মৈতৈ পূং তম্বা লাকপা থাইলেন্দ মচাশিংনা লাইনিংথৌ সনামহী লাইশঙ কাদুনা খুরুমজখ্রে
ইম্ফাল, ওক্তোবর ১৭ : চহী লীশীং ২ হেনবগী পুৱারী লৈজবা মৈতৈগী সিবিলাইজেসনগা লোয়নদুনা লাক্লবা মৈতৈ লাইনীং (সনামহী লাইনীং) দা নত্তনা লমদম অসিগী কালচার, নাৎ, চৎনবীবু মালেমগী তোঙান-তোঙানবা লৈবাক্কী মীশিংনা অৱাংবা থাক্তা ইকায় খুম্নবীরি। মসিবু হেন্না চুমহনবা ওইনা এম য়ু সি (মণিপুর য়ুনিবার্সিটি ওব কালচার) দা মৈতৈ পূং তম্বা লাকখিবা থাইলেন্দগী দেলিগেতশিংনা ঙসি হয়িং খোংবান উফোং য়ূম্ফমদা লৈবা লাইনিংথৌ সনামহীগী লাইশঙদা কাদুনা লাইনিংথৌ সনামহী অমসুং ইমা লৈমরেল শিদবী অনীবু খুরমদুনা থৌনিজখ্রে।
ঙসি নুংথিল এম য়ু সি গী ভাইস চ্যাঞ্জেল্লর পাওনম গুনিন্দ্রোন লমজিংদুনা য়ুনিভার্সিতি অসিদা মৈতৈ পূং তম্বা লাকখিবা থাইলেন্দগী মহৈরোয় য়াওবা দেলিগেত অমনা ইম্ফালগী হয়িং খোংবান উফোং য়ূম্ফমদা লৈবা লাইনিংথৌ সনামহীগী লাইশঙদা লাক্তুনা লাইনিংথৌ সনামহী অমসুং ইমা লৈমরেল শিদবী অনীগী মফমদা পূং-ঈশৈগী থৌগল তৌবদা শরুক য়াখি। মসিদা নত্তনা মৈতৈগী য়েক-সলাই ৭ কী পুশিংগী খূবমদা হৈকৎ-লৈকৎসু তম্লমখি।
অমরোমদা, থাইলেন্দদগী লাকখিবা দেলিগেতশিং অদুনা মৈতৈ লাইনীং অমসুং লমদম অসিগী নাৎ, কালচর অমদি চৎনবীবু ইকায় খুম্নবা উৎলম্বদা এল এস তি বি (লাইনিংথৌ সনামহী তেম্পল বোর্দ) কী মায়কৈদগী অপেনবা ফোঙদোক্তুনা থাইলেন্দগী দেলিগেতশিং অদুবু অচম্বা খূদোলপোৎ তমদুনা তরাম্না ওকখি।
এল এস তি বিগী ভাইস প্রেসিদেন্ত বিদ্যাপতি সেঞ্জাম (ৱাখল লমজিংবা) না হায়, মণিপুর অসি তরায়বা লমদম অমা নত্তে। চহী লীশীং কয়াগী পুৱারী লৈজবা লমদম অসিগী নাৎ, কালচার, লাইনীং পূম্নমক অমত্তা ৱাৎতনা লৈজরি। ঐখোয়গী মমল নাইদ্রবা কালচারগী পূক্কৈ অসিবু মালৈমগী মীয়াম্না শীংথানরি অমদি থাক ৱাংনসু লৌবিরি। ঐখোয়গী চহী লীশীং কয়াগী সিবিলাইজেসন অসিগা লোয়নরক্লিবা লাইনীং অসি ঐখোয় পূৱারী তাঙ্কক অমদা লাকখিবা শাফূনা মিরাইবগুম লৈরুরে। অদুবু ঙসিদি ঐখোয়গী মীয়াম্না ৱাখল তারক্তুনা হান্নগী ইশাগী লাইনীংদা হঞ্জিল্লক্তুনা অচুম্বা মায়কৈদা লাকপা উরক্লি। মসিমক ঐখোয় পূম্নমক্কী নুং ঙাইবা মীকূপনি।
লমদম অসিগী কালচারগী পূক্কৈ অসি মমল নাইদ্রবা ঐখৈায়গী লননি। ইনাক খুল্লবা ঐখোয়গী কালচার অসিবু মালেমগী মীয়াম্না খঙনরক্লি অমসুং ইকায় খুম্নবিরক্লি। মসিগী মনুং দা মৈতৈ পূং অসিসু ঐখোয়গী কালচারগী মমল নাইদ্রবা লন অমনি। মালেমগী মফম খুদীংমক্তা পূং, দ্রাম থেংনরি। অদুবু মৈতৈ পূংগী খোন্থোক অমদি তাল অসিদি তোপ-তোপ্পনি। মসিবু মশক খঙবিদুনা থাইলেন্দদগী মহৈরোয়শিং গী তিম অমা লমদমসিদা লাক্তুনা মৈতৈ পূং তম্বা লাকপা অসিমক ঐখোয়গী চাউথোকনিংঙাইনি। মসিদা নত্তনা থাইলেন্দগী দেলিগেতশিং অসিনা মৈতৈ লাইনীংবুসু অৱাংবা থাক্তা ইকায় খুম্নবা উৎপিবা অসিগীদমকসু বোর্দ অসিনা অদুক্কী মতীক অপেনবা পোকচৈ।
অসিগুম্বা মমল য়াম্লবা কলা অসিগী মগুণবু মালেমগী অতোপ্পা লৈবাকশিংদগী লাক্লিবা মীশিংদা মশক তাকপীরিবা মণিপুর য়ুনিবার্সিতি ওব কালচার মরু ওইনা য়ুনিবার্সিতি অসিগী ভাইস চ্যাঞ্চেল্লর পাওনম গুনিন্দ্রোবু বোর্দ অসিনা হায়নিংঙাই লৈতনা থাগৎলি। হন্দক্কী খোঙথাং অসিনা সাউথ ইস্ত এসিয়াগী লৈবাকশিংদা মণিপুরগী নাৎ , কালচার অমসুং লাইনীংবু মশক তাকপগী খুদোংচাবা অমা ফং হল্লে। অসিগুম্বা খোঙথাং মখা তানা য়ুনিবার্সিতি অসিনা লৌখৎপীদুনা মালেমগী লৈবাক পূম্বদা ইন্দিয়াগী অৱাং নোংপোক কাচিনদা লৈরিবা মণিপুরগী অৱাংবা কালচার, নাৎ, চৎনবী অমসুং লাইনীংবু মশক তাক্তুনা হেন্না চাওখৎহনবদা থৌদাং লৌরক্কনি খল্লি। মসিনা সাউথ ইস্ত এসিয়া অমসুং ইন্দিয়াগী অৱাং নোংপোক লমদমশিংগঅ মরী হৈন্না চেৎশিনহনবদা নৎতনা অমসুং রিজন অসিগী তোপ-তোপ্পা কালচার, নাৎ অমসুং চৎনবীবু মালেমদা হেন্না মশক তাকপা ঙম্বা ওইরসনু হায়না হায়না বিদ্যাপতি সেঞ্জম্না মখা তানা ফোঙদোকখি।
এম য়ু সিগী দিপার্তমেন্ত ওব পূংগী ওজা মাইরেনবম মণিতোন্না হায়, মৈতৈ পূং অসি অদুক্কী মতীক পাক চাওই। চহী ১০ তম্বদা লোইবা নাইদে হায়দুনা ওজা গুরুশিংনা হায়নরি। মসিমক তশেংনা অচুম্বমক্নি। মপালগী লৈবাকশিংদগী মৈতৈ পূং অসি তম্নিংবা পোক্তুনা লমদমসিদা লাক্লিবা অসি ঐখোয়গী চাওথোকচনিংঙাইনি। ঐখোয়গী নাৎ, চৎনবী কালচারগী পূক্কৈশিং অমসুং লাইনীংবু ইকায় খুম্নবিবা অসিমক লমদম অসিগী লাইবক ফবনি। ইশামকসু কলা মখল অসিগী ওজা অমা ওইনা থম্মোয় শেংনা লাক্লিবা দেলিগেতশিং অসিদা ময়েক শেংনা তাকথোক্নবা হোৎনগনি।
অদুবু অকক্নবা মতম খরনি অসিদা মৈতৈ পূংগী পূংলোন, তাল, খোন্থোকশুপ্না তাকপদি ওইথোক্তবনি। মসিমক ওইরবসু মখোয়দা হেক য়ারিবমখৈ খঙহন্নবা অঙম্বা থাক্তা হোৎনগনি। মখা তানা অসিগুম্বা প্রোগ্রাম চত্থরকপদা থম্মোয় শেংনা শৌগৎতুনা লমদম অসিগী কালচারগী পূক্কৈ মরু ওইনা মৈতৈ পূংবু মালৈমদা খঙহন্নবা অমসুং হেন্না চাওখৎনবা হোৎনবদা থৌদাং লৌনিংই হায়নসু ফোঙদোকখি।
ঙসি লাইনিংথৌ সনামহীবু খুরুম্বা লাকখিবা থাইলেন্দগী দেলিগেতশিং অদুদা য়ুনিবার্সিতি কাউন্সিল, থাইলেন্দগী চেয়ারমেন দাঃ তানোম ইন্তরাকুমনর্দ, সুরিন্দ্রা রাজভাৎ য়ুনিবার্সিতিগী দিপার্তমেন্ত ওব হ্যুমেনিতিজ এন্দ সোসিয়েল সাইন্সেসগী ফেকালতি জামনোং জুংখিয়ু, ফনাখোন রাজভাৎ য়ুনিবার্সিতি, থাইলেন্দগী লেকচরার প্রভিত খাওপ্লুইম, ফনাখোন য়ুনিভার্সিটিগী ম্যুজিক দিপার্তমেন্তগী হেদ অসাদং দেজরোদতা নত্তনা কালচারগী লমদা মহৈ তম্লিবা মহৈরোয় ৫ সু য়াওরকখি।
এল এস তি বিগী মেম্বার সেক্রেটারি সিবদত্ত লুৱাং য়াওনা বোর্দ অসিগী মরু ওইবা থৌমীশিংনা থাইলেন্দগী দেলিগেতশিং অদুবু তরাম্না ওকপগা লোয়ননা চাকলেন অমসু পূন্না চামিন্নদুনা মৈতৈগী চাকচা-য়ুথক, থকশি-খাশিনচিংবা চৎনরোলশিং দেলিগেতশিং অদুদা ঊৎতুন খঙহনখি।
সোর্স: পোক্নফম
0 কমেন্ট:
কমেন্ট তৌবিয়ু