২৪ শুবা অরাম্বম সমরেন্দ্র নীংশিং কুমওন পাঙথোকখ্রে
ইম্ফাল, জুন ১০ : ২৪ শুবা অরাম্বম সোমোরেন্দ্র মার্তরদম নীংশিং কুমওন ঙসি সোসিয়েল স্তেন্দর্দ ক্লব খুরায় নান্দৈবম লৈকায় অমসুং অরাম্বম সমরেন্দ্র ত্রস্ত অনীনা খূৎশম্ননা শীন্দুনা অথৌবা অসিগী অরোইবা য়াতাফম ওইখিবা খুরায় নান্দৈবম লৈকায়দা লৈবা মহাক্কী মেমোরিয়েল কমপ্লেক্সতা পাঙথোকখ্রে।
লৈখিদ্রবা অথৌবা অসিগী মফমদা মিনিত অনী তুমিন্না লেপ্তুনা ইকায়খুম্নবা ঊৎপগা লোয়ননা মহাক্কী মীতমদা হৈকৎ-লৈকৎ তমদুনা পাঙথোকখিবা থৌরম অদুদা আইন্না থিংখ্রবা লালহৌলূপ য়ু এন এল এফকী হান্নগী চেয়ারমেন আর কে সনায়াইমা এলিয়জ মেঘেন, ইন্দিয়া গবর্নমেন্তকা পিছ তোক্কীদমক খূৎয়েক পীনবা পাম্বৈনা লুচিংবা য়ু এন এল এফকী এক্তিং চেয়রমেন এম নোংয়াই, জেনরেল সেক্রেতরি সিঐচ থানিল, সেক্রেতরি ওব ফাইনান্স আই তোনসনা, সেক্রেতরি ওব ঐচ আর দি এস তম্ফাজাও, সেক্রেতরি (ওপরেসন এন্দ ইকনোমিক এফিয়ার্স) এস পনখৈ অমসুং লালহৌলুপ অসিগী চেয়ারমেন (আর্মি ওয়েলফেয়ার) ঐচ তোমনৌ, তোঙান তোঙনাব সি এস ও, ইমা লূপ অমদি মহৈরোয় লূপকী থৌ পুবা অমদি থৌমীশিংনা শরুক য়াখি।
থৌরম অদুগী মতাঙদা সোসিয়েল স্তেন্দর্দ ক্লবকী ভাইস প্রেসিদেন্ত অসেম ইনাও মৈতৈনা হায়, অরাম্বম সমরেন্দ্র লৈখিদবগী কুমওন থৌরম অসি ঙসি ২৪রক শুবা ওইনা মফম অসিদা পাঙথোক্লি। মীয়াম্না ‘লময়ানবা’ হায়না খঙনরিবা সমরেন্দ্র অসি মায়থোং য়াম্বা লুচিংবা অমনি। মণিপুর অসি হেন্না চাওখৎহন্নবা শেন্মীৎলোনদা মীপাল তাংদবা অমদি ইরোমদোম লেপচবা ঙম্নবগী অচৌবা ঈথিল অমা মহাক্না খুন্নাই অসিদা পীরম্মী।
মহাক্না লৈখিদবা অসি খুন্নাই অসিগী ওইনা অচৌবা মাঙজবা অমনি। ঙসিগী লৈহৌরিবা মীরোলনা লময়ানবা অসিগী ৱাখল্লোন অসি কূপ্না নৈনদুনা মহাক্না পাম্লম্লিবা ইরোমদোম লেপচবা ঙম্বা অমদি মীপাল তাংদবগী পান্দম অসি ফংননবা হোৎনমিন্নসি। মণিপুরগী ওইরক্লিবা ফীবম অসিদা মহাক্কী ৱাখল অসি য়াম্না চুশিন্নবা অমা ওইরক্লে হায়না ইনাওনা ফোঙদোকখি।
নাকল অমরোমদা, চীংদোমপোক আইদিএল তোপ য়ুথ ক্লব, হৈরোক পার্ত ২ লিতান মখোঙনসু অরাম্বম সমরেন্দ্রগী নীংশিং নুমিৎ থৌরম হৈরোক পার্ত ২ সিতি ক্লাব প্লে গ্রাউন্দদা পাঙথোকখ্রে। লোয়ননা লমদমসিগী য়েলহৌ মশান্না অমা ওইরিবা মূক্না য়োকখৎনবগী পান্দমদা ককচীং পানা অমসুং হৈরোক পানা অনীনা য়েনদম্নবসু পাঙথোকখি।
থৌরম অদুদা পাম্বৈনা লুচিংবা য়ু এন এল এফকী ফাইনান্স সেক্রেতরী ইরেংবম তোনস্ননা অথোইবা মীথুং, চীংদোমপোক আইদিএল তোপ য়ুথ ক্লবকী প্রেসিদেন্ত নিংথৌজম ইবোমচানা থৌরম মপু অমসুং থৌবাল জিলা পরিষদ মেম্বার কেএচ সোভা, হৈরোক জিলা পরিষদ মেম্বর এম রাজমনি, পাম্বৈনা লুচিংবা য়ু এন এল এফকী এম পি এগী চীফ ওব আর্মি স্তাফ খ্বায়রাকপম খোম্বা, হৈরোক পার্ত-১, ২ অমসুং ৩ গী প্রধানশিং, লৈরোং থেল নিংঙেল জি পিগী প্রধান সলাম কুমার, উপকোগী প্রেসিডেন্দ ময়েংবম প্রেমজিৎ, ফোক্সকী প্রেসিদেন্ত তি ঐচ মনিহার, ভাইস প্রেসিদেন্ত বি এম শাহ অমসুং খুল ঙাকপা এম খাবনচিংবনা অখন্নবা মীথুংলেনশিং ওইখি।
থৌরমগী শরুক অমা ওইনা ঙসিগী মীথুংলেনশিংনা লুচিংদুনা লৈখিদ্রবা অরাম্বম সমরেন্দ্রগী ফোটোদা লৈ-শু কৎতুনা ইকায়খুম্নবা উৎখি। থৌরমগী অথোইবা মীথুং ওইখিবা পাম্বৈনা লূচিংবা য়ু এন এল এফকী ফাইনান্স সেক্রেতরী ইরেংবম তোনস্নানা লৈখিদ্রবা সমরেন্দ্রনা ইরমদম অসিগীদমক্তা তৌবিরম্বা থবকশিং শীংথাখি। লোয়ননা অসিগুম্বা নুমিৎ অসিদা ঐখোয়গী য়েলহৌ মশান্না ওইরিবা মুক্না য়োকখৎনবগী পান্দমদা মূক্না য়েন্দম্নবা শীনবগীদমক থৌরম শীল্লিবা ক্লবপুস থাগৎপা ফোঙদোকখি।
পাৱাফ (পেত্রিওত্রিক রাইতর্স ফোরাম), মণিপুরনা শীন্দুনা লৈখিদ্রবা মণিপুরগী শক্নাইরবা অইবা অমসুং মীয়ামগী লুচিংবা অরাম্বম সমরেন্দ্র লৈখিদবগী ২৪ শুবা নীংশিং থৌরম ঙসি লম্লাই এ সিগী মনুং চনবা চনাদা লৈবা নুংশিকোল পার্কতা পাঙথোকখ্রে।
পেত্রিওত্রিক রাইতর্স ফোরাম, মণিপুরনা নুংশিকোল পার্কতা অরাম্বম সমরেন্দ্রগী মীতমদা লৈশু কত্তুনা ইকায়খুম্নবা
থৌরম অদুদা শক্নাইরবা অইবা চনা লুখোইনা অথোইবা মীথুংলেন, পাৱাফকী ভাইস প্রেসিদেন্ত পি বিপ্রচান্দনা থৌরম মপু অমদি ফোরামগী পেত্রোন মেম্বরসু ওইরিবা বিরমঙ্গোল কলেজ, সওম্বুংগী মণিপুরী দিপার্তমেন্তকী ঐচ ও দি দাঃ লাইশ্রম লন্ধোনীনা অখন্নবা মীথুংলেন ওইখি।
থৌরম অদুগা মরী লৈননা চনা লুখোইনা হায়খি, লৈখিদ্রবা লুচিংবা অরাম্বম সমরেন্দ্র মরৈবাকপু থম্মোয় শেংনা নুংশিখিবা মীৎয়েং শানবা অইবনি। মহাক্না লৈবাক্কী ওইবা থৌরম অমগী ৱা ঙাঙলিঙৈদা শকখঙবশিংনা কাপ্লকপা নোংমৈ মরূনা পান্দুনা লৈখিদবা অসি ঐখোয়গী লমদম অসিগী অচৌবা মাঙজবা অমনি। মহাক (সমরেন্দ্র) করম্বা মীওইনো হায়বদু খঙলকপা মতুংসিদা মহাকপু নোংমৈনা কাপ্তুনা হাৎখিবা মীশিংদু ঙসিদি য়াম্না নিংঙমদবা ফাওরমগনি। ঙসি রাইতর্স ফোরাম অসিনা মহাক্কী মীতমদা লৈশু কত্তুনা ইকায়খুম্নরিবা অসিদা মহাক্না শোয়দনা অপেনবা পোক্লমগনি খল্লি।
ঙসিগী থৌরম অদুদা ‘মণিপুরগী নেসলিজমগী ঈহৌ শাগৎপদা অরাম্বম সমরেন্দ্র লৌখিবা থৌদাং” হায়বা হীরমদা ফিল্ম মেকর ও সি মৈরা, অইবী ক্ষেত্রিময়ুম সুবদনী, চনা লেম্বী অমসুং থাংজম ইবেমুনা ৱা ঙাঙখি।
ঙসিগী থৌরমদুদা বাংলাদেশতগী লাকপা মৈতৈ কয়াসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু