‘দি মীতৈস প্লাইট’ হায়না মিংথোনবা লাইরিক ফোঙখ্রে
ইম্ফাল, নভেম্বর ১৩ : ৱার্ল্ড মীতৈ কাউন্সিলনা সেক্রেটারি জেনারেল য়ুনাইটেদ নেসন্সতা সম্মিট তৌখিবা চেরোলশিং লাইরিক ওইনা ‘দি মীতৈস প্লাইট’ হায়না মিংথোনবা লাইরিক ফোঙবগী থৌরম মণিপুর প্রেস ক্লাবতা পাঙথোকখ্রে।
থৌরম অসিদা ৱার্ল্ড মীতৈ কাউন্সিলগী চিয়ারমেন হৈগ্রুজম নবশ্যামনা হায়, চহী তরেৎ খুন্তাকপগী মতুংদা অহানবা লান, অনীশুবা লান মালেমগী থোকখিবা লান থেংনখ্রে। মমাংদা চহী তরেৎ খুন্তাকপদা থেংনখিবা লানগা হৌজিক থেংনরিবা লান অসিগা য়াম্না মান্নৈ। চহী তরেৎ খুন্তাকপদা থেংনরিবা লান অসি মীতৈ ফুরুপ মাঙহন্নবা তৌবা লাননি। হৌজিক থেংনরিবা লান অসিসু মীতৈ ফুরুপ অসি লৈমায়দগী মত্থৎনবা হোৎনবা লাননি।
২১ শুবা চহী চাদা থেংনরিবা মণিপুরীগী লান অসি ফিল্ডদা বোম টোপকী, নোংমৈগী লান, মীদিয়াগী লান, লিগেলগী লাননচিংবা মশিং য়াম্না শোক্নবা লাননি। ৱার্ল্ড মীতৈ কাউন্সিলনা মীদিয়াদা থেংনবা লান ওইরো, লিগেলগী সুপ্রিম কোর্টতা থেংবা লান শরুক য়াদুনা লাক্লি। নোংমৈ কাপ্নবা, বোম টোপ মরক্তা য়অওবা ঙমজদ্রগসু লানগী শরুক্তা য়াওজরিবনি। য়ু এনদা ঐখোয়না চৎচরিবসি চিন-কুকিশিংসি য়াম্না স্মার্ট ওইবা কাংবু ওইবনিনা মখোয়গা থেংননবা চৎচবনি। মখোয়সি অহানবদা বর্ম্মাগী চিন ষ্টেটতা ১৮ শুবা চহী চাদা লৈরম্বা কাঙবুনি। মসিদগী মথং মথং মণিপুরদা চংবা হৌরকপদুনা মীতৈগী মথংদা মীশিং য়াম্বা ওইরে। নাগাদগীসু কুকিনা মীশিং য়াম্বা হেল্লক্লে হায়না মখা তাখি।
মহাক্না মখা তানা ফোঙদোকখিবদা মমাংঙৈদা অহলশিংনা খোংজাই হায়রম্বনি মখোয়সি। খোংজাই নাতৎপা হায়রম্বদগী হৌজিক্তী বোম তোপকী লানখক্তা নত্তনা ইন্টারনেসনেলদা মীতৈ ফুরুপ য়োনবা ঙম্লক্লে। মখোয়না প্রেপেগন্দা মেছিন্নরিসি শিজিন্নরগা চংশিনলকপসি ঐখোয় থেংনবা ঙমদে। হৌগৎলকপা মতমদা নেসনেল মীদিয়াসি চাদা চাম্মদি স্কোর তৌই। মপানগী মীদিয়ানা মীতৈগী চাদা ৯০% দি লান্না লৌই। মসি থেংননবা হোৎনবদা ৱার্ল্ড মীতৈ কাউন্সিলনা মণিপুরগী মপান্দা লৈরিবা মীতৈশিংগী সী এস ওশিং মহৈরোয়শিং লুপ পুম্নমক্কা পুন্দুনা থেংনমিন্নৈ। মসি মতম কায়থোক্লগা চপ চানা থেংনদবা য়ারক্তবদগীনি।
ঐখোয়না পৃথিবীগী মীয়ামদা খঙহল্লিবসিদি অশেং অশেংবা ঙাক্তনি তৌশিন্নবা, শেমজিন শাজিনবা অমত্তা য়াওদে। অদুনা য়ু এন দা পীখিবা দোকুমেন্টশিংসু অমত্তা চিত্থদনা অৱাৎপা লৈতনা অচুম্বদা য়ুম্ফম ওইরগা পীশিনখিবা চেরোলনি। অদুনা রিফারেন্স ময়াম অমা য়াওবনিনা মাংখিগদ্রা হায়বগী চিংনবা লৈবদগী চে ওইনা লৈবদগী লাইরিক ওইনা পুথোক্লগদি লৈহৌগনি হায়দুনা লাইরিক ওইনা পুথোকপনি। অদুনা মীতৈগী ওইবা মমিং থোল্লগা পুথোকচবনি। লাইরিকসি কান্ত্রি কয়াদসু য়ৌহন্নবা হোৎনরি। চুরাচান্দপুর, মোরেদা মীতৈগী য়ুমশিং য়ূমফম ফাওবা মুত্থৎনবা বুল দোজারনা তকখাইদুনা মাংহনবদগী কেস সুপ্রিস কোর্টতা লাক্লিবা নভেম্বর ২০ দা তাই হায়রি।
থৌরম অসিদা এস টি দি সী এমগী প্রেসিদেন্ট ধিরাজ য়ুম্নাম, ফেদারেসন ওফ হাওমীগী প্রেসিদেন্ট সাপমচা যাদুমনি, মীতৈ ত্রাইব যুনিয়নগী প্রেসিদেন্ট সালাম গৌরকিশোর, দব্লিউ এম সী মণিপুর য়ুনিটকী প্রেসিদেন্ট য়ু কুঞ্জো, এস কে এলগী প্রেসিদেন্ট এল গোপাল, মিদল ইষ্ট অরাব, তম্ফাসনা লাইশ্রম অমসুং সেনিয়র জার্নেলিষ্ট য়াম্বেম লাবানা মীফম লোইশিং ওইখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু