লাইনিংহল নাওরিয়া ফুলোগী ১৩৬ শুবা মপোক কুমওন থৌরম পাঙথোকখ্রে
ইম্ফাল, আগস্ত ২৫ : মীতৈ মরূপ, মীতৈ লৈপাক (মণিপুর) না শীন্দুনা লাইনিংহল নাওরিয়া ফুলো (ফুন্দ্রৈ) গী ১৩৬ শুবা মপোক কুমওন নীংশিং থৌরম ঙসি ৱাংখৈ থম্বালখোংদা লৈবা মীতৈ শঙলেন্দা পাঙথোকখ্রে।
থৌরম অসিগী নুংগী ওইবা ৱারোল পীরদুনা মীতৈ মরুপ, মীতৈ লৈপাক (মণিপুর) গী সেক্রেতরি জেনরেল অঙোমচা সেরাম গোজেন্দ্রো মীতৈনা হায়, ইং ১৯৪৫ দগী লাইনিংহল নাওরিয়া ফুলো (ফুন্দ্রৈ) গী মপোক কুমওন নীংশিং থৌরম অসি পাঙথোরকখিবনি। মীতৈ হিঙ্গৎ ঈহৌদা লাইনিংহল নাওরিয়া ফুলো (ফুন্দ্রৈ) না মাঙজিল থানা থৌদাং কয়া লৌরমখি। মপানগী লাইনীং অমসুং পোলিতিকেলগী ওইবা ঈথিলনা মীতৈগী ওইবা পূম্নমক মাঙলুরে।
তশেংনা মীতৈ খুন্নাই অসি খাঙেনফম য়ৌরুরবনি। অদুমকপু লৈখিদ্রবা লাইনিংহলনা তাশিন-খোমজিল্লক্তুনা অমুক হন্না মীতৈ খুন্নাই অসি হিংগৎহল্লকখিবনি। ঙসিগী মীরোলনা মীতৈ অমা ওইনা চাওথোক্না হিংবা অমদি চেনবা-চোংবা ঙম্লিবা অসিমক মহাক্কী হোৎনজমলগী মপালদগী ঙম্বনি হায়বদা থোইদোক্না হায়মনবা থোক্লোই হায়না ফোঙদোকখি। ঙসিগী থৌরম অদুদা শরুক য়াখিবশিংনা লাইনিংহল নাওরিয়া ফুলো (ফুন্দ্রৈ) গী ফোতোদা লৈ-শু কৎতুনা ইকায় খুম্নখি।
অমরোমদা, লাইনিংহল নাওরিয়া ফুলো (ফুন্দ্রৈ) মেমোরিয়েল চেরিতেবল ত্রাস্ত (লাইনিংহল ত্রস্ত) নসু ১৩৬ শুবা লাইনিংহল নাওরিয়া ফুলোগী মপোক কুমওন নীংশিং থৌরম পাঙথোকখ্রে।
ইম্ফাল ইস্তকী য়ৌরবুংদা ঙসি পাঙথোকখিবা থৌরম অদুদা অপোকপা মরূপ শীংজমৈ অকাম্পাৎকী প্রেসিদেন্ত থোকচোম কুবেরনা থৌরম মপু, ইবংঙো হৈশিংবনা অথোইবা লেঙবিরকপা অমসুং সেরাম দেবসিংনা মরুওইবা তাঙবলদা ফমখি। থৌরম অদুদা লাইনিংহল নাওরিয়া ফুলোগী মরমদা তোঙান-তোঙানবা ৱাঙাঙলোয়শিংনা মরীক চুম্বা ৱাফম কয়া ফোঙদোক্নখি হায়নসু অপোকপা মরূপ লাইনিংহল ত্রাস্তকী মায়কৈদগী থাদোরকপা চেরোল অমনা হায়রি।
সোর্স: পোক্নফম
0 কমেন্ট:
কমেন্ট তৌবিয়ু