এস বিদ্যারানীনা ওয়েথলিফটিংদা, রোনাল্ডো অমদি রেজিয়ানা সাইক্লিংদা গোল্ড লৌখ্রে
ইম্ফল, ওক্টোবর ০১ : গুজরাটনা য়ূম্বু ওইদুনা চত্থরিবা ৩৬ শুবা নেসনেল গেমসকী ঙসি হুম্নি চনবা নুমিৎতা ষ্টেটকী শান্নরোয় অহুম-সোরোখাইবম বিদ্যারানীনা ওয়েথলিফটিংদা অদুগা লাইতোঞ্জম রোনাল্ডো অমদি কে ঐচ রেজিয়ানা সাইক্লিং মশান্নদা গোল্ড মেদেলশিং লৌবা ঙমখ্রে।
মণিপুরনা ঙসি হুম্নি চনবা নুমিৎকী হৌজিক ফাওবগী ফংবগী রিপোর্টকী মতুংইন্না সাইক্লিংদা গোল্ড ২, সিলভার ১, ব্রোঞ্জ ১; ওয়েথলিফটিংদা গোল্ড ১ অমদি ফেন্সিংদা সিলভার ১, ব্রোঞ্জ ১ ফংদুনা মণিপুরনা পূন্না গোল্ড ৫, সিলভার ৩ অমদি ব্রোঞ্জ ৪ ফংবা ঙমখ্রে।
বিদ্যারানীনা ওয়েথলিফটিং মশান্নগী নুপীগী কেজি ৫৯গী ফাইনেলদা পূন্না কেজি ১৯৪ থাঙ্গৎতুনা গোল্ড মেদেল ফংবা ঙমখি। মহাক্না সেন্টচতা কেজি ৮৩ অদুগা ক্লিন এন্দ জার্কতা কেজি ১১১ থাঙ্গৎখি। অমরোমদা, সাইক্লিং মশান্নগী কিলোমিটার ১গী টাইম ট্রায়লদা এল রোনাল্ডোনা মিনিট ০১:০২/৩৪৩ দা লমথুংফম য়ৌদুনা গোল্ড মেদেল ফংবা ঙমখি কে ঐচ রেজিয়ানা কিলোমিটার ৩গী ইন্দিভিজ্যুয়েল পার্স্যুইটতা গোল্ড মেদেল ফংখি।
এম সোনালিনা মিটার ৫০০ গী টাইম ট্রায়লদা সিলভার অদুগা টি মনোরমানা কিলোমিটার ১০গী স্ক্রাটচ রেসতা ব্রোঞ্জ মেদেল ফংবা ঙমখি। ফেন্সিং মশান্নগী নুপীগী ফোইল ইন্দিভিজ্যুএল ইভেন্টতা এল অনিতানা সিলভার অদুগা এন মিনানা ব্রোঞ্জ মেদেল ফংবা ঙমখি।
নুপীগী ফুটবোলগী ঙসি শান্নখিবা মেটচ অমদা মণিপুরনা টামিল নাদুবু ৫-২দা মায়থীবা পীখ্রে। রোজানা শান্নবা হৌরকপগী ১৩ শুবা মিনিটতা মণিপুরগী অহানবা গোল চনবা ঙমখি। রিনারোইনা শান্নবগী ২১ শুবা মিনিটতা অনীশুবা গোল চনবা ঙমখি। মহাক্না মখা তানা শান্নবগী ৪৭ শুবা মিনিটতা মণিপুরগী অহুমশুবা গোল চনখি।
ঙাঙোম বালানা শান্নবগী ৩২ শুবা মিনিটতা অহুমশুবা অদুগা প্রিয়াঙ্কানা টেচ লোইরমদাই ইঞ্জুরি টাইমদা মণিপুরগী মায় পাকপগী ৫ শুবা গোল চনখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু