নিউ দিল্লী, আগস্ট ১৬ : লৈবাক অসিনা মণিপুরগীদমক লেপ্লি। মণিপুরদা হৌজিক থোক্লিবা ঈরাং অসিদ লাকশিনবগা লোয়ননা সেন্টর অমসুং স্তেত গবর্নমেন্তনা শান্তি পুরক্নবা অকনবা মওংদা হোৎনরি হায়না প্রাইম মিনিস্তর নরেন্দ্র মোদিনা ফোঙদোকখ্রে। দিল্লীগী রেদ ফোর্টতা পাঙথোকপা ইন্দিয়ানা নীংতম্বগী ৭৭ শুবা থৌরমদা মিনিট ৯০ চূপ্না লৈবাক মীয়ামদা ফোঙদোকখিবা ৱারোলদা প্রাইম মিনিস্তর নরেন্দ্র মোদিনা মণিপুরগী মতাঙদা পল্লুদনা হায়, অৱাং নোংপোক্কী স্তেত অসিদা থোক্লিবা ঈরাং অসি হৌজিক ফগৎলকপগা লোয়ননা থোক্লিবা ৱাথোক অসিগী ৱারোইশিন শান্তি ওইবা হীরমদা লোইশিনগদবনি।

মোদিনা হায়, লৈবাক অসিনা মণিপুরগী মীয়ামগীদমক লেপ্লি। য়ানদবা খুদীংমক শান্তি থম্লবা মতম খক্তদা লোইশিনবা ঙমগদবনি। সেন্টার অমসুং মণিপুরী গবর্নমেন্তনা স্তেত অসিদা অতেনবা মতমগী মনুংদা শান্তি পুরক্নবগীদমক হোৎনরি। শান্তি ওইনা ৱারোইশিন পুরক্নবা সেন্তরনা মীৎয়েং থম্লি। থোক্লিবা ঈরাং অসিদা মী কয়াগী পুন্সি মাঙখ্রে। ইমা-ইবেন অমসুং নুপী ওইবী কয়াদা অচৌবা চৈথেং পীখ্রে। অদুবু হৌখিবা নুমিৎ খরনি অসিদা স্তেত অসিদা শান্তি লাকপগী পাউ ফংলি হায়না মোদিনা ফোঙদোকখি।

পিএম মোদিনা ওপোজিসনবু চৈরদুনা হায়, লৈবাক অসি মাঙহনলিবা অসি পোৎশক অহুমখক লৈ। মদুদি-করপসন, শাগৈ-নাতৈগী পোলিতিক্স অমসুং মী পেলহন্নবা চত্থবা ফত্তবা থৌওং অহুম অসিনি। অসিগুম্বা থৌওং অসি চহী কয়া চত্থদুনা লাকপদগী হৌজিক্তি মীয়াম্না মখোয়বু থৌওইরক্তবনি।

মহাক্না হায়, মথক্তা পল্লিবা থৌওং অহুম অসি ঐখোয়না মীৎনা উবগা লোয়ননা মখোয়গী মথক্তা লান চত্থরকপনি। ইন্দিয়ানা চাওখৎপা লৈবাক অমা ওইনবগীদমক মখল অমত্তগী করপসন তরাইনা লৌদে। করপসন অসিনা লৈবাক অসিগী সিস্তেম অমসুং তৌবা ঙম্বা অদু মপূং ফানা মাঙহল্লি। লৈবাক অসিদা য়াইফবা, অমকপা লৈতবা অমসুং খেন্নবা থমদবা লৈঙাক অমা পুরক্তুনা ইং ২০৪৭ ফাওবদা ইন্দিয়া অসি চাওখৎপা লৈবাক অমা ওইহন্নবা হোৎনবদা পূম্নমক্না থৌদাং লৌমিন্নগদবনি।

লৈবাক অসিদা লৈরিবা নুপীশিংগী সেল্ফ হেল্ফ গ্রুপশিংনা চাওখৎপা অমদি চাওখৎ থৌরাংগী থবকশিং লৌখৎলকপদা থাগৎপা ফোঙদোক্লদুনা হায়, লৈবাক অসিগী নুপী কোটি অনীবু মতেঙ পাংবীদুনা ‘লাকপতি’ ওইহনবা হায়বসি মহাক্কী পান্দম্নি। লৈবাক অসিগী ত্রেদিসনেল স্কিল, কারপেন্টর, মেসন অমসুং গোল্ডস্মিথ তৌবশিংগীদমক ‘বিশ্বকর্ম যোজনা’ কৌবা স্কিম অমসুং হৌদোক্লগনি। মসিগীদমক লুপা কোটি ১৩,০০০ দগী লুপা কোটি ১৫,০০০ কাইথোক্তুনা হিংনবা লম্বী পীনবা হোৎনরগনি। হায়রিবা স্কিম অসিনা ও বি সি কেতেগোরিদা লৈবা মীশিংদা মরুওইনা পান্দম থম্লি। স্কিম অসি লাক্লিবা সেপ্তেম্বর ১৭ তা পাঙথোক্কদৌরিবা বিশ্বকর্ম জয়েন্তি ‍নুমিত্তা হৌদোক্লগনি হায়না প্রাইম মিনিস্তর নরেন্দ্র মোদিনা ফোঙদোকখি।

সোর্স: পোক্নফম