চানা লুখোইদা থোকচোম ইবোয়াইমা এৱার্ড
ইম্ফাল, এপ্রিল ১০ : শুমাঙ লীলাগী মচং ওইবা মীশক খনগৎলগা চহি খুদিংগী লান্থোকপা ‘থোকচোম ইবোয়াইমা এৱার্দ’ চৎলিবা চহি অসিগী ওইনা ওইনামচা তুনান মীয়াম্না চানা লুখোই হায়রগা খঙনবা শক্নাইরবা শুমাঙ লীলা ইবা অসিদা পীরগনি হায়না মণিপুর ষ্টেট শুমাঙ লীলা কাউন্সিল, এমএসএসএলসিনা লাউথোকখ্রে।
এৱার্ড অসি চহি অসিগী ওইনা লাক্লিবা এপ্রিল ১২ দা কোনুং মমাংদা লৈবা ইবোয়াইমা শুমাঙ লীলা শঙলেনদা পাঙথোক্কদবা ’২২ শুবা শুমাঙ লীলা নুমিৎ-২০২৩’ থৌরমদা লান্থোক্কনি। ঙসি ইবোয়াইমা শুমাঙ লীলা শঙলেনদা পাউমীশিংগা উনবদা কাউন্সিল অসিগী প্রেসিডেন্ট এম পুর্নিমাসি লৈমনা চনা লুখোইবু মনা পীনবা খনগৎপগী ৱাফম লাউথোক্লদুনা থোকচোম ইবোয়াইমা এৱার্ড অসি শুমাঙ লীলাগী মচং ওইবা মীশক খনগৎলগা চহি খুদিংগী লান্থোকপনি হায়খি।
এমএসএসএলসিগী লাইফটাইম সেক্রেটারি সৌগ্রাকপম হেমন্তনা লিশাং শীৎনা চানা লুখোইনা শুমাঙ লীলাগী অইবা অমা ওইনা ষ্টেট অসিগী ট্রেডিসনেল আর্ট ফোর্ম অসিবু য়োকখৎপা অমদি হেন্না মতিং লৈবা অমা ওইহন্নবা হোৎনবদা অচৌবা থৌদাং লৌদুনা লাক্লি হায়না শীংথারদুনা মসিগীদমক মীওই অসিদা কুমসি চহিগী ওইনা থোকচোম ইবোয়াইমা এৱার্ড পীগদবনি হায়খি।
এৱার্ড অসিদা শেল ওইনা লুপা ৫০,০০০ গা লোয়ননা সাল অমদি সাইটেসন য়াওরি হায়না পল্লদুনা মনা অসি শক্নাইরবা ঠিয়েটার পার্সোনেলিটি রতন থিয়ামনা শুমাঙ লীলা নুমিৎ থৌরমদা খুৎশিন্নগনি হায়না ফোঙদোকখি। শুমাঙ লীলা নুমিৎ থৌরমদা লমদম অসিগী আর্টিষ্ট অমদি মীয়ামনা শরুক য়াবিনবা হেমন্তনা আপিল তৌরদুনা থৌরম অসিগী শরুক অমা ওইনা চহি অসিগী বেষ্ট প্রডাক্সন তাখ্রবা লমজিংবা আর্টিষ্ট এসোসিয়েসননা শান্নবা ‘পন্থৌ শঙ্গাই’ কৌবা শুমাঙ লীলা অমসু নুমিৎ অসিগী নুংথিন পুং ৩ তাবা মতমদা উৎকনি হায়খি।
পনবা য়াবদি ইম্ফাল ইষ্টকী চানা ময়ায় লৈকায়দগী চানা লুখোই শুমাঙ লীলাগী অফাওবা প্লেরাইট অমা ওইবতা নত্তনা ফিল্মগী স্ক্রিপ্ট রাইটার ওইবগী মথক্তা লাইরিক ইবগী লমদসু মমিং লৈবা মীশক্নি।
মমাংদা মহাক এমএসএসিনা পীবা ‘নোংথোম্বম রিবেন্দ্রজিৎ এৱার্ড-২০১৮’ মণিপুর ডিবলপমেন্ট ট্রাষ্ট বাঙলাদেশনা পীবা ‘ঐখোয়গী পাথৌ’ মীতৈ নেসনেল ফ্রন্ট কংলৈপাকনা পীবা ‘পিবা চীংমী তম্মী নুংশি খুদোল মনা’ অমদি মণিপুর সাহিত্য পরিষদনা পীবা ‘খুমন্থেম চাওমচা নিংশিং সনাগী তকমান’ নচিংবা মনা কয়া ফংখ্রবনি। মহাক এআইআর, ইম্ফাল অমদি ডিডিকে, ইম্ফালগী এপ্রুব রাইটার অমসুনি।
চানা লুখোই পাউচে অসি হেক হৌরকপদগী মতম মতমগী মরু ওইবা ইসু কয়া ইরাই নুমিৎ খুদিংগী ‘চেন্থরকপা ইচেল’ হায়বা কাখলদা ইদুনা লাক্লিবা অইবা অমসুনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু