মণিপুরী কিহোম দুবাইদা য়োনবা হৌখে
ইম্ফাল, সেপ্টেম্বর ৩ : মণিপুরগী কিহোম দুবাইগী সুপার মার্কেট খরদা ‘প্রোডাক্ট ওব মণিপুর’ হায়বা টেগ নৎত্রগা লেবেল অসিগী মখাদা ঙসিদগী য়োনবা হৌখ্রে। ইম্ফালগী সঞ্জেন্থোংদা লৈবা ওর্গানিক আউটলেটতগী ওনলাইনগী খুত্থাংদা দুবাইগী সুপারমার্কেট খরদা মণিপুরগী কিহোম য়োনবা হৌদোকপগী থৌরম অদুদা এডিসনেল চীফ সেক্রেটারি (হোর্টিকালচার এন্ড সোইল কঞ্জার্বেসন) পি ৱাইফৈ অমদি অতৈ অফিসারসিং শরুক য়াখি।
থৌরম লোইরবা মতুংদা পি ৱাইফৈনা পাউমীশিংদা হায়, লুলূ গ্রুপ ইন্টারনেসনেল কৌবা কোম্পানি অমনা দুবাইদা হাংবা মখোয়গী সুপারমার্কেটশিংদা মণিপুরগী কিহোমশিং অসি য়োনবা হৌবনি। থায়োং ফার্মার প্রডুসার কোম্পানি লিমিটেডনা লৌমীশিংদগী খোমজিনবা কিহোমশিং ডাইরেক্টোরেট ওফ হোর্টিকালচার এন্ড সোইল কঞ্জার্বেসন, মণিপুর ওর্গানিক মিসন এজেন্সি অমদি মিনিষ্ট্রি ওফ কম্মার্স এন্ড ইন্ডাষ্ট্রিগী মখাদা লৈবা এগ্রিকালচারেল এন্ড প্রোসেসড ফ্রুট প্রোডাক্টস এক্সপোর্ট ডিবলপমেন্ট ওথোরিটি (এপিইডিএ) না পুন্না খুৎশম্নদুনা দুবাই তম্না থারবা মতুংদা লুলুনা মখোয়গী সুপারমার্কেটশিংদা য়োনগদবনি হায়না মহাক্না মখা তাখি।
এডিসনেল চীফ সেক্রেটারিনা হায়, নহানমখৈদি ইম্ফাল এয়ারপোর্টতগী নৎত্রগা ওর্গানিক আউটলেট মমাংদগী মণিপুরগী কিহোম মপানগী কৈথেলশিংদা য়োন্ননবা থাখিবা অদুনা পেন্থোক্তুনা লৈরম্বনি। অদুবু ঙসিদি ঐখোয়গী কিহোমদা ‘প্রডক্ট ওফ মণিপুর’ হায়বা টেগ নৎত্রগা লেবেল অসিগী মখাদা দুবাইদা য়োনবা হৌরিবা অসি অপেনবা পোকই। মসিমক লৌমীশিংগী অচৌবা মায়পাকপা অমনি অমদি চাওথোকচনিঙাইনি। মরমদি লৌমীশিংনা লৌফমদা থবক শূরিঙৈ মতমদদি মখোয়গী পোত্থোকশিং ইম্ফালদগী হেন্দোক্তুনা মপানগী কৈথেলশিংদা থাদোকপা অসি খল্লুবদা অমনি। অদুবু ঙসিদি থাজবগী ৱাংমদা দুবাই য়ৌরে হায়নসু মহাক্না ফোঙদোকখি।
লুলু গ্রুপ ইন্টারনেসনেলগী ডাইরেক্টর জুলফিকার অমদি এপিইডিএগী চিয়ারমেন ডাক্টর এম অঙামুথুস ওনলাইনগী খুত্থাংদা থৌরম অদু শরুক য়াখি। মণিপুরগী কিহোমগী লৌফমদগী লুলুগী সুপারমার্কেট অমদা কিহোম থেন্দুনা থম্বগী ওডিও-ভিজুয়েল প্রেজেন্টসনশিংসু ওনলাইনদা পাঙথোকখিবা থৌরম অদুদা উৎখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু