আপডেট:
image

রিচার্লিসনগী গোলনা ব্রাজিলনা সার্ভিয়াবু ২-০ দা মায়থীবা পীখ্রে

কাতার, নভেম্বর ২৫: শাগোলশেন নুমিৎকী নোংয়াই মতুংদা লুসেল ষ্টেদিয়ামদা শান্নখিবা গ্রুপ জি গী মেটচ অমদা রিচার্লিসননা চনখিবা গোল ২গী মতেংনা ব্রাজিলনা সার্ভিয়াবু ২-০ দা মায়থীবা পীখ্রে। টিম অনীনা অহানবা হাফকী শান্নবদা লম্বা মান্ননা শান্নদুনা গোল অমত্তা চান্নদনা দ্রো ওইখি। অনীশুবা হাফ হৌরকপদগী ব্রাজিলনা খূদুম চন্না শান্নখিবগা লোয়ননা রিচার্লিসননা শান্নবগী ৬২ শুবা মিনিটতা মেটচকী অহানবা গোল চনবা ঙমখি। মহাক্না মখা তানা শান্নবগী ৭৩ শুবা মিনিটতা ব্রাজিলগী মায় পাকপগী ২ শুবা গোল চনবা ঙমখিবনি।

অমরোমদা কেপ্টেন এন্নর ভেলেন্সিয়ানা অনীশুবা হাফতা চনখিবা গোলগী মতেংনা ইক্কেদোরনা নেদারলেন্দসকা ১-১দা ঙসি নুমিদাং খালিফা ইন্টারনেসনেল ষ্টেদিয়ামদা শান্নখিবা গ্রুপ এগী মেটচ অমদা ড্রো ওইখ্রে। নেদারলেন্দসকী কোদি গোকপোনা শান্নবা হৌরকপগী ৬ শুবা মিনিটতা মেটচকী অহানবা গোল চনবা ঙমখি। ভেলেন্সিয়ানা অনীশুবা হাফকী শান্নবগী ৪৯ শুবা মিনিটতা ইক্কেলাইজ গোল চনবা ঙমখি। গোল অসি মহাক্কী ৱার্ল্ড কাপকী অহুমশুবা গোলনি। হৌজিকফাওবদা টিম অনীমক্না পোইন্ট ৪/৪ ফংলগা নোক আউট ষ্টেজ চঙবা য়াবগী থাজবা চাওনা লৈরি।

অমরোমদ, অতোপ্পা ঙসি নুংথিল আহমদ বিন অলি ষ্টেদিয়ামদা শান্নখিবা গ্রুপ বিগী মেটচ অমদা ইরাননা ওয়েলসপু ২-০ দা মায়থীবা পীখ্রে। ঙসিগী মায় পাকপা অসিনা ইরানবু ৱার্ল্ড কাপকী নোক আউট ষ্টেজ য়ৌবগী থাজবা নকশিনহনখ্রে। মেটচ অসিদা টিম অনীগী মায়কৈদা গোল চন্নবা ঙম্নদনা লাকখিবা অদু নোর্মেল টাইম লোইরমদাই মিনিট ৪ ৱাৎলিঙৈ ওয়েলসকী গোলকিপার ওয়েন হেননেসসেবু রেফারিনা দাইরেক্ট রেদ কার্দ পীদুনা ফিল্ডদগী মপান থোকহনখি। মদুগী মতুং ইরাননা মী অমা ৱাৎপগী খূদোংচাবা লৌদুনা হেন্না কন্না শান্নখিবগা লোয়ননা রুজবে চেশমিনা মেটচ লোইরমদাই ইঞ্জ্যুরি টাইমগী ৮ শুবা মিনিটতা ইরানগী অহানবা গোল চনবা ঙমখি। গোল চনখিবগা ইকান কান্নদনা ইরানগী কাউন্টার এটেক অমদা রামিন রেজাইয়ননা গোল অমগা হাপচিন্দুনা ওয়েলসপু ২-০ দা মায়থীবা পীখিবনি।

অতোপ্পা ঙসি নুমিদাংরাইরম আল থুমামা ষ্টেদিয়ামদা শান্নখিবা গ্রুপ এগী মেটচ অমদা সিনেগালনা হোষ্ট টিম কাতারবু ৩-১ দা মায়থীবা পীখ্রে। বাওলে দিয়ানা অহানবা হাফ লোইরমদাইশান্নবগী ৪১ শুবা মিনিটতা সিলেগালগী অহানবা গোল চনবা ঙমখি। ফামারা দাইদিওনা অনীশুবা হাফ হৌরকপা কুইদ্রিঙৈ শান্নবগী ৪৮ শুবা মিনিটতা সিনেগালগী অনীশুবা গোল চনখি। অদুগাবম্বা দেংনাশান্নবগী ৮৪ শুবা মিনিটতা মায় পাকপগী অহুমশুবা গোল চনবা ঙমখি। হোষ্ট টিমগী অমত্তা ঙাইরবা গোল অদুনা মুহমদ মুন্টারিনা শান্নবগী ৭৮ শুবা মিনিটতা চনখিবনি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু