আপডেট:
image

গভর্ণরনা মণিপুর ষ্টেট কলা একাদেমি এৱার্দশিং য়েন্থোকখ্রে

ইম্ফাল, মার্চ ১৩: মণিপুর অপীকপা লমদম ওইজরবসু ফজরবা নাৎ অমদী চৎনবী লৈবা ষ্টেট অমনি হায়না মণিপুরগী গভর্নর অনুসুইয়া উইকেনা থাগৎপা ফোঙদোকখিবগা লোয়ননা মণিপুরী কালচারবু মালেমগী অৱাংবা থাক্তা পুখৎনবা হোৎনগনি অমদি হিরম অসিগী মতাংদা প্রেসিদেন্ট অমসুং প্রাইম মিনিষ্টারদসু খঙহল্লগনি হায়না ফোঙদোকখ্রে।

মণিপুর ষ্টেট কলা একাদেমিনা শিন্দুনা ঙসি পেলেস কম্পাউন্দদা লৈবা মহারাজ চন্দ্রকীর্তি ওদিটোরিয়ামদা পাঙথোকপা মণিপুর ষ্টেট কলা একাদেমি এৱার্দস ২০২১ লান্থোকপগী থৌরমদা অথোইবা মীথুংলেনগী ৱারোল পীরদুনা মণিপুর ষ্টেট কলা একাদেমিগী চেয়ারপার্সনসু ওইরিবা গভর্নর অনুসুইয়ানা ৱাফম অসি ফোঙদোকখিবগা লোয়ননা মখা তানা হায়, নাৎ অমসুং চৎনবী ইনাক খুন্না লৈরিবা মণিপুরদা মহাকপু গভর্নর ওইনা হাপ্পিরকপা অসি মহাক্কী ওইনদি লাইবক য়াম্না ফবনি। মণিপুরগী কালচার অসি য়াম্না ফজৈ অমদি মালেমদা মমিং লৈরিবনি। লমদম অসিদা পাঙথোক্লিবা হোলিগী কুহ্মৈ অসিসু উবদা য়াম্না ফজৈ। মরম অদুনা লমদম অসিগী নাৎ অমদি চৎনবীবু প্রোপোট তৌনবা হোৎনবদা মহাক্কী মায়কৈদগী অঙম্বা মতেং পাংগনি হায়খি।

মহাক্না মখা তানা হায়, মণিপুর ষ্টেট কলা একাদেমিনা লমদম অসিগী নাৎ অমদি চৎনবীবু য়োকখৎনবা মতম কয়াগী মমাংদগী হোৎনদুনা লাক্লি। মতম মতমগী মতুংইন্না কালচারগী লমদ কত্থোকপগা লোয়ননা থবক তৌরিবা মীওইশিংবু পুক্নিং থৌগৎপা ওইনা মনা পীদুনা ইকায়খুম্নবা উত্তুনা লাক্লি। মসিগী মথক্তা হৌগৎলক্লিবা নহা কয়াদসু লমদম অসিগী নাৎ অমদি চৎনবীবু য়োকখত্তুনা থম্নিংবগী ৱাখল্লোন চেলহন্নবসু একাদেমি অসিনা হোৎনদুনা লাক্লি। ঐখায় খুদিংমক্না লমদম অসিগী কালচারবু য়োকখৎনবা হোৎনগদবনি হায়খি।

ঙসিগী থৌরম অদুদা চীফ মিনিষ্টার এন বিরেনগী মহুৎ শিন্দুনা থৌরম মপু ওইনা শরুক য়াখিবা এদ্যুকেসন মিনিষ্টার টি ঐচ বসন্তকুমারনা হায়, পীক্লবসু পীক্না লমদম অসি মালেমগী মীয়াম্না শকখঙলিবসি ফজরবা নাৎ অমদি চৎনবী অমসুং স্পোর্টসননি। লমদম অসিগী ক্লাসিকেল মণিপুরী দান্স মালেমদা মমিং লৈরিবনি। মসিগী মথক্তা লমদম অসিদা খুন্দারিবা তোঙান তোঙানবা ফুরুপশিংগী ওইবা ফোক আর্ট ফোর্ম অমদি চৎনবী কয়া লৈরি। হায়রিবা ময়াম অসি মালেমগী থাক্তা পুখৎনবা ঐখোয় খুদিংমক্না অমত্তা ওইনা হোৎনমিন্নগদবনি হায়খি।

ঙসিগী থৌরম অদুগা মরী লৈননা মীওই ২৮ দা মণিপুর ষ্টেট কলা একাদেমি এৱার্দ য়েন্থোকখি। এৱার্দ ফংখ্রবশিংগী মনুংদা ক্ষেত্রিময়ুম রনধোনিদা এম এস কে এ লাইফ টাইম এচিবমেন্ট এৱার্দ খুৎশিন্নখি। মনা অসিদা শেল ওইনা লুপা লাক্ষ ৩ য়াওরি। অদুগা এম এস কে এ ফেলোনা চবুংবম কোন্দুম অমসুং সৌগাইজম থানিলনি। হায়রিবা এৱার্দ অসিগী ওইনা শেলগী মনাদা লুপা লাক্ষ ১/১ নি। এম এস কে এ এৱার্দিশিংনা দান্সতা প্রোফেসর কোঞ্জেংবম সুনিতা, অয়েকপম নন্দিতা, অরাম্বম অপাবী; মুজ্যিকতা থোকচোম সুধির, য়ুম্নাম সুরেন, নিঙোম্বম জৱাহরলাল; থিয়েটারদা সোরাইসম কেশোরাম; শুমাঙ লীলাদা লাইশ্রম ইবোয়াইমা খুমন; ট্রেদিস্নেল থিয়েটারদা গোতিময়ুম লতাসনা; থাঙ তাদা পুথেম নিঙোল লৌরিয়াম ওংবী থাবা; লাইরিক থিবা হায়বদা অথোকপম বিরবাবু; ৱারী লীবদা ওইনাম ইবোয়াইমা; ট্রাইবেল কালচারদা অমুবা কামৈ; এ এস রাৱুং; লিটরেচরদা চান্দম খোমৈ, ডা. থোকচোম ইবোহনবী, সোইবম ইন্দুকুমার; ফাইন আর্টসতা মাইবম মনিঙৌ অমসুং নাউরেম গৌতমনি। অদুগা এম এস কে এ য়ং টেলেন্ট এৱার্দ ফংখ্রবশিংনা ডা. উরমিকা মাইবম (দান্স), মংকা ময়াংলমম্বম (ম্যুজিক), কাঙুজম সঙ্গিতা (শুমাঙ লীলা), মুতুম হেরোজিৎ (থাঙ-তা), লোইতোংবম ফুলোচান্দ (অরাংফম) অমসুং থোঙগিন হাওকিপ (ট্রাইবেল কালচার) নি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: