নহাকপম অরুনাগী ‘অহিংবা উপন্যাস’ অমসুং ‘নোংথাংলৈমা অমসুং তাইবং’ ফোঙখ্রে
ইম্ফাল, দিসেম্বর ১৭ : মণিপুর য়ুনিভার্সিটিগী স্কুল ওব হ্যুমেনিতিগী দিন প্রোফেসার নহাকপম অরুনানা ইবা ‘অহিংবা উপন্যাস’ অমসুং ‘নোংথাংলৈমা অমসুং তাইবং’ হায়না মিংথোনবা নৈনা ৱারেং লাইরিক অনী ঙসি মেজোর খুলদা লৈবা মণিপুর প্রেস ক্লাবতা ফোঙখ্রে। লৈমারোল খোর্জৈকোল (লৈকোল) না শীন্দুনা পাঙথোকখিবা চীং-লেম্লবা থৌরম অদুদা লৈকোলগী প্রেসিদেন্ট ক্ষেত্রিময়ুম সুবদনীনা প্রেসিদেন্ট, সাহিত্য একাদেমি এৱার্দী য়ুমলেম্বম ইবোমচানা চীফ গেস্ত অমসুং ইম্ফাল কলেজগী প্রিন্সিপাল মোইরাংথেম প্রিয়ব্রতনা গেস্ত ওব ওনর ওইনা শরুক য়াখি।
থৌরম অদুদা চীফ গেস্তকী ৱারোল পীরদুনা য়ুমলেম্বম ইবোমচানা হায়খি, খুন্নাই অসিগী অশোয়বা, অরানবশিং চুমথোক্তুনা অচুম্বা মায়কৈ অমদা পুরক্নবা হোৎনবদা অইবশিংনা অচৌবা থৌদাং লৌরি। অদুবু মণিপুর গবর্ণমেন্তনা অইবশিংগী মশক থোকপা থবক অমত্তা তৌবিদ্রি। ঙসি ফাওবা গবর্ণমেন্তনা লমদম অসিগী খোরিরোল চাওখৎনবা হোৎনবা অমসুং অইবশিংগী পুন্সি মহিং ফগৎহন্নবা খুদোংচাবা পীবা লৈত্রি।
লমদম অসিবু স্পোর্তস অমসুং কালচারনা মালেমদা মশক তাক্লগা লাক্লি। গবর্ণমেন্তনসু হীরম অনী অসিদা মীৎয়েং চঙদুনা হোৎনৈ হায়বদি হায়রি। গবর্নমেন্ত পায়রিবা মিনিস্তারশিং য়াওনা এম এল এশিংনা থৌরম কয়া কালচার, স্পোর্টস অমসুং লিতরেচর মরী লৈননা ফজবা ৱাফম কয়া ফোঙদোকপা তারি। অদুবু কালচার, লিতরেচর য়োকখৎনবা অমসুং হেন্না চাওকঃনবা হোৎনজরিবশিংবু থৌগৎপা, মাঙলোমদা পুখৎনবা হোৎনবগী চাংদি ৱাৎলি। অইবশিংগী পুক্নিং থৌগৎনবা খোঙথাং অমত্তা লৌখৎতে হায়না শক্নাইরবা অইবা অসিনা নুঙানাংবা ফোঙদোকখি।
লাইরিক অনী অসিগী অইবী নহাকপম অরুনানা হায়খি, ঙসি ফোঙলিবা নৈনা ৱারেং লাইরিক অনী অসিগী মনুংদা ‘নোংথাংলৈমা অমসুং তাইবং’ হায়রিবা অসিগী অহানবা এদিসন ইং ২০০১ দা বেঙ্গলি ময়েক্তা ফোঙখ্রে। হৌজিক হৌরক্লিবা মহৈরোয়শিং অসি বেঙ্গলি ময়েক খঙদবনা হায়রিবা লাইরিক অসি পাবা থোক্ত্রে। মখোয়শিংগী খল্লগা লাইরিক অসি মীতৈ ময়েক হাপচিন্দুনা লাইরিক অসিগী অনীশুবা এদিসন ঙসি ফোঙবনি।
ঐগী ‘অহিংবা উপন্যাস’ হায়রিবা নৈনা ৱারেং লাইরিক অসিদনা হিজম অঙাংহল য়াওনা লমদম অসিগী অইবশিংগী শৈরেং, লমকোই-ৱারী অমসুং মপানগী ফাওরবা অইবা-অইবী মিং ওইনা পল্লবদা রবিন্দ্রনাথ তেগোর, বঙ্কিমচন্দ্র চ্যাটার্জি, ইন্দিরা গোস্বামী অসিনচিংবগী লাইরিকশিং নৈনবা ৱারেং ১৫ য়াওরি। লাইরিক অসিনা লমদম অসিগী খোরিরোলদা খরদং ওইরবসু কান্নবা পীবা ঙমগনি থাজৈ।
সোর্স: পোক্নফম
0 কমেন্ট:
কমেন্ট তৌবিয়ু