image

নীংশিং খুভমশিং মুথৎপগী থবক লেপ্তনা চত্থরি ---আরকে তরুনজিৎ

  মতম অমা উ-ৱা হৌবা জঙ্গল ওইনা লৈরম্বা তখেনগী হৌজিক্কী কোনুং আগরতলা লিংখৎপদা মণিপুরীশিংগীসু থৌদাং চাওনা লৈরম্মী হায়বসি মৈতৈ ঐখোয়গী মনুংদসু খঙদবনা অয়াম্বনি। আগরতলা শহর মবুক্তা চেল্লিবা হাওড়া তুরেল অসি বড়মুড়া চীংথক্তগী কুমথরগা নোংচুপ রোমদা হৌজিক্কী ধলেশ্বর, আওলী (বনমালীপুর) মৈতৈ খুন/লৈকায়গী খা থংবা কলেজ টিলাগী অৱাং রোমদা চেন্থখিদুনা সেন্ট্রাল রোড-গোয়ালাবাজার ওইনা নোংচুপ পাংনা মোগড়া, টিটাস তুরেলদা তিনখি।

 

মতম মতমগী মহাও রাজন্ত্রদগী প্রজাতন্ত্রনা’ম হেল্লে হায়না খঙনরবসু মমাংঙৈ পাল্লম্বা তখেনগী নিংথৌশিংনা প্রজাগী য়াইফবা থবক অমত্তা তৌরমদে হায়বসি করম্না হায়গনি? লৈবাক অমা শেম্বদা মখোয়গী থৌদাং য়াম্না চাওনা লৈখি। দেশ অমা চাওখৎনবা হোৎনবদা মখোয়গী থৌদাংবু খক মীরাইবা য়াদে।

মখোয়না তৌরম্বদুনবু ঙসিগী চাওখৎ থৌরমশিং মখা শমথরকপা থৌরম কয়া চত্থরক্লি। মতম মতমগী নিংথৌশিংনা প্রজাগী য়াইফা থবক থৌরম্মী হায়বসি খুদম কয়ানা তাকলি। ময়ামগী অনিংবা অপাম্বা খুদিংমক নিংবা থুংহনবা ঙমগনি হায়বসি হান্নসু হৌজিকসু ঙম্নদে। অদুম ওইনমক মতমদুগী খুদোংচাবা মতুং ইন্না নিংথৌশিংনা য়াইফনবা তৌরম্মী হায়বসি হায়দবা ঙমদে।

অদুবু চাওখৎপগী মমিংদা মমাংঙৈ তখেন নিংথৌশিংনা তৌরম্বা য়াইফরবা থবক থৌরমশিং অদুদা হামুক তৈশিন্নবা মখোয়বু লান্না উহন্নবা হোৎনরম্বগী থৌদোক কয়াসু ঐখোয়না উবা ফংলি। অচুম্বা ইতিহাস অদুদি কৈদৌনুংদা কুপশিন্না নমশিন্দুনা থম্বা য়াদে, লান্না লমজিংবসু য়াদে হায়বসি ঐখোয়গী পুৱারীনা সাক্ষীনি।

মতম অমা উ-ৱা হৌবা জঙ্গল ওইনা লৈরম্বা তখেনগী হৌজিক্কী কোনুং আগরতলা লিংখৎপদা মণিপুরীশিংগীসু থৌদাং চাওনা লৈরম্মী হায়বসি মৈতৈ ঐখোয়গী মনুংদসু খঙদবনা অয়াম্বনি। আগরতলা শহর মবুক্তা চেল্লিবা হাওড়া তুরেল অসি বড়মুড়া চীংথক্তগী কুমথরগা নোংচুপ রোমদা হৌজিক্কী ধলেশ্বর, আওলী (বনমালীপুর) মৈতৈ খুন/লৈকায়গী খা থংবা কলেজ টিলাগী অৱাং রোমদা চেন্থখিদুনা সেন্ট্রাল রোড-গোয়ালাবাজার ওইনা নোংচুপ পাংনা মোগড়া, টিটাস তুরেলদা তিনখি।

মতম অদু তখেন নিংথৌ কৃষ্ণ মানিক্যনা পাল্লি। মহাক্কী মহারাণী অহুম মৈতৈ নিংঙোলনি। নিংথেম চনু চন্দ্রকলা, নিংথেম চনু অখিলেশ্বরী অমসুং নিংথেম চনু বিধুকলা দেবী। মহারাণী আহম্মক মণিপুর নিংথৌ মারজিৎকী মচা ইবেম্মানি। মহারানী চন্দ্রকলা অমসুং বিধুকলা ধারা পানখিদে। নিংথৌগী ঙাইশেন অমসুং মৈতৈ অঙম অথৌশিংনা অয়ুক-নুমিদাং খুন্থৌ শুদুনা আগরতলা শেমগৎ শাগৎপদা অচৌবা থৌদাং লৌরম্মী অমসুং হাওড়া তুরেল মপান্দা অহানবা খুন্দারকপা হৌখি।

তখেন্দা অহানবা আধুনিক্কী মঙাল পুশিল্লকখিবা য়াম্না নহা ওইনা মহারাজ বীরবিক্রম মানিক্য বাহাদুর নিংথৌ ফম্বাল কাখি। অদুগা নহা ওইনসু তাইবঙপাল থাদোকখি। মহাক্কী অতেনবা লৈঙাক শাসন মতমদা অনৌবা দিশা অমগা য়াওনা ত্রিপুরাবু আধুনিক্কী মঙালদা খোঙথাংবা ঙম্নবা লম্বী তাকপীরম্মী। তুংদা করি ওইরক্কনি ওইরোই হায়বসি মাঙজৌননা খঙবা ঙম্বা নিংথৌ অমনি।

মাগী মতমদা তখেন্দা অহানবা ত্রিপুরা ষ্টেট ব্যাঙ্ক হাংখি, উনমদা নম্বা প্রেসসু হাংসু। তখেন লৈঙাক ঙাকশেন্নবা মশাগী ওইবা তোঙানবা ফোর্স ‘ত্রিপুরা ষ্টেট বীরবিক্রম রাইফেলস’ অমসুং ‘ত্রিপুরা ইনফেন্ট্রি’ শেম্লমখি। মহাক্কী মতমদা মহৈরোইশিংগী দমক স্কুল, কলেজ হাংখি অমদি ৱাখল পুখল নুংঙাইনবা ত্রিপুরাদা অহানবা টকিজ হায়বদি সিনেমা য়েংবা হৌদোকখি। মহাক্না গেমাতী তুরেলদা স্লুইস গেইট পান্দুনা সোনামুড়াদা শেমখি ঈীশং তুংফম রুদ্রসাগর অদুগা য়ারিবা রুদ্রসাগর ঈশিংগী ময়াইদা শেমখি নীংথিজরবা কোনুং অমা নীরমহল। ‘নীরমহল’ ময়াম্না খংনরবা ট্যুরিষ্ট স্পোট অমসু  ওইরি।

আগরতলাদা লাল মহলবু বৃটিশ অফিসিয়েলশিংবু লৈহন্নবা গেষ্ট হাউস ওইনা শাবিখি। অদুগা শান্ন-খোৎনবগী লমদসু ফুটবল টুর্নামেন্ট মহাক্কী মতমদা হৌদোকখি। তখেন্দা কটেজ ইন্ডাষ্ট্রিজ হাংবদা মহাক্কী মতমদা মৈখেৎকী কারখানা নচিংবা লিংখৎলম্মী। মহাক্না জ্ঞান-বিদ্যা তান্নবগী য়ূম্ফম ওইবা ত্রিপুরাদা অহানবা মহৈশঙ য়ুনিভার্সিটি লিংখৎনবগী দমক উরেপ উয়ুং তমখিবা মফম অদু ঐখোয়না ঙসিগী এম.বি.বি কলেজগী শক্তম উবা ফংলিবসি। মহাক্না হোৎনবদগী ত্রিপুরাদা অহানবা হৌগৎলম্বা লৈনুংদগী থাউ লৌথোক্নবগী ও.এন.জি.সিনা হৌজিক লৌরিবা থৌদাং অসিনি। প্রজাশিংনা রেডিও মশক খঙবা ঙমখিবসিসু মহাক্কী মতমদনি। ত্রিপুরাদা ধর্মশালা মাগী মতমদা অহানবা হাংখি। অসুম্না পুম্নমক অসি প্রজাগী য়াইফনবা মখোয়গী অপান্বা য়েংদুনা চাওখং থবক তৌরম্বনি।

মহাক্না মণিপুরীশিংগী দমক য়াইফরবা থবক কয়াসু তৌবীরম্মী। মপা-মপু হাক্তক্তগী উদুনা খঙদুনা লাকপা মণিপুরী সংস্কৃতি ত্রিপুরাগী মরু ওইবা থৌরম ওইনা লৌখি। সংস্কৃতি অসিবু ইকাইখুম্নরম্মী। হৌজিক্কী গুম্না মতম অদুদা মপান লৈবাক্কী গেষ্ট লাকপদা মণিপুরী নাৎনা ওক্লম্মী। নিংথৌ বীরবিক্রমনা মণিপুরী নাৎ, হৌন-লোনচৎ পরস্পরা মৈতৈ সমাজকী ৱায়েন পথাপ নচিংবা ঙাক্না চৎপা ঙম্ননবা মণিপুরী কেন্দ্রীয় সভা শেমখি। মহাক্কী মতমদা রাধানগরদা অথোইবা মহাসংকীর্ত্তন মহাধুমেন পাঙথোক্লম্মী। ইং ১৯৪৫ দা মতমদুগী শক্নাইরবা ওজা রাজকুমার রনজিৎনা লুচিংদুনা শেমখিবা ত্রিপুরা রাজ্য মণিপুরী শিক্ষা সমিতিনা মমালোন মণিপুরীনা মহৈ তম্বগী খোল্লাওবু মহারাজনা শৌগৎপীখি। মদুনা ত্রিপুরাদা অহানবা মমালোলনা লাইরিক তম্বগী খোল্লাও ওইখি। ত্রিপুরাগী নিংথৌশিং মীনুংশি চাওই। ভারত-পাকিস্তান খায়দোকপা মতমদা চেনশিল্লকপা রিফ্যুজিশিংবু নিংথৌনা লৈফম-চাফম পীদুনা মতেংসু পাংবিরম্মী।

অসুম্না মমাংঙৈ নিঙথৌশিংনা শারম্বা নীংশিং খুভম কয়া ঙসিদি অয়াম্বা মুৎখ্রে নত্রগা মাঙহনখ্রে। খুদম ওইনা লাল মহল, জংশন গেইট, ভি. এম হাসপাতাল, গোলবাজার, তুলসীবতি স্কুল, কামান চৌমুহনী, রয়েল ফেমিলিগী পোৎলোয় ফম, মঠচৌমৌহনীগি নীংশিং ফুরা, জেইলখানা নচিংবা অমসুং মমিং ফাওবদা মুথৎপা য়াওখ্রে।

আওলীদা মৈতৈ নিঙোল মহারানীনা খুমন্থেম চনু মনমোহিনী দেবীগী মপাবুং (মহারাজ রাধাকিশোরগী মকুবোক) গী মোংফম মথক্তা শাবা মিটার চাম রোম ৱাংখ্রবা ফুরা (মঠ) অদু অসুম অসুম তৌনা কুপশিনখিদৌরে। ফুরা (মঠ) অসিগী মমিংদা মঠচৌমুহনী হায়না মমিং থোনখিবনি। লমদম অসিদা হকচিন্ননা মৈতৈগা মরী লৈনরম্বা পুৱারীগী খুদম অমা ওইরিবা ফুরা অসি কন্ননবা মণিপুরী মুখ্যমন্ত্রী এন বীরেন সিংহনা ত্রিপুরা (মতম অদুগী) মুখ্যমন্ত্রীদা হায়জা চে অমসু পীখি। আর্কিওলোজিকেল ডিপার্টমেন্টকী মাইকৈদগীসু মীৎয়েং চনশিনখ্রবনি অদুবু শুকতা তাবিদ্রবা ঙসিদি ফুরা (মঠ) অসি মুৎখিগদৌরে। কাউখ্রগনি পুৱারীগী নীংশিং খুভম অমা করিগী মঠচৌমুহনী থোনবনো?

(ত্রিপুরাগী মৈহৌরোলদা মৈতৈ’দগী মতেং লৌবা অয়াম্বা রেফারেন্স)
 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু