বাংলাদেশতা ১৩৫শুবা অথৌবাশিংগী নিংশিং নুমিৎ পাঙথোকখ্রে
সিলেট, আগষ্ট ১৪ : মৌলভীবাজার ডিস্ট্রিক্ট মনুংচন্বা কমলগঞ্জ উপজেলা, ভানুগাছ লৈপাককী মৈতৈ মাধবপুরদা লৈবা শ্রী শ্রী চৈতন্য মহাপ্রভু মান্ডবতা মণিপুরী কল্যাণ পরিষদ ( এমকেপি) না শিনলাংদুনা ঙরাং ১৩ আগষ্ট, ১৩৫ শুবা অথৌবাশিংগী নিংশিং নুমিৎ (পেট্রিওটস ডে ওফ মণিপুর ) থৌরম পাঙথোকখ্রে।
থৌরমগী অহান্বদা ইমা লৈবাক্কীদমক থৱাইনা পোন্থা পীখবা অথৌব শিংগী মফমদা পেনা য়াকাইরোল অমদি থাংগী জগোই অমসুং হৈকৎ লৈকৎ তমদুনা ইকাইখুম্নবা উৎখি। মথংদা পেট্রিওটস ডে থৌরম অসিগা মরি লৈননা মহৈরোয়শিংগী মনুংদা শৈরেং থিবা অমসুং লাইয়েকপা/ পেইন্টিং কম্পিটিশনসু চত্থখি হায়রি।
নোঙমা চুপ্না পাংথোকখিবা থৌরম অদুগী মনুং চন্না নৈনা মিফম অমসু পাংথোকখি। মণিপুরী কল্যাণ পরিষদকী জেনারেল সেক্রেটরি ওইনাম পামহৈবানা কন্ডাক্ত তৌরগা লূপ অসিগী প্রেসিডেন্ট রানা বাবু সিংহনা থৌরম মপু অমসুং মীথুংলেন ওইনা জয়ন্ত কুমার সিংহ, প্রেসিডেন্ট,মণিপুরী কালচারাল কমপ্লেক্স, রিটায়ার্ড হেড মাষ্টার ওজা বীরেন্দ্র সিংহ, এডভাইজার, মণিপুরী কল্যাণ পরিষদ অমসুং এক্স ইউপি মেম্বর মণীন্দ্র সিংহ, এডভাইজার, মণিপুরী কল্যাণ পরিষদ শরুক য়াখি হায়রি। নৈনমিফম অদুদা হিজম সুশিলনা ওকনা ৱারোল অমসুং ওইনাম পামহৈবানা নুংগী ওইবা ৱারোল থমখি অমদি অতোপ্পা মশক নাইবা স্কলার কয়ানা অথৌবাশিংগী নিংশিং নুমিৎকা মরি লৈননা ৱা ঙাংখি।
থৌরমগী অরোইবদা কম্পিটিশনদা মায় পাক্লবা মহৈরোয়শিংদা মনা য়েন্থোকখি অমসুং ঈশৈ-জগোয়গী থৌরম অমসু পাংথোকখি হায়রি।
0 কমেন্ট:
কমেন্ট তৌবিয়ু