• 535
• ২৪শে এপ্রিল ২০২৩ ইং
• Share on:

এপ্রিল ২৩, ২০২৩ মলেমগী লাইরিক্কী নুমিৎ

“The reading of all good books is like a conversation with the finest minds of past centuries.” - Rene Descartes   

চহী চা কয়াগী মমাংদা লৈরম্বা অফাওবা স্কোলরশিং, সাইন্তিসশিং, লাইনিং লাইশোলগী লমদা থোইদোক হেন্দোক্লবা থবক কয়া তৌরম্লবা মীওই মপোক্তা লাইপোক ওইনা ঙসিগী মীরোলনা শোন্নরিবা মখোয়গা নকশিন্নগে অমসুং মখোয়বু হেন্না খঙনবা হোৎনগে হায়রবদি লাইরিক্কী খূত্থাংদা নত্তনা অতৈ পাম্বৈ লৈতে। তাইবঙপান অসিবু খঙনবা হোৎনবা লাইরিক হায়বসি য়াওদবা য়াদে। লৌশিংগী পূক্কৈ অদুগী থোং অমদি থোংনাওশিং হাংদোক্তুনা মলেমসে য়েংনিংলবদি লাইরিক পাদবা য়ারোই। অদুনা অমেরিকাগী প্রসিদেন্ট ওইরম্বা বরাক ওবামানসু হায়,  "Reading is important. If you know how to read, then the whole world opens up to you."  মলেমসিদা লৈরিবা মীওইবনা মতম অহুম্বু শমজিন্ননবা কন্না হোৎনৈ। হায়রিবা মতম অহুমসিবু খরমখৈ খঙবা ঙম্বশিংনা মীওইবা খুনাইদা মপাল নাইদ্রবা কান্নরবা খুদোল কয়া তম্লি। মসি পুম্নমক লাইরিক্তনি লাচল্লিবসি। তাইবঙপান অসিগী হী-য়াই লন থুম পুম্নমক লাইরিক হায়বসিদা ফুমদুনা য়াওরি। মমিং চৎলবা অমেরিকান ফিল্ম প্রদ্যুসর ৱাল্ট দিস্নিনা হায়বসি অচুম্বনি। মহাকনা হায়, There is more treasure in books than in all the pirate’s loot on Treasure Island.

লাইরিকনা থোং ওইদুনা মীওইবা খুনাইগী চাওরবা য়ুম্ফম অমা শাগৎলক্লি হায়বসিদা পুম্নমকনা য়ানিংগনি। মনিপুরদসু হায়নৈ, লাইরিক হায়বসি, ‘লাইগী লীকলম’ অদুনি। অফবা লাইরিক্কা মরুপ ওইবনা ফত্তবা শঙ্গা তৌবদগী শরুক চাম্মা হেন্না পুন্সিদা য়াইফবা ওই হায়নবা অমা লৈরি। ঙসি মলেমসিদা লৈরিবা লৈবাক কয়াগী মরক্তা ফিদম্নিংঙাই ওইরবা লৈবাক কয়া লৈরি। হায়রিবা লৈবাকশিং অসিদা লৈরিবা লাইব্রেরিশিং, মসিদা লৈরিবা মীওইশিংনা পারিবা লাইরিক, লেপ্তনা চত্থরিবা রিসার্চ পুম্নমক মখোয়না  পারিবা লাইরিকশিং অদুনা লেংদ্রবা খুদম ওইরি। অদুনা নেপোলিয়ণ বোনাপার্টনসু হায়রম্মি, “Show me a family of readers, and I will show you the people who move the world” খুনাই অমগী চাওখৎপগী লমওনচৈ ওইরিবসি খুনাই অদুদা লৈরিবা লৈরিক্কী পূক্কৈ অদুননি। পুৱারীসু নীংথিজনা লৈ লৈতে খঙদবা লাইরিক্কী পূক্কৈসু লৈতবা, লাইরিকসু পাদবা খুনাই অদুনা কৈদৌনুংদা চাওখৎপা খুনাই ওইবা ঙম্লোই। হকচাং ফনা লৈনবা হোৎনবদা ঐখোয়না হকচাং শাজেল তৌদ্রবদি য়াদবগুম্না অফবা ৱাখল খন্দুনা নুংঙাই য়াইফবা খুনাই অমা ওইহনগে হায়রবদি অফবা লাইরিক পাবা মথৌনি। মতাং অসিদা জোসেফ এদিসননসু হায়রম্মি, “Reading is to the mind what exercise is to the body.”

এপ্রিলগী ২৩ অসিবু মলেমগী লাইরিক্কী নুমিৎ হায়না খঙনদুনা মলেম শিনবা থুংনা নীংশিং থৌরম পাঙথোকপা হৌখিবসি ১৯৯৫দগীনি। য়ুনেস্কোনা লেপখিবা নুমিৎ অসিদা তোঙান তোঙানবা থিমদা পাঙথোক্তুনা লাক্লি। মলেমগী খোরিলোলগী পুৱারীদা এপ্রিল ২৩ নুমিৎ অসিমক য়াম্না নীংশিংঙাই ওইবা নুমিৎ অমনি। নুমিৎ অসিদা মলেম শিনবা থুংনা মমিং লৈরবা অইবা কয়া নোংগাখি। মখোয়শিংদুগী মনুংদা ৱিলিয়ম সেক্সপিয়র, মিগ্যুএল সারভান্তিস, ইনকা গরসিলাসোনচিংবা কয়া য়াওরি। অদুনা অসিগুম্বা নুমিৎ অসিবু য়ুনেস্কোকি জেনরেল কনফরেন্স অমা পেরিস্তা ১৯৯৫তা ফমখিবা মীফম্না মালেম পুম্বগী ওইবা মলেমগী লাইরিক্কী নুমিৎ থৌরম পাংথোকপা হায়না ৱারেপখিবনি। মসিদা অইবশিংদা ইকায়খুম্নবা উৎপা অমসুং মীপুম খুদিংবু লাইরিক পাবদা পুকনিং থৌগৎপা অদুগুম্বা নুমিৎ ওইহনবদুনি।   

কুমসি চহী ২০২৩গী ওইনা ‘ইন্দিজিনস লেঙ্গ্যুএজ’ হায়বসিদা পাঙথোক্কদৌরি। হৌখিবা চহী ২০২২দগী হৌদুনা য়ুনেস্কোনা চহী তরা চুপ্না ইন্তরনেস্নেল দিকেদ ওফ ইন্দিজিনস লেঙ্গ্যুএস (২০২২-৩২)হায়না মলেমসিদা লৈরিবা তোঙান তোঙানবা ফুরুপ কাংলুপশিংনা ঙাংনরিবা মান্নদবা লোল অমদি মসিদা লৈরিবা অপুনবগী ফজবা অমসুং মরু ওইবদু মীপুম খুদিংদা খঙহন্নবা পান্দমদা পাঙথোক্লি। ইন্দিজিনস লেঙ্গ্যুএজতা লৈরিবা চিনবুং সাহিত্য, মসিদসু মরুওইবা ফোকস অসি পীদুনা পাউজেল পীনবা য়ুনেস্কোনা হোৎনরক্লিবা থৌরম্নি মলেমগী লাইরিক্কী নুমিৎ। মলেমগী লৈবাক কয়াদা হৌজিক হৌজিক ঙাংনরিবা লোল ৭০০০ অসিগী মনুংদা কয়াদি থুনা মাংশিল্লক্লিবসিগী মরক্তা য়েলহৌমীশিংনা ঙাংনবা লোল অসিসু অমা ওইরি। অদুবু মসিদা খেন্নবা কলচরগী মান্নদবা ফজরবা মশক অদুদি মহুৎ শিন্দুনা য়াওরিবনি। পুম্নমক অসিগী হৌরকফম, মসিগী কান্নরবা ইনফোর্মেসন কয়াদি মশিং থিঙমদ্রবা লাইরিক কয়াদা অইবা কয়ানা ইদুনা থমজিল্লি। পুক্কৈ লনগৈ কয়া লাইব্রেরিশিংদা খোমজিল্লি। মসিনা হৌরক্লিবা মীরোলশিংদা লৌশিংগী মঙাল লেপ্তনা পিরি। মলেমসিদা লৈরিবা মীওই ফুরুপ কাংলুপ কয়াগী মরক্তা লাইরিক হায়বসিনা থোং অমা শারি। সাইন্সকি লমদা, লাইরিক লাইশুগী লমদা অনা লায়েংগী লমদা অমদি তোঙান তোঙানবা হীরম কয়া পুম্নমক্কা পাউ ফাওনহল্লি। লাইরিক পুথোক্লিবা পব্লিসিং কম্পানিশিং, লাইরিক য়োল্লিবশিং অমসুং লাইব্রেরিশিংগা লৈনরিবা তৎন- থানবা য়াদ্রবা মরি অসিবুসু হেন্না চেৎশিনহন্নবা হোৎনরি। নুমিৎ অসিনা লাকপগা ইরোয়ননা চহী খুদিংগী ৱার্ল্ড বূক কেপিটেল অমমম খন্দুনা নুমিৎ অসিবু হেন্না মপুং ফনা অমদি য়াম্না চাওনা থৌরম পাংথোকনবা হোৎনরি। কুমসি চহীগী ওইনা ঘানা হায়রিবা লৈবাক অসিগী কোনুং Accraবূ য়ুনেস্কো ৱার্ল্ড বূক কেপিতেল এদ্ভাইজরি কমিতিনা য়ুনেস্কো ৱার্ল্ড বূক কেপিটেল ওইনা কমিতিনা খনখিবনি। হায়রিবা কমিতি অসিদা ইন্টরনেস্নেল পব্লিসরস এসোসিএসন, ইন্টরনেস্নেল ফেদরেসন ওফ লাইব্রেরি এসোসিএসন্স, ইন্টরনেস্নেল অঠরস ফোরম অমসুং য়ুনেস্কো য়াওরি। ২০২২দদি মেক্সিকোগী Guadalajara হায়রিবা সিতি অসিনা ওইখিবনি। হন্দক Accraবু ২১শুবা মলেমগী বূক কেপিটেল ওইনা খল্লিবগী মরমদি ঘানাগী নহারোলশিংদা মখোয়গী লৈবাক্কীদমক্তা লাইরিক লাইশুগী লমদা, মখোয়গী কলচরগী লমদা অমসুং য়াইফবা থবক কয়াদা মায়পুনদুনা হোৎনরিবা অসিনা হৌরক্লিবা মীরোলদা হেন্না কান্নবা কয়া লাইরিক্কি খুত্থাংদা খুদোল তম্বা ঙম্নবনি। বুক কেপিটেল অসিনা তৌগদৌরিবা থবকশিংদি লাইরিক লাইশু নীংথিজনা তম্বা ফংজদ্রবা অমদি মসিগী খুদোংচাবা ফংদ্রবা নুপী অঙাংশিং, লম্বী লমজাওদা থবক থিদুনা লৈরিবা লায়রবা অঙাংশিং, মীমান্নদ্রবশিং মখোয় পুম্নমকপু লাইরিক লাইশু নিংথিজনা তমহনবনি অমসুং অফবা লাইরিক পাহন্নবা পান্দমদনি। মসিগীদমক্তা অফবা স্কুলগী ইনফ্রস্ত্রকচর শেমগত্তুনা, লাইব্রেরি কয়া লিংখত্তুনা হৌরক্লিবা নহারোলশিংদা, থবক ফংদ্রিবশিংদা ঘানা হায়রিবা লৈবাক অসিগী ইনাকখুল্লবা আর্ত অমসুং কলচর য়োকখৎনবা লাইরিক্কি খুত্থাংদা হোৎনবদুনি ৱার্ল্ড বুক দেগী থৌরমগী মরু ওইবসু। হৌখিবা চহীশিংদা ৱার্ল্ড বূক কেপিটেল ওইনা খন্দুনা থৌরম কয়া মায় পাকনা পাঙথোকখ্রবা সিতিশিংগী মনুংদা ইন্দিয়াগী কেপিটেল দেল্লীসু অমনি। অসিগুম্বা বুক কেপিটেলশিংগী মনুংদা এথেন্স, মোন্ত্রিএল, এমস্তরদাম, এলেকজেন্দ্রিয়া, বেঙ্কোক, কৌলা লামপুরনচিংবা সিতি কয়াসু য়াওখিবা লৈরে।

