মহারাজ ভাগ্যচন্দ্রনা শামু ফাবগী মীতম সি এম না হাংদোকখ্রে
ইম্ফাল, নভেম্বর ২৭ : খ্বাইরম্বন্দ কৈথেল ময়োলদা লৈবা মহারাজ ভাগ্যচন্দ্রনা শামু ফাবগী মীতম অমুক হন্না শেমগৎতুনা ঙসি চীফ মিনিস্তার এন বীরেন সিংহনা হাংদোকখ্রে। আর্ত এন্দ কালচার দিপার্তমেন্তকী মখাদা শেমজিনখিবা মহারাজ ভাগ্যচন্দ্রনা শামু ফাবগী মীতম মায়খুম হাংদোক্লদুনা চীফ মিনিস্তার এন বীরেননা হায়, ঐখোয়বু পোকপীরম্বা, ফুরুপ অসিবু ঙাকপী-শেনবীরম্বা অথৌবশিংবু তুংগী মীরোলনা ঙাক-শেনবা হায়বসি ঐখোয়গী ইথৌদাংনি।
চীফ মিনিস্তারনা হায়, মহারাজ ভাগ্যচন্দ্রগী শামু ফাবগী মীতম অসি মচেৎ-মচেৎ তাদুনা লৈরম্বদগী অমুক হন্না অখঙ-অহৈশিং তানদুনা শেমগৎপনি। হৌজিক লৈরিবা মহারানী থোং অসি অমুক হন্না শেমগৎনবা অখঙ-অহৈশিং তানরি। হৌজিক লৈরিবা থোং অসিগী মথক্তা মতমগা চুনবা থোং অমা থম্ননবা অখঙ-অহৈশিংগা খন্নবা হৌরে। পাল্লিবা লৈঙাক অসিনা ইপা-ইপুশিংনা থম্বীরম্বা পোৎলমশিং ইকায়খুম্নবা ঊৎপগা লোয়ননা মসিবু য়োকখৎনবা থৌরাং তৌরি।
চীফ মিনিস্তারনা মখা তানা হায়, জি ২০গী মতাঙদা মঙ ফাওবদা মঙলুদবা অমা প্রাইম মিনিস্তার নরেন্দ্র মোদিনা লুচিংবা লৈঙাক অসিনা মালেমদা অহোংবা অমা পুরকপগুম ঐখোয়গী স্তেত মণিপুরদসু অহোংবা কয়া পুরকপা ঙম্লগনি। মরুওইনা লাইরিক-লাইশু হৈরবা নহারোলশিংগীদমক অহোংবা কয়া পুরক্নবা হোৎনবদা লৈঙাক্না অচৌবা থৌদাং লৌগনি। প্রাইম মিনিস্তারগী থৌরাং অসি মণিপুরগী ওইনদি ফেব্রুয়ারি নৎত্রগা মার্চ থাদা তারবা য়াই। মসিদা মরুওইনা ইকনোমিগী ওইবা চাওখৎ থৌরাংশিং লমদম অসিগী নহারোলশিংগা খন্ন-নৈনরগা য়াম্না ফজনা মণিপুরগী ওইনা ফোকাস তৌনবা হোৎনসি হায়না বীরেননা ফোঙদোকখি।
ঙসিগী থৌরম অদুদা রাজ্য সভাগী এম পি মহারাজ সনাজাওবা লৈশেম্বা, আর্ত এন্দ কালচারগী কমিশনার এম জয়, আর্ত এন্দ কালচারগী দিরেক্তর এল কিশোরজিৎ অমসুং আর্কিওলোজি দিপার্তমেন্তকী সুপারিন্তেন্দেন্ত কে সশিকুমারসু শরুক য়াখি। ঙসিগী থৌরম অদুদা খ্বাইরম্বন্দ কৈথেলগী পোৎফম ফম্বীশিংনা চীফ মিনিস্তার এন বীরেন সিংহ অমসুং এম পি সনাজাওবা লৈশেম্বা অনীবু তরাম্না ওকপগা লোয়ননা খুদোল পোৎশিং পীদুনা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু