সোনামণি মেমোরিয়াল এৱার্ড হামোম প্রমোদতা অমসুং ই. রবিন মেমোরিয়াল এৱার্ড অহৈবম রনজিৎতা পিরগনি
মিরর ডেস্কঃ বাংলাদেশতা মণিপুরী সাহিত্যদা খ্বোয়াইদগী প্রেস্টিজিয়াস ওইরবা সাহিত্যগী মনা ‘সোনামণি মেমোরিয়াল এৱার্ড’ ২০২৩ কবি অইবা অমদি মণিপুরী মিররগী এডিটর ইন চীফ হামোম প্রমোদতা অমসুং ই. রবিন মেমোরিয়াল এৱার্ড কবি অহৈবম রনজিৎতা পিরগনি। বাংলাদেশ মণিপুরী সাহিত্য সংসদ (বামসাস) কী মাইকৈদগী শন্দোরকপা চেরোল অমদা পাউ অসি খংবা ঙমখি।
সোনামণি মেমোরিয়াল এৱার্ড অসি, এৱার্ড কমিটিনা কুপ্না নৈনরবা মখাদা লৌবা ৱারেপ মতুং ইন্না, মরু ওইনা বাংলাদেশতা সাহিত্য, সংস্কৃতি অমদি সমাজসেবাগী লমদা থোইদোক হেন্দোকনা থৌদাং লৌবিখিবা শক নাইরবা মীওইদা পীবা এৱার্ডনি। সন ১৯৮৪ দগি হৌদুনা হৌজিকফাওবদা মীওই ১৩ দা এৱার্ড অসি খুৎশিন্নখ্রে। মীওইশিংদুদিঃ শ্রী কাব্রাবম সুখমনি সিংহ (সংস্কৃতি), শ্রী টি কুঞ্জেশ্বর সিংহ (মরণোত্তর, সমাজসেবা), শ্রী এল ব্রজধন সিংহ (সংস্কৃতি), শ্রী শেনজম কামেশ্বর সিংহ (সংস্কৃতি), শ্রী এ কে শেরাম (সাহিত্য), শ্রী হামোম গৌর সিংহ (সংস্কৃতি), জনাব মো. আবদুল আহাদ (শিক্ষা), শ্রী খোইরোম ইন্দ্রজিত (সাহিত্য), শ্রী নিঙোম্বম চন্দ্রমোহন সিংহ মৃদঙ্গবাদন (ভানুগাছ), শ্রী লাইময়ুম জয়চন্দ্র শর্মা (নটসংগীত), শ্রী ফন্দোম সুরেন্দ্র সিংহ (মৃদঙ্গবাদন), শেরাম নিরঞ্জন (সাহিত্য) অমসুং হামোম তনুবাবু (সমাজসেবা)।
কবি হামোম প্রমোদ বাংলাদেশতা শৈরেংগী খোংচত্তা মডার্নিজম অমদি স্যুররিয়ালিজম ইহৌ পুরকপদা কবি শেরাম নিরঞ্জনগা লোয়ননা অমুক্তা শোন্নবা মীংনি। মখোই অনিনা মখাদা হৌরকখিবা নহা ওইবা অইবা কয়াদা অচাওবা ইনিল অমা পিবা ঙমখি। ‘ৱাখলগী নাচোম’ (১৯৯৫) অমদি ‘নাকেন্থানা লাকপদা’ (২০২৩) কৌবা শৈরেং লাইরিক অনি, বাংলাদেশ মণিপুরী সাহিত্য ও সংস্কৃতি (১৯৯৭), বাংলাদেশকী অখন্নবা মণিপুরী শৈরেং (২০১২), বাংলাদেশকী অখন্নবা ৱারেংশিং (২০১৭) কৌবা সম্পাদনা লাইরিক অমদি ‘কথা’ হায়না লিটল ম্যাগাজিন অমা তত্তনা সম্পাদনা তৌনা হৌজিকসু ফোঙলি। লোয়ননা এডিটর ইন চীফকী ফম পাইবিদুনা মণিপুরী মিরর ডট কোম হায়বা বাংলাদেশ মীতৈগী অহানবা নিউজ ওয়েবসাইট অমদি ডিজিটাল প্লাটফর্ম অসিগী খোংচত্তা অচৌবা থৌদাং লৌবিরি।
ডিসেম্বরগী তাং ১মা দা পাংথোক্কদবা বামসাসকী চহীগী মিফম অমসুং লাইরিক ফোংবগি থৌরমদা, মপান লমদমগী মীহুৎশীং যাওদুনা চংখোল্লবা থৌরম অমদা এৱার্ডশিং অসি খুৎশিন্নগনি হায়না শন্থোরকপা চেরোল অদুদা খংহনলকখি।
0 কমেন্ট:
কমেন্ট তৌবিয়ু