কে রাধাবিনোদ শর্মাবু ''লন্ডন এৱার্ড ওফ এক্সিলেন্স ২০২৫’ পীদুনা ইকাইখুম্নখ্রে
আগরতলা, সেপ্টেম্বর ২০ : লাইয়েকপগী লমদা ভারতকী ৱাংমদা মমিং চৎলবা তখেনগী মৈতৈ মচা কে রাধাবিনোদ শর্মাবু ইউনাইটেদ নেশন্স গ্লোবেল পীছ কাউন্সিলনা মাগী থোইদোক হেন্দোকপা থৌদাং কয়াবু শক খঙলদুনা লেমজনিংঙাই ওইরবা ‘লন্ডন এৱার্ড ওফ এক্সিলেন্স ২০২৫’ পীদুনা ইকাইখুম্নখ্রে।
চৎখিবা সেপ্টেম্বর ৫, লন্ডনগী হাউস অব লর্ডসতা পাঙথোকখিবা থৌরম অমা লর্ড রাণী রেঞ্জার, ড. কৃষ্ণা পূজারা অমসুং ড. বরখা শর্মানা এৱার্ড অসি মহাক্কী মখুত্তা খুৎশিন্নখিবনি।
ইমা ফাউন্ডেশনগী ফাউন্ডার অমদি আর্টিষ্টিক ডিরেক্টর কে রাধাবিনোদ শর্মা প্রোফেশনেল আর্টিষ্ট অমা ওইনা মতম কুইনা লন্ডনদা লৈরগা ভারতকী কলা সংস্কৃতিবু য়োকখৎনা থম্বগা লোয়ননা আর্ট এক্সিব্যুশন, ভারত-ইউনাইটেদ কিংডোম লৈবাক অনীগী নুংশি মরীদা মখল কয়া প্রোজেক্টগী খুত্থাংদা মহাক্না হোৎনদুনা কলচারেল এক্সচেঞ্জনচিংবা অচৌবা থৌদাং কয়াসু লৌদুনা লাকখিবনি। লন্ডনদগী টেলিফোন্দা মরূপ পাউচেগা ৱারী শান্নবদা মহাক্না হায়, ঐ কমলপুরদা পোকচবনি। ঐগী পোক্নফম ত্রিপুরাবু নুংশিজৈ। ঐগী হৌরকফমবু কাওবা য়াদবগুম কালচার য়াওদনা শক্তাকপুস য়াদে। মীওইবা সভ্যতাগী পুন্সিদা জগোই ঈশৈ নোংমাই, শান্ন-খোৎনবা নচিংবগা লোয়ননা ফাইন আর্ট অসিসু য়াম্না মরু ওইরিবনি। মসিবু মীরাইবা য়াদে হায়না ফোঙদোকখি।
রাধাবিনোদ শর্মা, ইং ১৯৬৪, নভেম্বর ১৯ দা ধলাই জিলাগী কমলপুর মৈতৈ খুনদা পোকই। অপোকপগী মিং শ্রী কুঞ্জ শর্মা, অপোকপী শ্রীমতী কুঞ্জবতী শর্মা অনীমক মণিপুরদগী হোংলকপনি। অপোকপী কুঞ্জবতী শর্ম্মা সংস্কৃতি সেবীনি, ত্রিপুরা লৈঙাক্কী পাব্লিসিটি (আই. সি.এ) লোয়শঙদা থবক তৌরম্মী, ইং ১৯৯৯ দা লেখিদ্রে। মচিল মনাও অনীগী মনুংদা রাধাবিনোদ শর্মা অনীশুবনি। আগরতলা রাধানগরদা লৈবা ময়াম্বা জ্ঞানেন্দ্র শর্মা ত্রিপুরা লৈঙাক্কী এগ্রিকালচার অফিসার ওইনা থবক্তগী পোত্থাখ্রে। রাধাবিনোদ শর্মা, বোধাজং স্কুলদা তম্লম্লবসু ইং ১৯৮২ দা অভয়নগর স্কুলদগী মেত্রিক পাশ তৌখি।
ইং ১৯৮৩ দা ত্রিপুরা গভর্নমেন্ট আর্ট কলেজ মথংদা নোংচুপ বাংলাগী শান্তি নিকেতন বিশ্ব ভারতী কলা ভবন্দগী ইং ১৯৮৯ দা ডিপ্লোমা ইন পেইন্টিংতা গোল্ড মেডেল লৌরকখি। ইং ১৯৯১ দা মহাক ক্রিয়েটিভ পেইন্টিংসতা পোষ্ট গ্রেজুয়েশন লৌখি। ইং ১৯৯১ দা কেনোরিয়া ষ্টুডিও ফেলোশীপ, ইং ১৯৯২ দা এলিজাবেথ্ গ্রীণশিল্ড ফাউন্ডেশন গ্রান্ট, ইং ১৯৯৪ দা চার্লস ৱালাস ট্রাষ্ট, লন্ডন অমসুং ডেলফিনা ষ্টুডিও রেসিডেন্সি এৱার্ড ফংখি। লন্ডনদা ফেলোশীপ লৌদুনা চৎপসি ভারত্তা মহাক্না ইহান হানবনি। লন্ডনগী মমিং চৎলবা আর্ট গ্যালারীদা পাঙথোকপা এক্সিব্যুশন কয়াদা মাগী অয়েকপা পেইন্টিংস কয়া ডলারগী মমলদা ৱাংনা লৈবসু য়াওনখি। অর্পিতা সিংহ’বু নীংশিংদুনা চৎলিবা চহী ২০২৫, লন্ড (ইউ.কে) গী সার্পেন্টাইন নর্থ গ্যালারীদা সোলো এইক্সব্যুশন তৌখি। লাক্লিবা চহী ২০২৬ দা গ্লোবেল পীছ থীমদা ইউ. কে, ফ্রান্স, ইজরায়েল অমসুং ইন্ডিয়াদা ইন্টরনেশনেল ওর্গানাইজেশন কয়ানা পুন্না পাঙথোক্কদবা অচৌবা আর্ট প্রোজেক্ট অমদা মহাক ক্যুরেটর ওইনা ডিজাইনিং অমদি শীল্লাংবদা শরুক য়াগনি হায়রি।
ইং ২০০৮ দা মহাক্না ইমা ফাউন্ডেশন ইংল্যান্ডদা লিংখৎখি। টেলেন্ট আর্টিষ্টশিংবু থৌগৎপগা, ইং ২০১৭ দা বেলজিয়াম (ইউনেস্কো) দা পাঙথোকপা হিউমেনিটিস কনফারেন্সতা থাং-তা এক্সপার্ট ওইনা শরুক য়াখি, ইং ২০১৯ দা ইমা ফাউন্ডেশননা ত্রিপুরাগী জিওন হিল স্কুলগী য়েলহৌমী অঙাংশিংগী জিওন হিল স্কুলগী য়েলহৌমী অঙাংশিংগী য়াইফনবা থবক কয়াদসু থৌগৎখি। এক্সপার্ট অমা ওইনা আগরতলা দা ইন্টারনেশনেল উড কার্ভিং ক্যাম্পতা য়াওখি। ভারতকী মফম কয়াদা পাঙথোকপা এক্সিব্যুশন্দা মাগী সোলো পেইন্টিংস কয়াসু উৎখি। ত্রিপুরাগী আগরতলা, মুম্বাই, ব্যাঙ্গালুর, কলিকাতা, লক্ষ্ণৌ, আহমেদবাদ নচিংবা নেশনেল পেইন্টিংস এক্সিব্যুশনদা শরুক য়াখি। মহাক্কী পেইন্টিংস এক্টিব্যুশনদা শরুক য়াখি। মহাক্কী প্রোজেক্ট কয়াদা অৱাং নোংপোক ভারত অমসুং মৈতৈ মচাশিংবু থৌগৎপা মহাক্কী পান্দমনি হায়রি।
সোর্স: মরূপ
0 কমেন্ট:
কমেন্ট তৌবিয়ু