মীতৈ ময়েকপু অতোপ্পা মমিং অমদা হোংদোকপীগনু: মীলাল
ইম্ফাল, আগস্ট ২২
মীতৈ ময়েকপু মণিপুর স্কৃপ্ট হায়বনা হেন্না চুমগনি হায়বা অনৌবা ৱাখল্লোন অমা থোরক্লি হায়রদুনা ৱাখল্লোন অসিগা ইরোয়ননা মীতৈ ময়েকপু মণিপুরী স্কৃপ্ট হায়রবদি মণিপুরদা খুন্দারিবা ফুরুপ কাঙলূপ খুদিংগী মরক্তা হেন্না নুংশি চান্নবা, পূম্নমকপু কোনশিনবা মীনুংশি অমদি থৌজালগী ওইবা অচৌবা থবক অমা পাঙথোকপা ঙমগনি খনবা মীওই অমদি লুচিংবা কয়াসু লৈরি হায়না মীতৈ ইরোল ইয়েক লোয়নশিল্লোন অপূনবা লূপ (মীলাল), কংলৈপাক্কী সেক্রেটারি জেনারেল ইন-চার্জ নাওরেম নোংমাইলেম্বী লৈমনা থোরকপা চেরোল অমনা হায়রি।
চেরোল অসিনা মখা তানা হায়, ঐখোয়গী ইরমদমসিগী মমিং মণিপুর হায়না কৌরিবা অসি লমদমসিদা খুন্দারিবা য়েলহৌ ফুরুপ অমত্তগী ওইবা লোল নত্তে হায়বদি মীতোপকী মীরোলনি, লোলয়াননি। ইরমদমগী মমিং অসি পুৱারীগী তাঙ্কক অমদা মণিপুর হায়না থোনখিবদগী ঙসি ফাওবা মরম কয়ানা হোংদোকপা ঙমদনা লৈরিবা অসিদা নুংনাংজবা ইরোলদা ইরমদমগী মমিং থোনবা পাম্বা মীওই কয়াসু লৈরি হায়রি।
মলেমগী লোল অমা ওইরিবা ইংলিস লোলগী ইন্নরিবা ময়েক অসি রোমান স্কৃ্টি হায়না খঙনরিবা ইন্টারনেসনেল স্কৃপ্ট নৎত্রগা য়ুনিভার্সেল স্কৃপ্ট হায়নদি কৌনদে অমসুং খঙনদে। হিন্দি লোলগী ময়েকপু দেবনগরি স্কৃপ্ট হায়না খঙনরি। ময়েক্কী অশেংবা অচুম্বা হৌরকফমগী পুৱারী ময়েক শেংনা থম্নরি। মতৌ অসুম্না মীতৈ ময়েক অমদি মীতৈলোলগী অশেংবা অচুম্বা পুৱারী লেঙদনা থম্ফম থোকই হায়না মীলালনা খল্লি হায়রি।
মণিপুর লৈঙাক্না কুমজা ২০২১ গী মার্চ ৪দা থোকখিবা নোটিফিকেসন অমদা মণিপুর লেঙ্গুয়েজ (এমেন্দমেন্ট এক্ট ২০২১ নম্বর, ৭ ওফ ২০২১) দা মণিপুর লেঙ্গুয়েজ হায়বদি মীতৈ ময়েক্না ইবা মীতৈ লোল হায়বসিনি। মসি মণিপুরগী মশীং য়াম্বা মীওইশিংনা ঙাঙনবা লোলনি হায়নসু পল্লি। মরম অসিনা মীতৈলোল অমদি মীতৈ ময়েক্কী অশেংবা মশক অমদি পুৱারীবু কায়থহন্দনা থম্বা হায়বা মীলালগী ৱাফম অসি লৈবাক্কী অখঙ অহৈশিংনু শৌগৎপীফম থোকই।
ইরমদমসিদা খুন্দারিবা ফুরুপ খুদিংগী মীওইশিংনসু মীতৈলোল অমদি মীতৈ ময়েকপু চাওখৎহন্ননবা অঙম্বা মতেং পাংবীয়ু। মীতৈ ময়েক অমদি মীতৈলোল হায়বসিসু ইরমদমদা লৈরিবা ঐখোয় খুদিংগী লোলনি, ঐখোয় খুদিংগী ইরলনি। কাংলূপ ফুরুপ কয়াগী লৈরিবা নাৎ, চৎনবী, ফিজেৎ চাকচা অসিসু ইরমদমদা খুন্দারিবা ঐখোয় ফুরুপ পূম্নমক্কী লেঙদ্রবা লননি হায়বগা লোয়ননা ঐখোয়গী ময়েক অসি মীতৈ ময়েক হায়বসি নত্তনা অতোপ্পা মমিং অমদা হোংদোকপীগনু হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু