সমরেন্দ্র অমসুং সোনমণিগী মপোক কুমওনগা মরী লৈননা সেমিনার পাংথোকখ্রে
ইম্ফাল, ওক্টোবর ৪ : লমদম অসিগী শক্নাইরবা অইবা লাইশ্রম সমরেন্দ্র অমদি এলাংবম সোনামণি অনীগী চাম্মা শুবা মপোক কুমওনগা মরী রৈননা লাইফ এন্দ ৱার্ক্স ওব লাইশ্রম সমরেন্দ্র এন্দ এলাংবম সোনামণি হায়বা হীরম অসিদা নুমিৎ নীনীগী ওইবা ইন্তরনেসনেল সেমিনার অমা ঙসি স্তেত সেন্ত্রেল লাইব্রেরি, ইম্ফালগী ওদিতোরিয়ামদা হৌদোকখ্রে।
ফিক্সন এন্দ পোইত্রি ক্লব, মণিপুরনা স্তেত সেন্ত্রেল লাইব্রেরি, আসাম য়ুনিবর্সিতিগী মণিপুরী দিপার্তমেন্ত, খা মণিপুর কলেজ ককচীং অমদি এন জি কলেজগী আই ক্যু এ সিগা খূৎশম্নদুনা অমসুং লাইশ্রম সমরেন্দ্র অমদি এলাংবম সোনমণিগী ইমুং-মনুংগা লোয়ননা থৌরম অদু পাঙথোকখি।
থৌরম অদুদা চীফ গেস্তকী ৱারোল পীরদুনা দি এম য়ুগী ভাইস চাঞ্চেল্লর প্রোঃ ৱাহেংবম চান্দবাবুনা হায়, লাইশ্রম সমরেন্দ্র অমদি এলাংবম সোনমণি অনীমক ১৯২৫ দা চপ মান্নবা থা অমদা পোক্তুনা লিতরেচরগী লম অসিদা অচৌবা খুদোল কয়া তম্বীরম্বা অসিমক লমদম অসিগী ওইনদি য়াম্না চাউথোকচনিংঙাইনি।
মণিপুর খুন্নাইদা থেংনরিবা শীংনবা ময়াম অসিগী মনুঙদা অইবা অইবীশিংনা ইরিবা ৱারেং, শৈরেং শিং পাবিনবা মী মশীং শিথরকপা অসি য়াম্ন মীপাইনিংঙাই ওইবা ফীবম্নি। নহা ওইরিবা মীরোলশিংনা কৈথেলদগী লাইরিক লৈরগা পাদবগী চৎনবী অমা লাক্লে। মখোয়না দিজিতেল ৱার্ল্ডদা মীৎয়েং থমদুনা দিজিতেল ওইনা ফংবা শরুকখক্তমক শীজিন্নরি। মসি শীংনবনি হায়গদৌরিব্র নৎত্রগা খুদোংচাবনি হায়গদৌরিব্রা হায়বা অসি নৈনবা অমা চঙই।
মহাক্না হায় মণিপুরী লোন অমসুং লিতরেচর নৎত্রগা ইংলিশ লোন অমদি লিতরেচরনচিংবা লিতরেচরগী কোর্স অমদি প্রোগ্রামশিং তম্নবগী মচাক মথুম শেমগৎলকপদা মচাকশিং কদায়দগী লাক্কদৌরিবনো হায়বা অসি নৈনবা চঙই। ঙসিদগী চহী ৫০ গী মমাঙদা তমখিবা সিলেবস অদু অদুম তমদুনা লৈবদি য়ারকপা নত্তে। য়ুনিবার্সিতিশিংদা ইমপ্লিমেন্ত তৌরিবা কোর্স অমদি প্রোগ্রামশিং অসি মতমগী মতুংইন্না সিলেবস অমদি করিক্যুলম অসি এমেন্দ, রিভাইস অমদি আপগ্রেড তৌরিবনি। মসি তৌরিবগী মরমদি এদজুকেসন হায়বা অসিমক খুন্নাইগা চুনবা মওং দা থম্ননবনি। এদজুকেসন হায়বা অসিমক খুন্নাই অসিগা চুননা চৎত্রবদি এদজুকেসনগী ৱাহন্থোক লৈরক্লোই।
মহাক্না মখা তানা হায়, মণিপুরী লোন অমদি লিতরেচর নৎত্রগা ইংলিশ লোন অমদি লিতরেচরগা নৎত্রগা মসিগা মরী লৈনবা লমশিংদা রিছার্স তৌগে হায়রবদি খুন্নাই অসিনা পাম্লিবা চুনবা মচাক অদু এমেন্দ তৌনবগীদমক্তা অনৌবা লিতরেচর, অনৌবা ৱাখল্লোনশিং খোমজিন তাশিন্দুনা ইমপ্লিমেন্ত তৌবা দরকার তাই। মদু নৎত্রবদি লিতরেচর অমদি লোনগী লমদা তমগদৌরিবশিং অসি খুন্নাই অসিগা চুনবা মওংদা জ্ঞান লৌশিং পীবা ঙম্লোই। পূম্নমক অসি য়েংলগা মণিপুর খুন্নাই অসিদা অইবশিং অসি য়োকখৎমিন্নবগী থৌদাং অসি খুন্নাই অসিদা লৈরিবা মীপুম খুদংমক্না অমত্তা ওইনা লৌফম থোকই।
চান্দবাবুনা মখা তানা হায়, অইবা অইবীশিং য়োকখৎপদা একাদমিক ইনস্তিত্যুসনশিংগী থৌদাং অসি য়াম্না চাউই। মসিগী মথক্তা নহা ওইরিবা মীরোলশিং অসি লাইরিক লৈবা অমদি পাবগী হৈনবী লৈহনবা অমা চঙই। ইনস্তিত্যুসনশিংদা হাংলিবা লাইব্রেরিশিং অসিদি ইনস্তিত্যুসন অসিগী মহৈরোয় নত্তনা অতৈ লাইরিক পানিংবশিংনা লাক্তুনা লাইরিক পাবগী খুদোংচাবা লৈতে। মসিসু মীপাইনিংঙাই ওইবা ফীবম অমনি। খুন্নাই অসিবু শেমগৎনবগীদমক্তা দি এম য়ুদা মথোন ৩ ওইবা সেন্ত্রেল লাইব্রেরি অমা শাগৎলক্কদৌরিবা অসিগী গ্রাউন্দ ফ্লোরদা অচৌবা সেক্সন অমা হাপকনি। মসিদা নহা অঙাং খাক্তনা লাইরিক পানিংবা মী খুদীংমক্তা পূং ২৪ লাইরিক পাবগী খুদোংচাবা ফংহনগনি। লাইব্রেরি শেমগৎপা অসিদা মণিপুর গবর্নমেন্তনসু মীৎয়েং চঙবিরক্কনি হায়বগী থাজবা থম্লি।
মহাক্না হায়, মণিপুরী খুন্নাইগী কলচর অমদি হেরিতেজ অসি এদজুকেসন্দা মমি তাগনি। লমদম অসিগী করচর অমদি হেরিতেজ অসি য়োকখৎতুনা অমদি ঙাক্তুনা থম্নবগীদমক্তা মসিদা য়াওরিবা ফজরবা ৱাখল্লোন, মচাক অমদি মগুণশিং অসি অইবশিংনা ইথোক্তুনা খুন্নাই অমদি মালেম অসিদা খুদোল তম্বা মথৌ তাই। মদু নৎত্রগদি ঐখোয়গী কলচর মশক তাকপা ৱাগনি। মণিপুরগী কলচর অসি ইনাক খুলহনগে হায়রগদি অইবশিংনা লৌগদবা থৌদাং অসি য়াম্মী। মসিদা নত্তনা গবর্নমেন্ত অমদি একাদমিক ইনস্তিত্যুসন্না লৌগদৌরিবা থৌদাং অসিসু মরুওই।
অমরোমদা মহাক্না হায়, হৌজিক অসি দিজিতেল ৱার্ল্ডদা চঙশিল্লক্লিবা মতমনি। এ আইগী মরুওইবা অসি লাক্লবনিনা এম তি য়ুদা এ আই সি লিতরেচর স্তদিজ অমদি রিছার্সতা করম হায়না তুনা চৎমিন্নগনি হায়বগী মতাঙদা খন্নবা হৌরে। দি এম য়ুগী সেন্তর ফোর লেংগ্বেজ লার্নিংদা লোনখক্কী ওইবা প্রোগ্রাম পায়খৎতুনা অপাম্বা লোনশিং তম্বগী মথক্তা মণিপুরী লোন অসি তোঙান তোঙানবা লৈবাক অমদি স্তেতশিংদা তম্বীনবগী পান্দম থম্লি। তোঙান তোঙানবা লৈবাক্তা খুন্দারিবা মমালোন ময়েক শেংনা ঙাঙবা থোক্ত্রবা মণিপুরীশিংগীদমক্তা কমুনিকেতিব মণিপুরীগী কোর্স ওনলাইনগী খূত্থাংদা তৌগনি। মদু ওইরবদি অইবা অইবীশিংনা ইরিবশিং অসি মখোয়সু পাবা ঙম্লক্কদৌরিবনি।
মহাক্না মখা তানা হায়, ইনস্তিত্যুসনশিংনা লোন তম্বগী খুদোংচাবা অমা পীবগী মতুং ইন্না লোন অসি তম্লবা মতুং পাবগী শক্তি অদু লৈরক্লবদি ঐখোয়গী লৈরিবা লাইরিকশিং অসি কৈথেলদা দিমান্দ হেনগৎহন্নবা হোৎনমিন্নবা অমা চঙই। লোন ইনাক খুলহনবা হায়বা অসি ঐখোয়গী লোন্দা লৈরিবা লিতরেচর অসি পাবা অমদি লোন অসি ঙাঙবা ঙম্বা মীশিং চঙই। লোন অসি ঙাঙবা মীশিং য়ামদ্রবদি লোন অসি নোংমা নোংমগী শিথরক্কনি। ঐখোয়গী লোন্দা লাইরিক ময়াম অমা ইরগসু পাবিনবা মীশিং হন্থরক্লবদি অইবশিংদা লৈরিবা ৱাখল্লোনশিং অসি ফোঙদোক্লিংবগী ৱাখল্লোন পোক্লক্লোই। মরম অদুনা নুমিৎ নীনীগী সেমিনার অসিদা লাক্কদৌরিবা চহীশিং অসিদা এদজুকেসন সিস্তেমদা লোন অমদি লিতরেচরগী মহাও অসি করম হায়না পীগনি হায়বসিদা নৈনবসি য়াম্না মরুওইবা অমা ওইগনি।
ফিক্সন এন্দ পোইত্রি ক্লব, মণিপুরগী প্রেসিদেন্ত থৌদাম নেত্রজিৎনা প্রিসাইদ তৌখিবা থৌরম অদুদা স্তেত সেন্ত্রেল লাইব্রেরি, ইম্ফালগী চীফ লাইব্রেরিয়ান দাঃ আর কে উর্মিলা, আসাম য়ুনিভার্সিতিগী মণিপুরী দিপার্তমেন্তকী হেদ দাঃ হাওরোংবম রাজমণি অমদি এনজি কলেজ লম্ফেলগী প্রিন্সিপাল প্রোঃ শামুরাইলাৎপম শান্তিবালা দেবীনা গেস্ত ওব ওনর ওইনা শরুক য়াখি।
সেমিনার অসিগী ঙসি অহানবা নুমিত্তা প্রোঃ পোলেম নবচন্দ্রনা মোদরেতর ওইখি অমদি তোঙান তোঙানবা এক্সপার্তশিংনা ‘লাই এন্দ ৱার্ক্স ওব লাইশ্রম সমরেন্দ্র’ হায়বা হীরম অসিদা পেপর পাথোকখি।
সোর্স: পোক্নফম
0 কমেন্ট:
কমেন্ট তৌবিয়ু