ইম্ফাল, জুন ২৩: মণিপুরদা হৌজিক থোক্লিবা ঈরাং অসিগী মায়োক্তা ঙরাং অয়ূক পূং ১০দগী নুংথিল পূং ৫ ফাওবা (ই এস তি-ইষ্টার্ণ স্তেন্দার্দ টাইম) ৱাশিংটন মোনুমেন্ত, ৱাশিংটন দিসিদা মরুওইরবা পিছ দেমোনস্ত্রেসন অমা পাঙথোকখ্রে হায়না এসোসিয়েসন ওব মীতৈজ ইন দি আমেরিকা ( এ এম এ) গী চেরোল অমনা হায়রি।

পিছ দেমোনস্ত্রেসন অসি ইন্দিয়াগী প্রাইম মিনিস্তর নরেন্দ্র মোদিনা য়ু এস এ-দা লাক্তুনা য়ু এস-ইন্দিয়াগী মরী মপাঙ্গল কনখৎহন্নবা হোৎনরিবা খোঙচৎ অসিগা মপা চানবা হায়বদু ওইখি। খোঙজং অসিদা য়ুনাইতেদ স্তেতকী তোঙান-তোঙানবা অথাপ্পা অমদি অনকপদা লৈবা মফমশিংদগী লাকখিবা মী কয়ানা শরুক য়াখি।

নুমিৎ চুপ্পা নোং তাবা লৈরবসু মদুনা শান্তি থম্নবগীদমক চঙশিনখিবা অপূনবগী খোঙজং অসিদা নিংহন্নবা অমত্তা থোকখিদে। ইলিনোই, ওহাইও, নোর্থ কেরোলিনা, কন্নেক্তিকত, মচাসুসেতসনচিংবা তোঙান-তোঙানবা মফমদগী পূং ৪দগী পূং ১২ রোম ফাওবা চঙনা লাকখিবা মীশিংনা সোলিদারিতি উৎপা মী পূনবা খোঙজং অসিদা শরুক য়াখি।

ক্যালিফোর্নিয়া, টেক্সাস, ফ্লোরিদাদগী পিছ দেমোন্সত্রেসন অসিগীদমক নিংথিনা তুম্বা ফাওবা ফংদনা ফ্লাইত তোংদুনা লাকপা য়াওখি। ৱাশিংতন দিসি, মেরিলেন্দ, ভার্জিনিয়াদা লৈবা লোকেল কম্যুনিতিনা অতৈ মফমশিংদগী লাকপশিংবু তরাম্না ওকখিবা অদু পূক্নিং নুংশিনিংঙাই ওইখি।

মসিগী মথক্তা নিউ য়োর্ক অমসুং নিউ জার্সি এরিয়াদা লৈবা ইমুংশিং অমদি লনাই মীশিংনা নোংমা ৱাৎলিঙৈদগী  খোঙজং অসিগীদমক লাক্নখি। নিউ য়োর্কতা লৈবা বাংলাদেশতগী লাকপা মীতৈ মী ৬ সু খোঙজং অসিদা শরুক য়াখিবদা এসোসিয়েসন অসিনা হরাওবা ফাওই হায়রি।

বাংলাদেশি মীতৈ অমনা ‘বাংলাদেশতগী ওইরবসু থম্মোয়দি মণিপুরগিনি’ হায়না ফোঙদোকখিবা ৱাহৈনা শরুক য়াখিবশিংদা তু চুংহনখি হায়রি। খোঙজং অসিনা তোঙান তোঙানবা বেকগ্রাউন্দদগী লাকপা মীশিংগা কন্নেক্ত তৌবগী খুদোংচাবা অদু ফংখি। আমেরিকান্স, য়ুরোপিয়ান্স, কোরিয়ানশিংনা খোঙজং অসিগী মতাঙদা খঙনিংবা ঊৎখি অমসুং খোঙজং চঙশিল্লিবশিংনা মখোয়দা হৌজিক ওইরিবা ফিবমগী মতাঙদা খঙহনখি হায়রি।

খোঙজং চঙশিনবদা মশা লাক্তুনা শরুক য়াবা ঙমখিদবশিংনা শৌগৎপা উত্তুনা মখোয়গী ৱাচএপ প্রোফাইল পিকচার অমসুং অতৈ সোসিয়েল মিদিয়া প্রোফাইল পিকচার ‘পিছ ইজ পোসিবল’ য়াওবা ইমেজ হোংখি হায়রি। খোঙজং অসিদা ‘হো ইমা মণিপুর নঙগুম্বী লৈতে ইমা’, ‘প্রাউদ মীতৈ, প্রাউদ ইন্দিয়ান’, ‘পিছ ইজ পোসিবল’ ‘স্ত্রোংলি কন্দেম দি ভাইওলেন্স’ হায়বা খোল্লাওশিং য়াওবা প্লেকার্দশিং শীজিন্নখি।

হৌজিক ওইরিবা ক্রাইসিস অসিগী মতাঙদা ঈ-পাউ য়াওবা অমসুং এক্সন অমদি পিছকী আপিল য়াওবা চেজাইশিং শীজিন্নখি। থৌরম অসিগী স্পোক্সপার্সন দাঃ রাজশ্রী কৈশামনা ‘ঙসি ঐখোয়না প্রাইম মিনিস্তর নরেন্দ্র মোদিদা শান্তিগী থবক খোঙজেল য়াংশিন্নবা হায়জরি। মালেমগী খ্বাইদগী চাউবা দেমোক্রেসি চৎপা লৈবাক অনী, য়ু এস এ অমসুং ইন্দিয়াগী মরক্তা লৈনরিবা মরী হেন্না মপাঙ্গল কনখৎহন্নবা উনরিবা নুমিৎ অসি শিংথানিংঙাই ওইরবা নুমিৎনি।

ঐখৈায়না খুদোংচাবা অসি লৌরগা মালেমগী মীয়ামদা মণিপুরদা ওইরিবা ফিবম অসি খঙহনবা পাম্মী। শান্তি পুরক্নবা অমসুং রিবিল্ডিংগী থবক্তা পূক্নিং চঙনবা ঐখোয়না লৈবাক অসিগী মীপুম খুদীং, মিদিয়া হাউস পূম্বদা হায়জবা পাম্মী।’ য়ু এসতা লৈবা সিনিয়র মীতৈ অমা ওইরিবা রুহিকান্ত অমোমনা ফোঙদোকখিবদা, য়ু এসতা চহী ২৫ হেন্না লৈরকপা অসিদা অপূনবগী ঈহৌ অমগীদমক খ্বাইদগী য়াম্না মীতৈশিং পুনবা অসি হন্দক্কী অসিনা অহানবা ওইরে।

সোর্স: পোক্নফম