খাঙবোক্তগী সুনিতা মোইরাংথেমনা অমুক্কসু ‘রফি এৱার্দ’ ফংলে
ইম্ফাল, নভেম্বর ০৮ :পাঞ্জাবকী অমৃতসরদা বেজ তৌবা ‘মোহাম্মদ রফি মেমোরিয়েল সোসাইটি’ না শিল্লগা শক্নাইরবা লেজেন্দরি শৈশকপা মোহাম্মদ রফিবু নিংশিংবা ওইনা চহি খুদিংগী পাংথোকপা মোহাম্মদ রফিগী ঈশৈশিংদা য়ুম্ফম ওইবা ঈশৈ চাংদম্নবদা হন্দক চহিগী ওইনা থৌবাল দিষ্ট্রিকী খাঙবোক সোরোক ৱাংমদগী সুনিতা মোইরাংথেম না ‘বেষ্ট প্লেবেক শিঙ্গার (পোপ শিঙ্গার) তাদুনা লেমজনিঙাই ওইরবা ‘রফি এৱার্দ’ কী মনা ফংবা ঙমখ্রে।
শৈশকপী সুনিতা মোইরাংথেমনা লেমজনিঙাই ওইরবা মানা অসি কুমশিং ২০১৯ দা অহানবা ওইনা ফংবা ঙমখি। থা অসিগী ৬তা অমৃতসরগী থাকুর সিংহ আর্ট গ্যালারি দা পাংথোকপা য়াম্না টচ ওইবা কম্পিটিসন অদুদা সুনিতা মোইরাংথেমনা খ্বাইদগী ফবা শৈশকপীগী মানা অসি ফংখিবনি। ‘রফি এৱার্দ’ অনিরক ফংলবী সুনিতা মোইরাংথেম ওল ইন্দিয়া রেদিও ইম্ফাল, দুরদর্শণ কেন্দ্র ইম্ফাল অমসুং দিল্লী দুরদর্শণগী এপ্রুভ আর্টিষ্টনি, মহাক হৌজিক হৌজিক সোনিপাটতা লৈবা দিল্লী পাব্লিক স্কুলদা ঈশৈগী ওজা ওইদুনা মহৈরোইশিং তাকপী তম্বীরি।
সুনিতা মোইরাংথেম গী অপোকপনা শ্যামসুন্দর অদুগা অপোকপীনা প্রিয়োসখি কৌই, খাঙবোক শোরোক ৱাংমদগীনি। হন্দক্কী চাংদম্নবা অদুদা সুনিতা মোইরাংথেমনা রাগ মালকৌনসতা য়ুম্ফম ওইবা ঈশৈ অমা শকপদা মানা অদু ফংবা ঙমখিবনি হায়রি।
সোর্স: পান্দম
0 কমেন্ট:
কমেন্ট তৌবিয়ু