটি অমনি। দাইরেক্তর ওইবতা নত্তনা হিরম কয়াদা এক্সপরতিজ লৈরবা পোলিমাঠ অমসুনি। অদুনা রতন থিয়াম্না শৈরেং লাইরিক ফোংদোকলকপদা শৈরেংশিংদা য়াওরিবা ৱাহৈশিং, শিজিন্নরিবা সিম্বোল অমদি ইমেজরিশিং অঙকপদা ফজৈ। মনিপুরগী ত্রেদিসন, কলচর অমসুং পুৱারীগী মশকপু মাংহনদনা থম্লগা মোদর্নিতিবুসু লৌশিন্দুনা ফজরবা কলাগী পোত্থোকশিং পুথোক্লকপা লেপত্রি। অসিগুম্বা ঠিএতরগী খোঙচৎ অসিদা অইবা অমা ওইনা থোক্লকলি অঙনবা মতমদগী হৌনা। অইবা মশামক লাই য়েকপনি, দিজাইনরনি। নহা ওইরিঙৈদগী হৌনা শৈরেং ইদুনা পাদুনা লাকই হায়বগী খুদম য়াম্না মরাং কায়না লৈরি। খোরিলোলগী লূপশিংদা য়াওদুনা মনিপুরী লোন অমসুং খোরিলোলদা লেপ্তনা কন্ত্রিব্যুসন পীদুনা লাক্লি। ‘সনাগী থম্বাল,’ ‘তলা পমেল নহাকসু’, ‘মাঙখ্রবা সহরগী লোইখ্রবা ৱারী’ অসিনচিংবা শৈরেংগী লাইরিকশিং লেপ্তনা ফোংদুনা মনিপুরী শৈরেংগী খোঙচৎতা চাওরবা খুদোল তমদুনা লাক্লি। মতমগী অকনবা শহুমদা অহোংবা অওনবা কয়াগী মরক্তা খুনাইগী শক্তমশিং অইবগী থম্মোয় চেবাংদা লাচনবা লেপ্তে। মসিগী ময়েক লারবা মশক অমনি ‘তাবীদ্রবা তেংথাখোল’ মিংথোনবা শৈরেং অসিনা ফোংদোক্লিবসিসু।  শৈরেং লাইরিক অসিমক কবিগী অপোকপীগী মফমদা কত্থোক্লি, ‘ইমাগী নুংশিরবী খূয়া তীর্থদা’ হায়না নুংশিনা। লাইরিক অসিদা পুন্না শৈরেং ২৯ য়াওরি। হৌজীক্কি অনৌবা মীরোল অমসুং মৈতৈ ময়েক্তা কয়া খুৎলোইহৌদ্রবা হান্নগী মীরোল অনিমকনা পাবদা হেন্না খুদোংচানবা হায়দুনা বাংলা অমসুং মৈতৈ ময়েক অনীমক্তা পংশাং শাংদবা শৈরেং ওইনা ইবা থেংনৈ। লাইরিক অসিদা অনৌবা মওং অমদা লাইরিক অসিগী ৱাহৌদোক অমসুং কন্তেন্ট হাপ্তে। মসিসু তোঙানবা মহাও অমনি। শৈরেংশিং অসিমকনা ৱাহৌদোকনি অদুগা কন্তেন্ট হায়রগদি লাইরিক অসিমক লোয়বা ফাওবা পাহননিংবা অমদি ফাওহল্লি। 
লাইরিক্কী হেক অহানবা লমায়দা য়াওরি শৈরেং, “লৈরোল চনলবা মিৎকুপ” অসিমক পুন্সিবু য়েক্লিবা শৈরেংনি। নিংশিংবগী লাতম ময়াম  অমা মরোল মরোল পৈখৎলকপদা করিগুম্বদা মসিনা ৱাখলগী কানুংদা ফুনগৎলকপা, থম্ফম খঙদবা মতাংসু য়াওদবা নত্তে। পুন্সি অসিমক নীংশিংবগী শঙ্গাই অমা ওইরবসু অমুক  অমুক্তংদি থিংজিল্লম্বা ঈশিং দাম থাদোকপগুম থাদোক্তবা য়াদবা মতাংসু য়াওরকই। অদুনা কবিসু তৌফম খঙদনা হায়রক্লি “ খঙদে/ হৌখ্রবা ময়াম অসি/ করম হায়না থুপ্লগা কদায়দা হাপ্লগা থমগদৌরিবা” (লাঃ ২) নীংঙমহৌদবা, পেনখিদবা, কপ্নিংখিবা, শাওনিংখিবা অসিনচিংবা  পুম্নমক পুন্সি কৌবা লীলাগী তাংকক নাইবা শরুক ঙাক্তনি। ৱারবা মিৎকুপশিংদা নুংঙাইবগী আশা তৌবা ঙম্বশিংনা মিস্ত্রি কয়া ফোংনবা হোৎনবা থেংনৈ। তৌইগুম্বসুং পুন্সি অসিদি অসিমনি অদুনি হায়না ৱাহন্থোক পিবদদি লুবনা মতমগী খোঙচত্তা অদুম কাওশিং ওইবা তাই মীওইবনা। ৱাখলগী থোংনাওদি হাংদোক্তবা ইয়ামক য়াদে অশেংবা নুংশিৎ চংলকনবা অমদি পিক্লবা মীওইবগী কোক্কী তুম্বা অসিদা কান্নবসু কান্নদবা ৱাখলসু চয়েৎনদুনা লৈরিবা অসিগী পোৎলূম অসিমক ময়েং তাহ্ন্নবা। অদুনা কবি রতননা হায়রক্লি, “কোফিন মনুংদা হাপ্পা/ অশিবা হকচাং/ লৈরোল চনলি অশিবা মিকুপ/…লোইখ্রবা হনলক্লরোইদবা ৱারী/ অহিংবা চুমদৌনা অমুক/ কোইচৎ চৎলি থোপ অসিদা/ থোঙনাও মচা অমা হাংদোকনিংই/ ফুনগৎপা ময়াম অমা কোকনবা” (লাঃ ২)
ফজরবা ইমেজরি অমদা পুন্সি খোঙচৎপু প্রেসি রাইতিংগুম্না মচং ওইবা খরদং য়াম্না তেন্না সিনেমাতিক ইফেক্ট অমদা ইরকপা শৈরেং অমনি, “অশাংবা ৱারীগী অতেনবা পাউদম” ঈশিং গ্লাস অহাঙবা অমা/ চুরুপ মতেক ময়াম্না থনবা এসট্রে অমা/ চা থক্তোকখ্রবা কপ অমা/ এন্টিবায়োটিক খরা/ পেইন কিলর খরা।/ শীন-নম নম্বা কা অমা।/ লাইরিক অমনবা খরা/ শুদবা কুইরবা মোপাক ফিদক/ ফক্লাংদা চৎতবা ঘড়ি/ লৈকাং চারবা ফোটো অমদা নুপী অমা/ হাকুম চহীগী কেলেন্দরদা দিসেম্বর।/ অথাবা আনোক মনুংদগী মানা য়েংলকই” (লাঃ ৪৪) ঈশিং গ্লাস অহাংবা অসিমক ভেল্যু লৈশিল্লক্ত্রবা মশক অমা ফোংদোক্লি। অনাবনা  হকচাংগী কয়াৎ খুদিংদা মিকারকপা মতম, লুবা নানবা কয়া থৌওইরক্তবা, কম্লাক কুরু শুংলকপা অহল  মতম ওইশিল্লকপগী পীকচর অমদি ময়েক শেংনা ইমেজরি খরসিদা মপুং ফনা ফোংদোকপা ঙম্লে। কবি রতন থিয়ামগী লীলাশিংদসু অসিগুম্বা দাইলোগ অমনা, কোসত্যুম খরনা য়াম্না লায়না ফোংদোক্লিবা ৱারোল পূম্নমক য়েংলিবা তারিবা পারিবা মীওইশিংদা ফোংদোকপা ঙম্বগী হৈশিংবা অদুমক শৈরেং অসিদসু থেংনৈ। পুন্সি য়াচংলকপা মতমদা থেংনরিবা থৌদোকশিং, মিৎকুপশিং হকুম চহীগী কেলেন্দরদা দিসেম্বর হায়না ফোংদোক্লিবা অসিমকনা অদুমক লোয়না ফোংদোকপা ঙম্লে খল্লি। য়াম্না চংখোন্না তেংথাবা শৈরেং অমনি হায়নিংই।  

 
পান্দম খরদি ফংনবা হোৎনরিবা মীওইবগী পুন্সিনি। পনথুং অদুতং ঙাইদুনসু লৈনদে। মানা মানা ঙমজবা মওংদা হিংনবা হোৎনরি তাইবঙনা। পাম্মু পাম্মুনা কায়নখিগদবা ঙাক্তনি। নুংশি নুংশিনা তাম্নখিগনি অমুক্তং লাকপা তাইবঙ খোঙচৎ  অসিমক। অদুবু থৱায়না লৈরিঙৈ, লৌশিংনা মাংদ্রিঙৈদদি খনগনু হায়বা য়ারোই থৱায়না খোইদাজবা কনাবুদি। হিংলিবসি মখোয় অদুগী নুংশিবা আশাদনি। চৎখিবদি য়াই তাইবঙ তোর্ব্বান্দ ৱাংমদা অদুবু নীংশিংবনদি হিংদুনা লৈহল্লি মিৎকুপশিং। অদুনা কবিনা ইরক্লি “ নোংলিক অমদি নঙ”। য়াম্না তেনবা শৈরেংনি অদুবু য়াম্না নুংশিবা শৈরেং অমদি ওইরি। “অপাবা ইন্নফি মরুমদা/ নুমিৎ অসে লোৎখ্রে/ অদুবু লৈনম্না শীনবা থুংবা/ লৈহাউ লৈরেন পাম্বীশিংগী উমংদা/ ঐগী উরাশিংনা লৈনুংদা/ মাংখ্রবা ঈশিং থিরি।/ কৌগনি করম হায়না/ নোংগী ঈশৈ শক্তুনা/ নোংলিক অমদি নঙবু পুন্না” (লাঃ ৮) 
লাইজ লৈত্রবা ইয়োক কোমদা করম্বা লেম্লৈনা কয়াম কুইনা হিংদুনা মনিং তম্না চেন-চোংদুনা শান্নজবা ঙমগনি। তাইবঙপান অসিবু শেম্লিবা মপু মহাকনদি খঙই মলেম অসিদা লৈরিবা অচৎ চত্তা লেংলি পাল্লিবা পুম্নমক পুংবা শেৎনবা খায়নবা য়াদে। চেক্লাশিংনা মালংগা লেংগোন্নরি। লেম্লৈনা লাইজগা লোয়নরি। তাইবঙ পুন্সিসু অদুমঙাই। ঙাগী ইমেজরি ওইনা পুশিল্লক্লিবা তাইবঙ পুন্সিগী মশক অমদি অতেনবা শৈরেংসিদা নীংথিজনা ফোংদোকপা থেংনৈ। “ঙা অদুগী থৱায়” ফিদ্রিং ফিদ্রিং চোংলম্বা ঙাদু লেঙখিদ্রে/ থৱায়বু থিরি।/ য়েনথৌ মপালদৌনা নুংশিৎতা পাইদুনা/ য়েনথৌ মপালদৌনা নুংশিৎতা পাইদুনা/ অমমমতা কেনখিবা ৱাখলগী মফোন/ মায়দা য়াৎপা মমি ময়াম ওন্থোরকই।/ আনোককী মিংশেলদা য়াওরকই চহী/ লৈচীল থাবা হেনগৎলকই/ মায়গী ময়িশিংগা শান্নমিন্নবদা/ মাইনসতগী প্লস ওন্থোকখি।/ নুংঙাইবা থৱায় হিংলম্বনী/ ঈশিংদা ঈরোইদুনা শান্নরম্বনী/ ঙাদু লেংখিদবা কুইরে। (লাঃ ৪৬)
মিংথোল ওইরিবা শৈরেং “তাবীদ্রবা তেংথাখোল” না হৌজীক্কী মতমদা পুন্সি অসিবু ভেল্যু লৈতনা মরু ওইনা য়ুম্বাল লম্বী অসিমক লাইধি শান্নবগুম্না লৌনরকপা মতৌ অসিদা মিৎয়েং থমদুনা ইরকপা শৈরেংনি। করিসু খঙজদ্রিবা অঙাং নৱা অমখক পোকপদা ঙাইরিঙৈদা মীনুংশি হৈতনা লাইয়েংশঙগী অপুম অশা মরক্তা হুন্দোকলম্বা অমসুং পিক্লিবা অঙাং অদুনা নুংশিরবা মমাবু কৌদুনা মরোল শুজদ্রিবা ওইরবসু তেংথাবগী শক্তম অদু ময়েক লানা লাচল্লি। অদুনা কৌরক্লি “ইমা!/ ঐ য়াম্না ঈংঙে।/ খোইরি লীনশাং ককপদা ঙাইরিবা/ পিক্লবা ইমিৎসিনা তাইবংপান অসিবু ইবফাওবা ফংজদ্রিবা/ হংঙা হংঙা হায়না নঙবু কৌজবা ফংবগী হরাউজবদু য়েংনিংদদুনা ঐবু/ নঙনা ঈংলবা নীংথমথাগী নোংঙাল্লমদাইসিদা/ হোসপিতালগী অপুম্বা নমথীরবা ফত্তা হৌদি মরকসিদা/ হুন্দোক্তুনা থম্বীরম্লে।” (লাঃ ৪০) মিংথোল ওইরিবা শৈরেং অসিমক লাইরিক অসিদা য়াওরিবা অতৈ শৈরেংদগী খরা হেন্না শাংনা ইবা থেংনৈ। শিজিন্নরিবা ৱাহৈ তেংথারোলনি। ৱাখল খনবদি মাল্লগা ৱাখল য়াওদবা মমা মপা ওইনিংলিবশিংদা পাউজেল অমদি পীরি পুন্সিবু লুনা নুংশিনা খন্নবা মতম লৈবা খুদিংদা। শৈরেং অসিনা ঙসিগী খুনাইদা নুপা নুপীশিংনা তাইবঙ পুন্সিবু লায়না লৌদনবা নুংশিবা অঙাং নৱা অমগী মশক লৌদুনা খোন্থোক শুদনা পাউমেল্লি। 
চেঙ লৈরিমখৈদি হিংগনি মীওইবনা। মসিদা চেঙ অসিমক পুন্সিগী সিম্বোল ওইনা পুশিল্লকতুনা শৈথারি। করিগুম্বা মতমদা হীংবসি পোৎলূম অমগুম খল্লকপা মতাং য়াওদবা নত্তে মীওই খুদিংগী পুন্সিগী তাংককশিংদা। হীংনিংবগী আশা অদু ময়েং তাবা মিৎকুপশিংদদি ইখৌ লাংলি চেং মরু অমত্তং। হাপ্নিংলি চেঙ মেরুক অমত্তংসু অদুনা নকোইননা হায়রক্লি চেঙ মেরুক অমত্তং হায়না মিংথোনবা শৈরেং অসিদা  “অমমমতা ওইনা চেকশিন্না তুংশিনখিবা/ চহী কয়া চঙনা অমনবা নীংশিং মমি/ ঙসিদি য়োমশীনলগা লংথোকখ্রে।/ থোঙ হাংদোক্লে/ মঙালনা খাকনা নোক্লগা চঙলকই/ মিৎ পাঙথোকপা ঙমদে।/ চীনবান কংখিবা কুইরে/ কুরোল খরতা ঙাইহৌরে/ ৱা হায়বা ঙমদে।/ অনীকপা খূকউ অশোনবা কমলাক/ হৌগৎতুনা লৌশীনবা ঙমদে/ অনৌবা মতমগী চেঙ খরদুফাওবা।/ ঐগী থুমোক মচা অসিদী। চেঙ মেরুক অমফাওবা য়াওদ্রে”  (লাঃ ৫২
লাইরিক অসিদা য়াওরিবা শৈরেং অয়াম্বা মরু চংলবা ফৌদিগুম্না চংখোল্লি। খোরিলোলগী পুক্কৈদা লাক্কদবা কুমজাশিংদা শৈরেংবু নুংশিজবা কয়াদা কবি রতনগী শৈরেংশিংনা চাওনা ইথিল পিবা ঙমগনি হায়না চেৎনা থাজৈ। 

• ট্যাগ:
• রতন থিয়াম
• তোংব্রম অমরজিৎ