বাংলাদেশকী শক্নাইরা অইবা এ.কে শেরামদা ডা: থিয়াম সুরেশ লিটেরেরী লাইফটাইম এচিভমেন্ট এৱার্ড ২০২৬ পীরগনি
ইম্ফাল, ১২ মে ২০২৬ : পেট্রিওটিক রাইটার্স ফোরাম (পি.এ.উব্লিউ.এফ) মণিপুরনা চহী খুদিংগী পীদুনা লাক্লিবা ডা: থিয়াম সুরেশ লিটেরেরি লাইফটাইম এচিবমেন্ট এৱার্দ ২০২৬ বাংলাদেশকী মণিপুরী লোনগী শক্নাইরিবা অইবা এ.কে শেরামদা পীরগনি।
বাংলাদেশ মণিপুরী সাহিত্য সংসদকী হৌজিক হৌজিক প্রেসিডেন্ট ওইনা থৌ পুরিবা তোঙান তোঙানবা লাইরিক ৪০ হেন্না ইদুনা ফোংখ্রবা অইবা এ.কে শেরামগী মফমদা এৱার্দ অসি পীনবা ঙশি ফোরাম অসিগী প্রেসিডেন্ট নাওরোইবম খম্বা লুৱাংনা অফিসিয়েল ওইনা লাওথোকখিবনি। এৱার্দ অসি লাক্লিবা মেগী চৈচৎ ২৩ দা ত্রিপুরা দা পাঙথোক্পা থৌরম অমদা খুৎশিন্নরগনি। এৱার্ড অসিদা ক্যাশ ওইনা লুপা লিশিং ১০, সোল অমা , সাইটেসন অমা, মেডেল অমদি মেমেন্তো অমা য়াওরি। এৱার্ড অসি লৈখিদ্রবা ফোরামগী পেট্রোন মেম্বারসু ওইবিরম্বা ডা: থিয়াম সুরেশকী ইমুং মনুংনা কৎপিরকপনি। কুমজা ২০২৩ দগী পিবা হৌরকখিবা এৱার্ড অসি ফংখ্রবা অইবশিংদি চানা লুখোই (২০২৩), য়াইস্কুল খ্বাইরকপম (২০২৪) অমদি মোইরাংথেম রাজেন্দ্র (২০২৫) নি। এৱার্দ অসি ফংলবা মপান লমগি অইবা এ.কে শেরাম না অহানবা ওইরে।
নিংশিংনবা য়াবদি শক্নাইরবা অইবা এ.কে শেরাম বাংলাদেশ লমদা মণিপুরী লোন, ময়েক, লিটেরেচর অমদি কালচার য়োকখৎনবা হোৎনবতা নত্তনা মণিপুর, আসাম, ত্রিপুরা অমদি অতৈ লৈপাকশিংদা খুন্দারিবা মণিপুরীশিংগা অফবা মরি শাগৎনবা হোৎনবদা মপুনশি কৎথোক্তুনা লাক্লবা অইবা অমনি। মহাক কুমজা ১৯৫৩ গী ফেব্রুয়ারি গী চৈচৎ ২৭ তা বাংলাদেশকী হবিগঞ্জ ডিস্ট্রিক্টকী মনুং চন্না লৈবা গোবরখোলা (বিশগাঁও) হায়রিবা খুঙ্গং অসিদা শেরাম নবকিশোর অমদি থাম্বাল অনিগি মপারি ওইনা তাইবং খোংদারকখি। হৌজিক হৌজিক্না বাংলাদেশকী সিলেটতা য়ুমলিংদুনা লৈরি। মহাক না মণিপুরী অমদি বেঙ্গলি য়াওনা তোঙান তোঙানবা মখলগী লাইরিক ৪০ গী মথক্তা ইদুনা ফোংখ্রে। মহাক্কী লাইরিকশিংগী মনুংদা পনবা য়াব খরদি: ‘বসন্ত কুন্নিপালগী লৈরাং (শৈরেং, ১৯৮২)’ ‘কংলৈ ইয়েক ইপী’ (লানার্স বুক ওব মণিপুরী আলফাবেট, ১৯৮৪) , ‘নোঙ্গৌবি (ৱারী মচা, ২০০১)’ ,‘লম্মাংনবা (নোভেল, ২০১২)’, ‘নুংশিবগী তেংথারোল (শৈরেং, ২০১৬)’ অমদি ‘নুমিদাংৱাইরমগি চিগোংলৈ (ৱারী মচা, ২০২৩) অসিনচিংবনী।
অইবা অসিনা হোৎনরিবা কয়া অসিবু শকখংলদুনা তোঙান তোঙানবা এৱার্দ ২৪ গী মথংক্তা পীদুনা ইকাই খুম্নবা উৎখিবা লৈখ্রে।
সোর্স - পান্দম
0 কমেন্ট:
কমেন্ট তৌবিয়ু