• 629
• ২২শে অক্টোবর ২০২৩ ইং
• Share on:

মণিপুরী শৈরেং নুমিৎ পাঙথোকপীয়ু হায়ান ফিক্সন এন্দ পোইট্রি ক্লবনা আপিল তৌরক্লি

ইম্ফাল, ওক্তোবর ২০ :মণিপুরী লোলগী লাইওইখ্রবা কবিশিংবু ইকাইখুম্নবা উৎপা, মণিপুরী শৈরেংবু মীয়ামগী ওইহন্নবা পান্দম থশ্বা অমদি মণিপুরী শৈরেংবু মালেমগী ফম্বাক্তা পুখৎনবা হোৎনবা হায়বশিং অসিদা মীৎয়েং থম্লদুনা চহী খূদিংগী মেরাগী থানিন (পূর্ণিমা) নুমিত্তা পাঙথোক্লিবা ‘মণিপুরী শৈরেং নুমিৎ’ কী চৎলিবা চহী কুমজা ২০২৩ অসিগী ওইনা লাক্লিবা ওক্টোবরগী তাং ২৮, থাংজ নুমিত্তা পাঙথোক্লগনি।

থৌরম অসি মণিপুরদা লৈবিরিবা সাহিত্যগী লুপশিং, স্কুলশিং, কোলেজশিং, য়ুনিভার্সিটিশিং, খুন্নাইগী লূপশিংনা অমদি মণিপুরগী মপান্দা লৈরিবা মণিপুরীশিংনসু পাঙথোকপিয়ু হায়না ফিক্সন এন্দ পোইট্রি ক্লাব, মণিপুরগী মায়ৈকদগী লৈবাক মীয়ামদা আপিল তৌরক্লি।

ক্লাব অসিনা থাদোরকপা চেরোল অমনা, হৌজিক লৈবাক্কী ওইরিবা ফীভম অসিদা ‘মণিপুরী শৈরেং নুমিৎ’ পাঙথোক্তুনা মণিপুরী অইবশিংগী পূক্নিংদা মমা লৈবাক ওইরিবা মণিপুরগী মতাংদা-মরমদা করি খল্লিবগে হায়বসি অমুক্তংগা খন্থবগী মতম চারে হায়না লৌজৈ। ‘অইবশিংগী থম্মোয় লায়ুমদা মণিপুর’ হায়বা হীরমসি (থিম) দা হন্দক্কী ‘মণিপুরী শৈরেং নুমিৎ’ পাঙথোক্নবা ক্লব অসিনা ৱারেপ্নজবগা লোয়ননা থৌরম অসি লৈবাক মীয়াম অমসুং শৈরেংবু নুংশিবিবা পূম্নমক্না পাঙথোকমিন্নসি অমসুং শরুক য়ামিন্নসি হায়নসু ফোঙদোরক্লি।

ক্লাব অসিনা থাদোরকপা চেরোল অমনা মখা তানা, চহী অসিগী ওইনা লাক্লিবা মেরাগী থানিন, ওক্টোবরগী তাং ২৮, থাংজ নুমিত্তা পাঙথোক্কদৌরিবা ‘মণিপুরী শৈরেং নুমিৎ’ নুমিৎ অসিগী মপূং ওইবা থৌরমদি ক্লাব অসিগা জে এন মণিপুর দান্স একাদেমিগা খূৎশশ্নদুনা একাদেমিগী ওদিটোরিয়ামদা পাঙথোক্কনি। থৌরম অসিদা ‘মহাকবি অঙাংহল শৈরেং মনা ২০২৩’ অইবী অরাম্বম ওংবী মেমচৌবদা মহাক্কী শৈরেংগী লাইরিক ‘থামম্বা অহীং’ গীদমক লান্থোক্কনি। মসিগা লোয়ননা মণিপুরী লোলগী শক্নাইরবা অশৈবা অহুম য়েংখোম বিহারি (ককচিং), আই এস কাঙজম (ইম্ফাল) অমসুং খাঙেম্বম ইবেতোন (বিষ্ণুপুর) বু ইকাইখুম্নবা উৎপা, শৈরৈং শৈদিন্নবনচিংবা থৌরম কয়াসু পাঙথোক্কনি হায়না খঙহল্লক্লি।

ক্লাব অসিনা মখা তানা, চহী খূদিংগী মেরাগী থানিল (পূর্ণিমা) পাঙথোক্লিবা ‘মণিপুরী শৈরেং নুমিৎ’ ইহান হানবা ওইনা কুমজা ২০১৭ তা পাঙথোকপা হৌরকখিবনি। হৌদোকপা চহী অসিদা থৌরম অসি ইম্ফাল অমসুং লক্ষীপুর (নহারোল খোরিল্লোল সিল্লূপনা শীন্দুনা) দা মায় পাক্না পাঙথোকখি। মসিগী মখা তারকপা চহীশিংদদি থৌরম অসি মণিপুর মনুংদনা জিরিবাম, ককচিং য়াওনা মণিপুরগী তোঙান-তোঙানবা মফমশিংগী সাহিত্যগী লূপশিংনা পাঙথোকপিদুনা লাক্লি।

থৌরম অসি ইন্দিয়াগী তোঙান-তোঙানবা মফমশিং খূদম ওইনা নিউ দিল্লী, গুয়াহাটি (আসাম), কোলকতা (ওয়েষ্ট বেঙ্গল), লক্ষীপুর (শিলচর, আসাম), আগরতলা (ত্রিপুরা), দিমাপুর (নাগালেন্দ) নচিংবদসু পাঙথোকখি। থৌরম অসি ইন্দিয়াগী তোঙান-তোঙানবা ষ্টেটশিংদা মপূং ফানা পাঙথোকপদা নত্তনা কানাডাদা খুন্দাদুনা, থবক-ইনখাং তৌদুনা অমদি মহৈ মশিং তমদুনা লৈরিবা মণিপুরীশিংনসু মখোয়না ঙমজবা থাক অমদা পাঙথোক্তুনা মণিপুরী তাবা মালেমগী লৈবাক পূম্বদা শন্দোকখ্রবা অচৌবা থৌরম অমা হায়বদু ওইরবনি হায়নসু ফোঙদোরক্লি।

চেরোল অসিনা মখা তানা, ঐখোয়গী লাইওইখ্রবা কবিশিংনা শেমগৎপিরম্বা মণিপুরী শৈরেংগী শাংলবা লীক্লম অমা লৈজরি। অদুবু ঙসিগী মালেমগী শৈরেংগী ফম্বাক্তা মশাগী চপ চাবা ফিদা অমা ফংদুনা লৈজরবা ঐখৈায়গী শৈরেংগী লীক্লম, শৈরেংগী কলা অসি মীয়াম হূপ্না পাম্না লৌনবগী মহুত্তা কলা অসিদা লূপচবা মীওই খরদংগী ওইদুনা দিকেদ কয়া চত্থদুনা লাক্লি। মণিপুরী লোলগী লাইওইখ্রবা কবিশিংবু ইকাইখুম্নবা উৎপা, শৈরেংবু থম্মোয়নুংদা ঈরাৎচবা, মণিপুরী শৈরেংবু মীয়ামগী ওইহন্নবা অমদি মীওইবা পূম্বগী থাদোক্নবা অমদি মীওইবা পূম্বগী থাদোক্নবা য়াদ্রবা পুন্সিগী শরুক অমা ওইহন্নবা পান্দম থম্বগা লোয়ননা মণিপুরী শৈরেংবু মালেমগী ফম্বাক্তা পূখৎনবা হোৎনবা হায়বসিদা মীৎয়েং থমদুনা শৈরেংবু নুংশিজবা, পামজবা ফিক্সন এন্দ পোইট্রি ক্লাব, মণিপুরনা হৌদোকচরিবা ‘মণিপুরী শৈরেং নুমিৎ’ থৌরম অসি মালেমসিগী মফম অমদা লৈরিবা মণিপুরী ইচীন-ইনাও খ্বাই খিবিক্না মখোয় মখোয়না ঙমজবা শক্লোন অমদা পাক শন্না পাঙথোকমিন্নদুনা মণিপুরী শৈরেংগী মগুণ হেলহল্লসি হায়না নোল্লুক্না পাউজঞ্জেরি হায়নসু ফোঙদোরক্লি।

সোর্স: সঙাই এক্সপ্রেস