সাহিত্য পরিষদকী ৬০ শুবা মপোক কুমওন ‘ডায়মন্ড জুবিলি’ থৌরম পাঙথোকখ্রে
আগরতলা, ডিসেম্বর ২৯ : ইংকুমজা ১৯৬৩ দা শাফোংখিবা মণিপুরী সাহিত্য পরিষদ, ত্রিপুরাগী চহী ৬০ শুবা মপোক কুমওন ‘ডায়মন্ড জুবিলি’ থৌরম পাঙথোকখ্রে। নুমিৎ নিনি চুপ্না মফম অনীদা পাঙথোকখিবগা লোয়ননা ইং ২০২৪-২৫ চহী অনীগী দমক অনৌবা কমিটিসু শেমখ্রে। ডায়মন্ড জুবিলি থৌরম অদু চীফ গেষ্ট ওইখিবা ত্রিপুরাগী চিংমী য়াইফা মন্ত্রী বিকাশ দেববর্মানা মৈরা চুখত্তুনা হৌদোকপীখি।
ডায়মন্ড জুবিলি থৌরমগা মরী লৈননা ফোঙবা ‘তখেন লৈরাং’ মেগাজিন
পরিষদকী ভিপি সেলৈবম খেলামোহননা থৌরম মপু ওইরগা গেষ্ট অব অনার ওইনা ও. এন. জি. সিগী ভিজিএম ওইরম্বা ময়েংবম বিভাস কান্তি সিনহা, সেন্ট্রাল য়ুনিভার্সিটি পোত্থারবা প্রোফেসর ক্ষেত্রিময়ূম রবীন্দ্র সিংহ অমসুং নিকোলগী ডিরেক্টর ড. নির্মল দাস না গেষ্ট অব ওনার ওইখি। ডায়মন্ড জুবিলি থৌরমগা মরী লৈননা পরিষদ অসিনা ফোঙবা ‘তখেন লৈরাং’ হায়বা মেগাজিন অমা অমসুং লৈখিদ্রবা শক্নাইরবা অইবা নিঙথৌখোংজম দিলীপ কুমার সিংহনা ইদুনা থম্বীরম্বা ‘লৈরি নঙদি থম্মোয় নুংদা’ হায়বা ত্রিপুরাদা ইহান হানবা উপন্যাস লাইরিক্কী মায়খুমসু হাংদোকপীখি। থৌরম অদুদা হন্দক চহী ত্রিপুরাদগী ইহান হানবা ওইনা সাহিত্য একাডেমি এৱার্ড ২০২৩ গী দমক মমিং লাওথোকখ্রবা ত্রিপুরাগী শক্নাইরবী অইবী সোরোকখাইবম গম্ভিনীবু পরিষদকী মাইকৈদগী ওক্তুনা ইকাইখুম্নখি। লোয়ননা মরূপ পাউচেগী আরকে তরুনজিৎ অমসুং আমন বার্তাগী অমিয় সিনহাবুসু পরিষদ মাইকৈদগী তরাম্না ওক্তুনা ইকাইখুম্নখি।
হাওখোম বঙ্কিমদা ‘ভূপেন্দ্রজিৎ নীংশি মনা’ পিদুনা ইকায়খুম্নবা
থৌরমগী মখা চত্থরকপদা তোঙান তেঙানবা লমদা মশক নাইরবা মীওই ৭ অমসুং খ্বাইদগী অফবনি হায়বা লাইরিক্কী অইবী নচিংববু মনা মথুম লান্থোক্তুনা ইকাইখুম্নখি। মদুদা গৌরনগরগী অরিবা পালা শৈশকপা এন প্রফুল্ল দত্তদা ‘এন চন্দ্রহাস নীংশিং মনা’ পাঙনবম রমেন্দ্রদা ‘কে চন্দ্রকুমার লাইফ টাইম এচিভমেন্ট’ আরকে কামিনীজিৎতা ‘সুরেন্দ্রজিৎ বিধু নীংশিং মনা’-কেএইচ উপেন্দ্রনা ‘বাবুধন নীংশিং মনা’ ডাঃ এস বুদ্ধচন্দ্র সিং চৌধুরীদা ‘গোকুল নীংশিং মনা’ সিএইচ স্বপ্নাদা ভূপেন্দ্রজিৎ নীংশিং মনা’ এইচ বঙ্কিমদসু ‘ভূপেন্দ্রজিৎ নীংশি মনা’ অমসুং সিজা মলিনানা ইবা মাগী শৈরেং লাইরিক্কীদমক
‘লৈহাও-তেম্বী নীংশিং মনা’ পীদুনা ইকাইখুম্নখি। থৌরমগী মখা তাবদা সাহিত্য একাডেমিগা খুৎশম্নরগা পাঙথোকখিবা সাহিত্য পরিষদকী ফাউন্ডার সেক্রেটারী লৈখিদ্রবা আরকে কমলজিৎ সিংহবু ইকাইখুম্নরদুনা ‘লিটরেরী ফোরাম ওন লাইফ এ্যন্ড ৱার্ক অব আরকে কমলজিৎ সিংহ’ হায়বসিদা এন প্রফুল্ল বিজয়, এল বীরমঙ্গল অমসুং ৱাংখেম বীরমঙ্গলনা তোঙান তোঙানবা পেপার অহুম পাথোকখি। থৌরম অদু ময়েংবম মৃনাল কান্তিনা চেয়ার লৌদুনা পাঙথোকখি।
নিনি শুবা নুমিৎ ত্রিপুরা ষ্টুডেন্ট হেলথ হোমগী হোলদা সাহিত্য একাডেমিগা খুৎশম্নরগা ‘যুব সাহিতি’ হাযবা থৌরম অদু কোলকাতাগী শক্নাইরবী মণিপুরী কবি এন রঞ্জিতা সরকারনা চেয়ার লৌরগা কবি মঙানা মশা মশানা ইবা শৈরেং পাঙথোকখি। কবিশিং মখেয়া অদুদি কে অপুর্বিতা, এল মীনা দেবী, পিএইচ পুষ্পিতা, কে রঞ্জনা অমসুং কেএইচ সৈব্যা সিংহনা শৈরেং পাথোকখি।
ডায়মন্ড জুবিলি থৌরমদা লেপ্নখিবা ৱারেপ মতুং ইন্না পরিষদকী ব্রাঞ্চ অহুম লিংখৎকনি হায়রি। হায়রিবা ব্রাঞ্চশিং অদুদি ধর্মনগর, কমলপুর অমসুং বামুটিয়া ওইরবা য়াই হায়রি।
অরোইবদা পরিষদ অসিগী ২০২৪-২৫ চহী অনীগী অনৌবা কমিটিসু শেমখ্রে। কমিটিদা এল বীরমঙ্গলবু প্রেসিডেন্ট ওইনা হাপখ্রে। ভাইস প্রেসিডেন্ট অনী এস খেলামোহন অমসুং ড. কেইচ রবীন্দ্র কুমার, জেনারেল সেক্রেটারী ওইনা থৌদাম নীলকুমার, এসিঃ সেক্রেটারী অনী কে অতুল অমসুং কে সারিতা, ট্রেজারার ওইনা এন রঘুনন্দন অদুগা ‘তখেন লৈরাং’গী ইডিটর ওইনা কে ধীরেন, ওফিস সেক্রেটারী ৱাই অঙ্কুর। মেম্বারশিংদি এল কুমার, টি যোগেন্দ্র, সিজা মলিনা, অহৈবম রবীন্দ্রকুমার, মাইবম মৃনাল, নরুল হক, এম প্রদ্যোত, কেএসএইচ জীতেন, সিজা গুরুময়ুম অভিজিৎ ভট্টাচার্য্য, এল মীনা দেবী, আরকে তাপসজিৎ, হৈগ্রুজম ওংবী গন্ধেশ্বরী, টি নিখিলেশ অমসুং খুমন্থেম ওংবী সৈব্যা অসিনি। অদুগা এডভাইজর ওইনা আরকে জিতেন্দ্রজিৎ, ময়েংবম মৃনাল কান্তি, য়ুম্নমা চন্দ্রকীর্তি, এন নিরঞ্জন দত্ত, এন প্রফুল্ল বিজ, থাংজম রথীন্দ্র অমসুং ৱাংখেম বীরমঙ্গল সিংহ।
সোর্স : মরূপ
0 কমেন্ট:
কমেন্ট তৌবিয়ু