মণিপুর মেপকী লাইরিক অমসুং ‘ঈথৎকী পিরাং’ ফোঙখ্রে
ইম্ফাল, ডিসেম্বর ২ : ককচিংতাবম গুণচন্দ্র শর্ম্মাগী ‘দি হিস্তরিকেল মেপস ওব মণিপুরঃ ত্রিতিজ এন্দ ডকুমেন্টস’ হায়না মিংথোনবা লাইরিক অমা ঙসি এন আর সি মণিপুরদা ফোঙখ্রে। এন আর সি (নেসনেল রিছার্স সেন্তর), মণিপুরগী প্রেসিদেন্ত থোঙাম অজিৎনা প্রিসাইদ তৌদুনা কাঞ্চিপুরদা লৈবা রিসার্ছ সেন্তারগী নাওরেম সনাজাওবা পাব্লিক লাইব্রেরি হোলদা পাঙথোকখিবা থৌরম অদুদা চীফ গেস্ত ওইনা শরুক য়াখিবা দি এম য়ুনিভার্সিতিগী প্রোফেসার এন রাজমোহন সিংহনা লাইরিক অদু ফোঙখি।
থৌরম অদুদা ককচিংতাবম গুণচন্দ্র শর্ম্মানা হায়, মণিপুর অসি তোঙান-তোঙানবা ফুরুপশিংনা পূন্না খুন্দামিন্নদুনা লৈবা লমদম অমনি। খুন্দামিন্নরিবা ফুরুপশিংগী মরক্তগী মাগী-মাগী ওইবা মেপ পুথোক্নরকপদগী লমদম অসিগী ঙমখৈগী মতাঙদা মীয়ামদা চমম্নবা পোকহল্লকখি। মরু ওইনা মণিপুর গভর্ণমেন্তকী মখুৎতসু মণিপুরগী চপ-চাবা মেপ অমা লৈত্রি।
মহাক্না হায়, মণিপুরনা ইন্দিয়াদা মার্জ তৌরবা মতুং ঐখোয়গী ইপা-ইপুশিংনা থম্লম্বা মণিপুরগী চপ-চাবা মেপ পুথোক্তুনা থম্লি। মসিদগী হৌখিবা ইং ২০১৪ দগী বৃটিশকী লাইরিকশিংদা হাপ্লম্বা য়াওনা মেপ ৩৩৬ লোম খোমজিল্লগা রিসার্ছ তৌবা হৌরকখিবনি। খোমজিল্লিবা মেপশিং অসি ইন্টারনেসনেল রিকগনাইজ তৌরবা ঙাক্তনি। মসিদগী কূপ্না থিজিল্লবা মতুঙদা মহাক্কী লাইরিক অসি ফোঙবনি।
মহাক্কী লাইরিক অসিনা হৌরক্লিবা নহাশিংনা লমদম অসিগী চপ-চাবা মেপ খঙহনবদা অচৌবা মতেঙ ওইবা ঙমগনি হায়না অইবা গুণচন্দ্র শর্ম্মানা ফোঙদোকখি। থৌরম অদুদা দি এম য়ুনিভার্সিতিগী দিপার্তমেন্ত ওব পোলিটিকেল সাইন্সকী ফেকালতি মেম্বার দাঃ অরাম্বম নোনিনা ঙসি ফোঙখিবা ককচিংতাবম গুণচন্দ্র শর্ম্মাগী ‘দি হিস্তরিকেল মেপস ওব মণিপুরঃ ত্রিতিজ এন্দ দোকুমেন্তন’ হায়রিবা লাইরিক অদুগী মশক তাকখি।
অমারোমদা অশাঙবা কম্ম্যুনিকেসন, ইম্ফালনা শীন্দুনা ঙসি প্রেস ক্লাবতা সালাম খেদা (ৱাঙম্বা দি) না ইবা শৈরেং লাইরিক ‘ঈথৎকী পিরাং’ ফোঙখ্রে। থৌরম অসিদা হান্নগী আর্ট এন্দ কালচার লোয়শঙগী কমিশনার কাংজম রাধাকুমারনা অথোইবা মীথুং ওইখি। সাহিত্য একাদেমী এৱার্দি আর কে ভুবনসানানা থৌরম মপু ওইখি অদুগা অমুকোগী প্রেসিদেন্ট নন্দো লুৱাংনা অখন্নবা মীথুং ওইখি। থৌরমগা মরী লৈননা মণিপুর য়ুনিভার্সিটি মণিপুর দিপার্টমেন্টগী ডা. ৱাহেংবম কুমারী চনুনা লাইরিক্কী মরমদা ৱা ঙাঙখি।
সোর্স: পোক্নফম
0 কমেন্ট:
কমেন্ট তৌবিয়ু