আপডেট:
image

বঙ্গলাদেশকী প্রাইম মিনিস্তর সৈখ হাসিনাদা মৈতৈ নীংঙোল রধাবতি দেবীনা লাফূদগী শুংবা লংনা সারি শাদুনা “কলাবাতি সারি” খুদোল তমখিবা


মীওইবনা মলেমদা খুন্দা লৈতাদুনা নীংশিংবা থোক্ত্রবা মতমদগী হৌনা লৌউ-শিংউ তৌদুনা লাক্লি অমসুং ফিশা-লোনশা তৌদুনা তাইবঙ শিন্থা পাঙথোক্তুনা মীওইবা খুনাই শেমদুনা চাওখৎ লম্বেলদা চংশিল্লক্লি। মলেমসিদা লৈরিবা তোঙান তোঙানবা খুনাইগী, লাইনিং লাইশোল খেন্নরবা মীওই চা কয়াগী চাক ফিজেৎ অমত্তা মান্নদে। মখোয়গী খুনাইগী ওইবা ফিজেৎ লৈতেং, চাকচা য়ুথক ইতোপ তোপ্না লৈ অমসুং পুন্সি মহিং পুম্নমক অমত্তা মান্নবা লৈতে। খেন্নবা ময়াম অসিমকনা ফজরবা মীওইবা খুনাইবু লৈকোল অমগুম্না নীংথিজহল্লি। মীওই ফুরুপ কাংলুপ খুদিংমক্কি তোঙান তোঙানবা চৎনবী থাজনবী লাইনিং লাইশোল লৈবনা মখোয়গী কলচর অমসুং ত্রেদিসনসু অদুমক তোঙাল্লি। অসিগুম্বা তোঙান তোঙানবা কলচরদা লৈরিবা হরাও কুমহৈ, লূহোংবা, অসি অনাগী থৌরমশিং অমদি মসিগা মরি লৈনবা থৌদোকশিংসু অদুমক তোঙাল্লি।  


 

মলেমসিদা খুন্দা লৈতাদুনা চহী লীশিং কয়াগী মমাংদগী লৈরক্লবা কুইরবা অমসুং য়াম্না লীরবা সাভ্যতা লৈজরক্লবা মীওই ফুরুপশিংগী মনুংদা মৈতৈশিংসু অমা ওইরি। অসিগুম্বা য়াম্না লীরবা খুনাই অসিদা ফিশা-লোনশাগী থবক অসি নীংশিংবা থোকত্রবা মতমদগী তৌদুনা লাক্লি। মসিদা খুনাই অসিগী চনু নীংঙোলশিংনা মখোয়গী খূৎ-শা হৈবগী, থোৎপা মেংবগী মশক, ইংজা তপচবগী মমি, লৌশিং চাওবগী মতিক মঙল পুম্নমক মখোয়না থৱায় য়াওনা হোৎনরিবা ফিশা-লোনশাদা মমি তাদনা তোক্তে। মৈতৈ নুপীগী থৌনা, মখোয়গী মরিংজেল, অখাঙ কনবা মতৌ, শাফম লানফমদা মখোয়না পুৱারীদা লৌদুনা লাক্লিবা থৌদাং পুম্নমকনা খঙই অমসুং ইকায়খুম্নদুনা লাক্লি। মালেমদা মমিং চৎলি কলচরদা শান্ন-খোৎনবদা লাইরিক লাইশুগী লমদা মীথোই মীহেল্লি। থিংলুবা ঙম্লোই মখোয়গী মথৌনা মরিংজেল। ইমা পান্থোইবীনা শিন্তাক্লম্লবনি, ইবেন্ধৌ ইমোইনুনা থৌজাল লনকুবীরবা চনু নীংঙোল ঙাক্তনি মৈতৈ নীংঙোলশিংদি। অদুনা মখোয়না ইয়োংদা শাবা চরৈ ফিদি অরেম্বদা খক মাংবা হৌনদে। ৱাংখৈ ফি, রানি ফি, মোইরাং ফি পুম্নমক ঙসিদি মলেমদা মমিং লৈরি। তোংব্রম নীংঙোল বিজ্যশান্তিনা পুথোকচবা থম্বালদগী শুংবা লোটস সিল্কনা ইন্দিয়াগী প্রাইম মিনিস্তরগী পূকনিং চিংশিনবা ঙমখ্রে। মনিপুরবু হেন্না মশক তাক্লি। ইনোভেভিব আইদিয়া পুথোক্লীবী বিজ্যশান্তিবু জাতিগী থাক্তা মনা মথুম  কয়া পীদুনা ইকায়খুম্নরি ঙসি। মহাক্কী মায় পাকপগী অদুগা অখাঙ কনবগী ৱারীনা ইন্দিয়াগী লৈরিবা মীওই মিলিয়ন কয়াগী ৱারীনফম অমসুং পুকনিং থৌগৎনিংঙাই ওইবা ৱারী ওইরি। প্রাইম মিনিস্তরগী ‘মনকি বাদতা’ য়াওদুনা পাউজেল পীরি লৈবাক মীয়ামদা তোংব্রম চনু বিজ্যশান্তিগী লৌশিং অমসুং থৌনাবু পুকনিং থৌগৎলদুনা। মসিদা মৈতৈ চনু পুম্নমকনা চাওথোকচরি। মসিনা ইন্দিয়াগী ওইরবসু মায় পাকপগী পাউদি লেপ্তনা অদুমক লাক্লি বঙ্গলাদেশতা খুন্দা লৈতাদুনা লৈবাক অসিগী নাগরিক ওইরবা মনিপুরীশিংগী মরক্তগীসু অমুক।  


চহী তরেৎ খুন্তাকপনা মরম ওইদুনা শমজি খায়না লাঞ্জেনখ্রবা ঈগী মরি ইচিন ইনাও, ইপা ইতোন কয়াগী চাদা নাওদা কয়া ঙসি বঙ্গলাদেশ লৈবাক্তা মতিক চারবা নাগরিক ওইদুনা লৈবাক অসিদা মখোয়না ঙমজবা থৌদাং লৌদুনা নুংশি চান্ন-চিন্ননা লৈমিন্নরি। মৈতৈ অমা ওইবগী অদুগা মনিপুরী অমগী শক্তম অদুদি ঙাকনা হিংলি। কলচর অমসুং ত্রেদিসনসু য়াম্না নুংশিনা অমসুং পাম্মুনা ঙাকনা হীংলি মনিপুরীশিংনা বঙ্গলাদেশতা। ইমালোল মনিপুরীসু তম্বীরি লেপ্তনা হৌরক্লিবা মীরোলদা। বঙ্গলাদেশতা লৈরিবা চনু নীংঙোলশিংনা ঙসিসু অদুম্মক লেপ্তনা ফিশা-লোনশা তৌরি, ইয়োংগী পোত্থোক মরাং কায়না পুথোক্লি। অতোপ্পা জাতিগী মীওইশিংনা য়াম্না পাম্না লৈনবগী পাউদম লৈরি। হোৎনবা কনবা শুবা নোম্বা তন্দবা মৈতৈ নুপীশিংগী মরক্তা থোকলকখি রধাবতি দেবী। মালেমগী লৈবাক কয়াদা লাফূ পাম্বীদগী লফূগী মশিল অদুদগী লং শুংদুনা ফি শাবগী পাউদম কয়া ঐখোয়না তারি। অদুবু লাফূদগী পুথোকপা লং অদুনা সারি শাবদি তাখিবা লৈত্রি। সারি শাবা য়াগনি হায়দুনা চাওরবা চেলেঞ্জ অমগা লোয়ননা চংশিল্লক্তুনা হোৎনরিবা অদুগা মায় পাক্লদুনা মহাকনা শাবা লাফূদগী শুংবা লংগী সারিবু লৈবাক অমগী প্রাইম মিনিস্তরদা খুদোল তম্বা ঙম্বা হায়বসি অরায়বা থবক অমদি নত্তে। মসি মৈতৈ নীংঙোল রাধাবতি দেবীগী অখাঙ কনবা অমসুং লৌশিং চাওবী অদুগুম্বা মগুন অদুনা লেঙদ্রবা খুদম ওইরি।  

 

বঙ্গলাদেশকী হৌজিক হৌজীক প্রাইম মিনিস্তর ওইরিবী সৈখ হাশিনাদা মৈতৈ নীংঙোল রাধাবতি দেবীনা শাবা লাফূদগী শুংবা নীংথিজরবা কলাবাতি সারি হায়না মিংথোনবা সারি অসিমক ২০২৩গী  জুলাই ১৭ ইঙেনগী ৩০নি পানবা নিংথৌকাবা নুমিৎতা বন্দরবন্দগী ডি সি য়াস্মিন পার্বিন তিব্রিজিনা লুচিংদুনা খুদোল তমখি। পুৱারী অমা ইখি মৈতৈ নীংঙোলগী হৈ শিংবা অমসুং লৌশিং চাওবা অদুবু শিংথাদুনা। লাফূদগী শুংবা লংনা সারি শাবা অসিমক বঙ্গলাদেশতা মসিনা অহানবা হায়বদু ওইরি। নীংশিংবা য়াই, রাধাবতি দেবী মনিপুরীশিংনা খুন্দাবা কমলগঞ্জ, মৌলভিবজারদগীনি। য়াম্না ঙল্লিঙৈ মতমদগী ফিশা-লোনশা তৌদুনা লাক্লবীনি। 

 

অসিগুম্বা য়াম্না চেলেঞ্জিং ওইবা ভেনচর অমা পায়খৎপা অসিদা থৌনা লৈনা চোংথোকলকপদি কনাসু য়াওখিদে। বন্দরবন্দগী ডি সি য়াস্মিন পার্বিন তিব্রিজিনা ফিশা-লোনশা তৌরিবী কয়াদা লাফূদগী শুংলিবা লং অসিনা সারি শাবগী ৱা হৌদোকপদা রাধাবতি দেবীনা মা তৌগে হায়দুনা থোক্লক্তুনা নুমিৎ ১৫নিদা সারি মপুম অমা শাবা ঙমখি। লংসু কেজি অমনা সারি মপুম অমা শাদুনা পুথোকখি। মসিদা করিগী ঙক্লোই বেঙ্গল্লিশিংনা। মসিদা করম্না ইকায়খুম্নদবা য়ারিবগে মহাক্কি থৌনা অমসুং ইনোভেটীব ওইবা আইদিয়া অদুবু। লাফূদগী সারি শাবগী ৱারী অসিনা মরম ওইদুনা বন্দরবন্দা ঙসিদি লমকোয়বা কয়াগী পূকনিং চিংশিনবা হেল্লকলি। মসিনা লমদম অসিগী শেনমিৎলোন্দা চাওনা কান্নবা পীরক্লি। তমজনিংঙাইনি।  


ইকো ফ্রেনলি ওইবা অদুগা অরেম্বদা মাংদুনা লৈরগদবা লাফূ পাম্বীদগী লং শুংদুনা লং নাইদুনা লৌমী শিন্মী কয়ানা মপুং ওইনা লৈবা খুঙ্গং লমদমশিংদা মরু ওইনা বঙ্গলাদেশতা অসিগুম্বা খোঙথাং অমা পায়খৎলকপা অসিদা রাধাবতি দেবীনা চাওরবা থৌদাং লৌদুনা ৱিভর কয়া ত্রেন্নিং পীরি হায়বসি তাবদা মনিপুরদা লৈরিবা ঐখোয়না কয়াদা চাওথোকচরিবা। শোত্থারবা খুনাইগী ইমা ইবেলশিং ইচে ইচল কয়াবুসু লমজিংলি তাবদা হেন্না থম্মোয়সে পেঞ্জৈ। মনিপুর লৈঙাকনা রাধাবতিবু পুকনিং থৌগৎপা অমসুং ইকায়খুম্নবা উৎফম থোকই। মরমদি মহাকনা বঙ্গলাদেশটা তৌরিবা হেন্দলূমগী খূদোল অসি মপাল নাইদ্রবা খুদোলনি। শিন্নাই শঙদা থোইদোকনা শিংথানিংঙাই ওইনা খুদোল তম্লিবী মহাকপু মনিপুরদা বর্ত্তন তৌদুনা কৌবিয়ু। ইরমদম অসিগী চনু নীংঙোলশিংদসু মহাক্কি মায় পাকপগী ৱারী অসিনা চাওরবা ইনোৎ অমদি শোয়দনা হাপকনি খল্লি।  
 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: