৪৩ শুবা ফেমিনা মিস ইন্দিয়া ২০২৩ তঙ্খায় অমনা গোবিন্দজি টেম্পলদা তঙ্খায় অমনা কাঙজৈবুংদা
ইম্ফাল, এপ্রিল ১১ : ফেমিনা মিস ইন্দিয়াগী গ্রান্দ ফিনালেদা শরূক য়াগদবা ষ্টেটশিংগী উইনার ৩০গী মনূংদা তঙ্খায় খায়দোক্লগা তঙ্খায় অমনা গোবিন্দজি টেম্পলদা চৎখিবগা লোয়ননা তঙ্খায় অমনা মপান কাঙজৈবুংদা চত্তুনা পোলো মশান্না য়েংখ্রে। লাক্লিবা এপ্রিল ১৫ দা ইম্ফাল খুমন লম্পাক ইন্দোর ষ্টেদিয়ামদা পাঙথোক্কদবা গ্রান্দ ফিনালেদা শরূক য়াগদবা মণিপুরগী কন্টেষ্টেন্ট য়াওনা কন্টেষ্টেন্ট ৩০ গা লোয়ননা চত্থরকপা থৌরমশিং ঙসিসু মখা চত্থখি।
ঙসিগী থৌরম ওইনা কন্টেষ্টেন্টশিং অদু ১৫-১৫ থোক্না শরূক অনী থোক্লগা শরূপ অমনা মণিপুরগী মমিং লৈরবা গোবিন্দজি লাইশংদা চৎখি। লৈবাক অসিগী তোঙান তোঙানবা মফমশিংদগী লাকপা কন্টেষ্টেন্ট ১৫ অদু গোবিন্দজি লাইশংদা তরাম্না ওকখি। অতোপ্পা ১৫ দুনা ইম্ফালগী মপান কাঙজৈবুংদা চত্তুনা মণিপুরনা মারেমদা খুদোল তমখিবা পোলো য়েংখি। ওল মণিপুর পোলো এসোসিয়েসনগী মেম্বারশিং অমদি নুপী পোলো শান্নরোয়শিংনা কন্টেষ্টেন্টশিংদুবু তরাম্না ওকখিবগা লোয়ননা মখোয়দা নুপী শান্নরোয়শিংনা শান্নবা মণিপুরগী পানা কাঙজৈ অমদি মোর্দান পোলোগী মশান্না অনীমক য়েংহনখি।
তুংদা কন্টেষ্টেন্টশিং অদুগা মণিপুরগী নুপী পোলো শান্নরোয়শিংগা ৱারী ৱাতায় তৌবগা লোয়ননা কন্টেষ্টন্টশিং অদু মণিপুরগী শগোল পোনি তোংহনখি। লৈবাক অসিগী ষ্টেট অমসুং য়ুনিয়ন টেরিটোরিশিংগী টাইটেল লৌদুনা লাকখিবা ৩০গী মরক্তা ফেমিনা মিস ইন্দিয়া টাইটেলগী মপূং ওইবা চাংদম্নবা লাক্লিবা ফেব্রুয়ারি ১৫ দা খুমন লম্পাক্তি ইন্দোর ষ্টেদিয়ামদা চীফ মিনিষ্টার এন বিরেন য়াওগদবা থৌরম অমদা পাঙথোক্কনি। ফেমিনা মিস ইন্দিয়াগী টাইটেল ফংবা কন্টেষ্টেন্ট অদুনা মিস ৱার্ল্ডগী চাংদম্নবদা ইন্দিয়াগী মহূৎ শিন্দুনা শরূক য়াগদবনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু