ইম্ফাল, জুলাই ০৬ : মণিপুরদা হৌজিক থোক্লিবা ঈরাং অসিনা মরম ওইরগা মালেমগী মফম কয়াদা মহৈ-মশিন তম্লিবা, থবক তৌরিবা অমদি খুন্দা-লৈতাদুনা লৈরিবা মৈতৈশিংনা ইরমদম মণিপুরদা ঈং-তপ্পা পুরক্নবগী থৌনি থৌরম লেপ্পা লৈতনা পাঙথোক্নবগুম বাংলাদেশতা এমবিবিএস তম্লিবা মৈতৈ মচাশিংনসু ঈং-তপ্পা অমদি তংদু লৈতাবা হঞ্জিল্লক্নবগীদমক মপুদা থৌনিজখে হায়রি।

বাংলাদেশ লৈবাক্তা খুন্দারিবা মণিপুরী, মৈতৈশিংগা মণিপুরদগী বাংলাদেশ লৈবাক্তা মহৈ-মশিন তম্লিবা মহৈরোয়শিংগা অফবা মরী অমা শাগৎমিন্নদুনা ঈ মরীগী ইচিল-ইনাওশিং নুংশিনবা পুরক্নবগী থবক লেপ্তনা চত্থরকপগা লোয়ননা হৌজিক থোক্লিবা তংদু লৈতাদবা ফীভম অসি হঞ্জিল্লক্নবগী মতাংদসু খন্ন-নৈনখি।

অফবা মরী থম্নবগী পান্দমদা চত্থরকখিবা খোঙচৎ অদুগী শরুক অমা ওইনা বাংলাদেশকী বগুড়াদা লৈবা টি এম এস এস মেদিকেল কোলেজ দা এমবিবিএস অরোইবা চহী, ফার্ষ্ট ইয়ার, সেকেন্দ ইয়ার অমদি ফোর্থ ইয়ারগী মহৈরোয়শিংনা বাংলাদেশতা লল্লোন-ইতিক তৌদুনা লৈরিবা মৈতৈ মচা অমা ওইরিবা সাকসেস  গাইদেন্সকী প্রোপ্রাইটর খোইরোম প্রশান্ত অমসুং বিশগাঁও মণিপুরী ক্লাবকী জেনারেল সেক্রেটারি সোরাইজম উৎপলনা উনদুনা ৱারী শানখি।
লোয়ননা ভানুগাছ অমদি রামনগরদা লৈরিবা মণিপুরী মৈতৈশিংনা খুন্দারিবা মফমশিংদসু চৎতুনা মখোয়গী পুন্সি মহিং, য়ুম্লৈ কৈরৈনচিংবসু য়েংশিনবগা লোয়ননা ঈগী মরী ইচিল-ইনাওগী নুংশি মরী অদু শাগৎমিন্ননবগী ৱাখল্লোন ৱারী শানখি।

খোঙচৎ অদুদা বাংলাদেশ লৈবাক্তা লৈরিবা হিজম ইরাবতকী মীতমদা হৈকৎ লৈকৎ তম্বগা লোয়ননা মপুদা মণিপুরদা ঈং-তপ্পা অমদি তংদু লৈতাবা হঞ্জিল্লক্নবগীদমক থৌনিজখি। খোঙচৎ অদুদা শরুক য়াখিবা মহৈরোয়শিংবু সোসল এক্টিভিষ্ট এল ইবুংহাল শ্যামল, মণিপুরী কালচারেল কমপ্লেক্সকী প্রেসিদেন্ট এল জয়ন্ত, সোসল এক্টিভিস্ট রাজকুমার, কে ভুবন, টি রাসেল, কোন্থৌজম শিল্পী অমদি কৈশাম বিশ্বজিৎনচিংবনা তরাম্না ওকপীখি।

বাংলাদেশতা মৈতৈশিংনা অহানবা খুন্দাখিবনি হায়না লৌনরিবা বিশগাঁওগী অরিবা ক্লাব অমা ওইরিবা বিশগাঁও মণিপুরী ক্লাবকী জেনারেল সেক্রেটারি উৎপলনা হরাও তয়াম্না মহৈরোয়শিং অদুবু ওকখি হায়রি।

সোর্স: হুইয়েন লানপাউ