কে কে সি ওনা অরাম্বম সমরেন্দ্র নীংশিং কাং তুর্নামেন্ত ২০২৫ গী চেম্পিয়ন ওইরে
ককচিং, জুন ১৭ : কে কে সি ও কৈশামথোং কেন্দ্র কাংখুৎনা ২৫শুবা অরাম্বম সমরেন্দ্র নীংশিং কুমওন লিগ কম নোকআউত কাং তুর্নামেন্ত ২০২৫ গী চেম্পিয়ন ওইখ্রে, অদুগা য়ুম্বু ৱালিদা ৱাবগাই কেন্দ্র কাংখূৎনা রানর্স-অপ তাখ্রে। ৱাবগাই অৱাং লৈকায় য়ুথ দিভেলপমেন্ত এসোসিয়েসন (ৱালিদা) ৱাবগাই অৱাই লৈকায়না মণিপুর কাং এসোসিয়েসনগী লমজিং মখাদা শীন্দুনা চত্থরকখিবা তুর্নামেন্ত অদুগী ঙসি শান্নখিবা ফাইনেলদা কে কে সি ওনা য়ুম্বু ৱালিদাবু পাঞ্জল ১৯-১৭ দা মায়থীবা পীদুনা চেম্পিয়ন তাইতল অদু লৌবা ঙমখি।
তুর্নামেন্ত অদুগী ঙসি লোইশিনবা থৌরমদা মণিপুর কাং এসোসিএসনগী প্রেসিদেন্ত মৈখাম জাদুমণিনা অথোইবা মীথুংলেন, ককচিং দিস্ত্রিক্ত কাং এসোসিএসনগী প্রেসিদেন্ত ময়েংবম গুনেশ্বরনা থৌরম মপু, মণিপুর কাং এসোসিয়েসনগী জেনারেল সেক্রেটারি ৱাহেংবম জয়সঙ্কর, হান্নগী জিলা পরিষদ ৱাবগাই ময়েংবম জয়ন্তকুমার, ৱালিদাগী হান্নগী প্রেসিদেন্ত ময়েংবম লাল হরিনা ইকায়খুম্নরবা মীথুংশিং ওইনা শরুক য়াদুনা মনা মথুম য়েন্থোকখি।
ঙসিগী ফাইনেল মেটচ অদুদা কে কে সি ওগী আর কে ধিরেন্না চেকফৈ ৭ অমসুং লমথা ৯ লৌদুনা মেন ওব দিমেটচ তাখি। তুর্নামেন্তকী বেষ্ট লমথানা য়ূম্বু ৱালিদাগী এম জয়ন্তনা তাখি। বেস্ত চেকফৈসু য়ূম্বু কাংখুৎ অদুগী এম ললিৎনা তাখি। কে কে সি ওনা উইনার গী অমসুং ৱালিদানা রানর্স-আপকী মনাশিং ফংনখি।
সোর্স: পোক্নফম
0 কমেন্ট:
কমেন্ট তৌবিয়ু