মালেমগী থাঙ-তা নুমিৎ পাঙথোকখ্রে
ইম্ফাল, মার্চ ১২ : মণিপুরনা য়ূম্বু ওইদুনা তোঙান তোঙানবা লৈবাক মঙা-নেপাল, বাংলাদেশ, মালেশিয়া, য়ুনাইটেদ কিংদম অমদি ইন্দিয়া য়াওনা ২০১১ গী মার্চকী ১১দগী ১৪ ফাওবা পাঙথোকখিবা অহানবা ৱার্ল্ড থাঙ-তা চেম্পিয়নশিপপু নীংশিংবা ওইনা হুয়েল লাংলোন থাঙ-তা এসোসিয়েসন মণিপুর, থাঙ-তা ফেদারেসন ওফ ইন্দিয়া, এসিয়ান থাঙ-তা ফেদারেসন অমদি ৱার্ল্ড থাঙ-তা ফেদারেসনগা পূন্না খূৎশম্নদুনা মালেমগী থাঙ-তা নুমিৎ (ৱার্ল্ড থাঙ-তা দে) ইম্ফাল ওয়েষ্টকী য়ুম্নাম হুইদ্রোমদা লৈবা থাঙ-তা শঙলেন্দা থাংজ নুমিৎতা পাঙথোকখ্রে।
নুমিৎ অসিগা মরী লৈননা থাঙতাগী লমদা হৈথোই-শিংথোইরবদা পীবা অহানবা শিন্তাকপুরেল সনাহল এৱার্দ ২০২৩ ইষ্টার্ন কলা বিদ্যা থাঙ-তা এসোসিয়েসন নোংমৈবুংগী প্রিন্সিপাল কাম দিরেক্টরসু ওইরিবা শিক্তাকপুরেল খোইস্নাম ধবলো খাবদা খূৎশিন্নখি। থৌরমগী মনুং চন্না শিন্তাকপুরেল সনাহলগী ফোটোদা লৈ-শু কৎতুনা ইকাই খুম্নবা উৎখি।
থৌরম অদুদা ৱাঙ্গোইগী এমএলএ খুরাইজম লোকেননা অথোইবা মীথুংলেন, ৱার্ল্ড থাঙ-তা ফেদারেসনগী প্রেসিদেন্ট হুইদ্রোম প্রেমকুমারনা থৌরম মপু অদুগা থাঙ-তা ফেদারেসন ওফ ইন্দিয়াগী হান্নগী সেক্রেটারি থৌনাওজম প্রিয়োকুমার অমদি শিন্তাকপুরেল সনাহলগী মশুনুপা আর কে দিলিপনা অখন্নবা মীথুংলেনশিং ওইনা শরুক য়াখি।
থৌরম অদুদা এসিয়ান অমদি ৱার্ল্ড থাঙ-তা ফেদারেসন, হুয়েল লাংলোন থাঙ-তা এসোসিয়েসন মণিপুর অমদি ইন্দিয়াগী ওফিসেলশিং অমদি শান্নরোয়শিংসু শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু