ওয়েস্ট বেঙ্গলগী কবি ব্রজকুমার সরকারদা ‘থিয়াম ইবোচৌ নেশনেল এৱার্ড’
আগরতলা, ওক্তোবর ০৩ : সাহিত্য থৌপাং লুপ (সাথৌলুপ) না মণিপুরগী ৱাংমদা মণিপুরী লোল, কালচার অমসুং সাহিত্যবু মীয়ামদা খঙহন্নবা হোৎনবদা অচৌবা থৌদাং লৌদুনা লাক্লিবা নোংচুপ বাংলাগী শক্নাইরবা ক্রিটিক, ট্রান্সলেটর অমদি কবিসু ওইরিবা ব্রজকুমার সরকারদা ‘থিয়াম ইবোচৌ নেশনেল এৱার্ড ২০২৪’ পীদুনা ইকাইখুম্নখ্রে। এৱার্ড অসিদা শেল ওইনা লুপা লিশিং তরা, সাইটেশন অমসুং লেংয়ান য়াওখি।
সাথৌলুপনা চহী ২০ ফারকপগী শরুক অমা ওইনা হন্দক চহী মণিপুরগী ৱাংমদা নোংচুপ বাংলাগী নোংচুপ বর্ধমান জিলা মনুং চনবা দুর্গাপুরগী ত্রিস্টুপ সাহিত্য পত্রিকা অমসুং শিল্প সাহিত্য পত্রিকা অনীগা খুৎশম্নরগা চৎখিবা সেপ্টেম্বর ৩০, বিপিনচন্দ্র পাল অডিটোরিয়ামদা ‘ইন্টারনেশনেল ট্রান্সলেশন ডে’ থৌরমগা মরী লৈননা অহানবা ওইনা বাংলা-মণিপুরী কবিতা উৎসব থৌরম পাঙথোকখ্রে।
উৎসব হৌদোকপগী থৌরম অদু মণিপুরগী শক্নাইরবা কবি দিলীপ ময়েংবমনা চীফ গেষ্ট ওইখি। সাহিত্য একাডেমি এৱার্ডি শরতচান্দ থিয়ামনা থৌরম মপু ওইরগা গেষ্ট অব অনার ওইনা নোংচুপ বাংলাগী শক্নাইরবা কবি গৌতম গুহ রায় শরুক য়াখি। কবিতা উৎসব থৌরম অদুদা শক্নাইরবা কবি বিকাশ গায়েন, বিমান চট্টোপাধ্যায়, সুকমল ঘোষ নচিংবা শরুক য়াখি। থৌরম অদুদা কবি তোংব্রম অমরজিৎনা পেপার পাথোকখি।
মণিপুরী লোল অমদি লোল অসিগী সাহিত্যবু মণিপুরগী ৱাংমদা শক্তাকপগী পান্দমদা সাথৌলুপনা চত্থরিবা শক্তাক খোঙচৎকী শরুক অমা ওইনা হন্দক চহী দুর্গাপুরদা মালেমগী ওইবা ট্রান্সলেশন ডে থৌরমদা শরুক য়াখিবনি। নুমিৎ হুম্নিগী থৌরম অদুদা মণিপুরগী কবি অইবা অইবী ১৬ য়াওনা নোংচুপ বাংলা গী কবিশিং শরুক য়াখি হায়না নোংচুপ বাংলাদগী ফংবা ফাউদা হায়রি।
সোর্স: মরূপ
0 কমেন্ট:
কমেন্ট তৌবিয়ু