• 59
• ২৩শে মার্চ ২০২৪ ইং
• Share on:

মণিপুরী ফিল্ম ফেস্তিবেল হৌদোকখ্রে

ইম্ফাল, মার্চ ২২

হেরিতেজ আর্ত এন্দ কলচরেল সেন্তরনা শীন্দুনা নুমিৎ ৩ চুপ্না চত্থগদবা মণিপুর ফিল্ম ফেস্তিবেল ঙসি পেলেস গেত্তা লৈবা এম এস এফ দি এস (মণিপুর স্তেত ফিল্ম দিবলপমেন্ত সোসাইতি) গী মলতি পর্পজ ওদিতোরিয়াম হৌদোকখ্রে।

এন ই সি (নোর্থ ইস্তর্ন কাউন্সিল) গী মীৎয়েং মখাদা পাঙথোকখিবা মণিপুর ফিল্ম ফেস্তিবেল হৌদোকপগী থৌরম অদুদা রিতায়ার্দ আই এ এস, আর কে নিমাইনা চীফ গেস্ত, ফিল্ম ফোরাম মণিপুরগী চেয়ারমেন লাইময়ুম সুর্জকান্ত শর্মানা প্রেসিদেন্ত অমসুং জে এন মণিপুর দান্স একাদেমীগী দিরেক্তর পি বিলাসনা গেস্ত ওব ওনর ওইনা শরুক য়াখি।

থৌরম অদুদা চীফ গেস্তকী ৱারোল পীরদুনা আর কে নিমাইনা হায়, মণিপুর ফিল্ম ইন্দিস্ত্রিগী হৌগৎলক্লিবা নহাশিংনা মালেমগী থাক্তা কম্পিত তৌবা ঙমগদবা ফিল্ম পুথোকপা ঙম্লবা হোৎনসি। মণিপুর ফিল্ম পুথোক্লিবশিং দা তেলেন্ত মরাঙ কায়না লৈ। অদুমকপু অনৌবা ফিল্ম মেকরশিংনা মশা-মশানা পুথোক্লিবা ফিল্ম অদু খঙবা ৱাৎপনা ফিল্ম অদুগী মগুণ হন্থহল্লি।

অমরোমদা, চাওখৎলকপগী মতুং ইন্না হোংলক্লিবা ফিল্মগী চৎনবী অসিদা মতীক চানা শরুক য়াবা ঙম্বা অমদি মালেমগী থাক্তা কম্পিত তৌবা ঙম্বা ফিল্ম মেকারশিংসু থোরক্তবা নৎতে। অদুবু মণিপুর ফিল্মগী হান্নদগী চৎনরক্লিবা ত্রেন্দ অসিদা অদুমক চৎতুনা লৈরগদি মসিনা মণিপুরগী ফিল্ম চাওখৎহনবদি খরা ৱানা থোক্কনি।
ফিল্ম মেকিংদা হৌজিক লাক্লিবা অহোংবা হায়বদি অফবা খূৎশু-খূৎলায় অমদি পোস্ত প্রদক্সন্দা অহেনবা মীৎয়েং চঙবা অসিমক মণিপুরগী ফিল্ম ইন্দস্ত্রি অসিদসু শীজিন্নবা মতম ওইরে। হেন্না অফবা ফিল্ম পুথোকপা ঙম্বা অমদি মালেমগী থাক্তা মার্কেট তৌবা ঙমগদবা ফিল্ম পুথোকপনা ফিল্ম মেকরশিংগী খ্বাইদগী মরুওইবা পান্দম অমা ওইনা চঙশিল্লবদি তুংদা ইন্দস্ত্রি অসি হেন্না চাওখৎপা অমা শোয়দনা ওইরক্কনি হায়খি।

                             ওপনিং ফিল্ম ওইনা ঊৎখিবা অরিবম শ্যামনা দিরেক্সন পীবা ‘ইমাগী নীংথেম’

মহাক্না মখা তানা, ফিল্ম ইন্দিস্ত্রি অমা চাওখৎহন্নবা হোৎনবদা ফিল্ম ফেস্তিবেল অসিসু য়াম্না মরুওই। হৌজিক মতমগী ফিল্ম অসিগা মমাঙথক্তা নম্নরম্বা ফিল্মশিংগা তেক্নিক্কী ওইবা লমদা খেৎনবা কয়া অমা লৈরে। লাক্লিবা অহোংবশিং অসি ঐখোয়না মুন্না খঙবা মথৌ তাই। ফিল্ম ফেস্তিবেল তৌবা মতমদা ফিল্ম অদু শাংবা তেনবা নৎতনা মীয়ামদা করিনো হায়বা নীংথিনা খঙহনবা ঙম্লবদি ফিল্ম মুবমেন্তদা চাওখৎপা ঙমগনি। মীয়ামদা নুংঙাইবা পীবা ফিল্ম অমা ওইহনগে হায়রবদি য়ুর্নিবাসেল থিম ওইনা পুথোকপা মথৌ তাই হায়নসু মহাক্না মখা তানা ফোঙদোকখি।

নুমিৎ হুম্নি চুপ্না চত্থগদবা ফিল্ম ফেস্তিবেল অসিদা পূন্না ফিল্ম ৫ স্ক্রিনিং তৌগনি। ঙসি হৌদোকপা নুমিৎতা অরিবম শ্যামনা দিরেক্সন পীবা ‘ইমাগী নীংথেম’ হায়রিবা ফিল্ম অসিনা ওপনিং ফিল্ম ওইনা ঊৎখি। লোয়ননা ফেস্তিবেল অসিদা স্ক্রিনিং তৌগদৌরিবা ফিল্মশিংগী প্রদুসরশিং দা অচম্বা খূদোল পীদুনা ইকায়খুম্নবা ঊৎখি।

সোর্স: পোক্নফম