মনিপুরদসু সাহিত্য থৌপাং লুপ্না শিন্দুনা অসিগুম্বা ৱার্ল্ড বুক ডেগী থৌরমসি ২০১৮দগী পাঙথোক্তুনা লাক্লি। নুমিৎ অসিদা মনিপুরী খোরিলোলদা লোয়ননা লাইরিক ইবগী লমদা থোইদোক হেন্দোকনা মশক থোকপা থবক কয়া খুনাইগী ওইনা য়াইফবা থবক কয়া লেপ্তনা তৌরিবা অইবশিংদা হৈস্নাম বসন্তাকুমার এৱার্দ পীদুনা ইকায়খুম্নবা উৎতুনা লাক্লি। হায়রিবা লেমজনিংঙাই ওইরবা এৱার্দ অসি ওজা নোংমাইথেম তোম্বী, অইবা কৈশাম প্রিয়োকুমার, দা চোংথাম জামিনি দেবী, লমাবম ভীরমনি, নাওরোইবম ইন্দ্রমনিনচিংবা অইবশিং অমসুং স্কোলরশিংদা পিদুনা মখোয়না তৌরিবা মপাল নাইদ্রবা থবক অদুগীদমক্তা ইকায়খুম্নবা উৎখ্রে। মনা অসিমক হৌজীক হৌজীক দি আই পি আরগী দাইরেক্তর ওইরিবা হৈস্নাম বালকৃষ্ণনা মহাক্কি অপোকপগী মিংদা কৎপিরকপনি। মসিনা মনিপুরদসু ৱার্ল্ড বূক ডেগী থৌরম অসিবু হেন্না মপুং ফাহল্লি হায়বা য়াই। মরমদি মণিপুর খুনাইনা ঙসি হিংদুনা লাক্লিবা, ঐখোয়না ঐখোয়গী পূৱারী কদায়দনো হায়না থিরুবা মতমদা খঙবা ঙম্লিবসি অইবশিং অসিগী চাওরবা মতেংননি। মখোয়না লাইরিক ইরমদ্রবা,  মখোয়না কত্থোকপা অমগা লোয়ননা লাচল্লিবা খুনাইগী ৱারীশিং, শক্তমশিং, অসি ইদ্রবদি ঙসিগী মনিপুরগী ফিভম অসি লাক্লমদবসু য়াই। অদুনা মীপূম খূদিংনা মলেমগী লাইরিক্কি নুমিৎনা লাকপদা ঐখোয়গী অইবশিংবু ইকায়খুম্নবা উৎফম থোকই অমসুং লাইরিক পাবগী হৈনবী অমসু থম্বা মথৌ তাই। মসিদা অমুক খ্বাইদগী মরু ওইরিবসিসু লাইব্রেরি নিংথিজনা থম্বনি। লাইব্রেরি মশিং য়াম্না লিংখৎপনি। লাইরিক পাদনা খুনাই অমনা মাংলোমদা চংশিনবা অমসুং চাওখৎপগী কৈরাক কাবা ঙম্লোই।