পুয়া মৈ থাখিবগী নীংশিং কুমওন থৌরম পাঙথোকখ্রে
ইম্ফাল, ফেব্রুয়ারি ০৩ : ইন্টারনেসনেল ওবজার্ভেসন কম্মিটি ওন পুয়া মৈ থাবা (আই সী ও পি) না শীন্দুনা পুয়া মৈ থাখিবগী চহী ২৯৫ শুবা নীংশিং কুমওন থৌরম কংলাগী শেংলব লাইফম্লেন উত্রা মমাঙদা লাইশোন-তিনশোনগা লোয়ননা পাঙথোকখ্রে হায়না কম্মিটি অসিগী কনভিনার মোইরাংথেম নাওখম্বা মীতৈনা থাদোরকপা চেরোল অমনা ফোঙদোরক্লি।
চহী খূদিংগী ৱাকচিংগী ২৩ নি পানবদা পাঙথোক্তুনা লাক্লিবা নীঙশিং থৌরম অসি কুমশি চহীগী ওইনদি লৈবাক্কী ঈরাংনা মরম ওইরগা অচম্বা থৌরম ওইনা পাঙথোকখি। থৌরমগী মনুং চন্না কংলা উত্রা মমাঙদা মতম অদুগী লাই ওইখ্রবা ইপা-ইপুশিং, আই সী ও পিগী চেয়ারমেন ওইরম্বা লৈখিদ্রবা আর ভি মিংথিং অমদি হন্দক থোক্লিবা লৈবাক্কী লান অসিদা ইরৈবাক ইফূরুপকীদমক থৱায়ানা পোন্থা পীখ্রবা অথৌবা-অথৌবীশিংগী মফমদা কোক নোন্দুনা ঈকায় খুম্নবা উৎতুনা হৈকৎ-লৈকৎ তমখি।
থৌরম অদুদা তীনখিবা মীয়াম্না মীকুপ খরা ৱা ঙাংদনা তুমীন্না লেপ্তুনা অদুঙৈগী পুয়া মৈ থাখিবগী থৌদোকশিংদুবু মীয়াম পুন্না নুংঙাইতবা অমসুং অৱাবা ফোঙদোকমিন্নখি। মতুঙদা সলাই তরেৎকী ফিরাল চিংখৎখি।
নীংশিং থৌরম অসি মীতৈ নেসনেল ফ্রন্টনা কুমজা ১৯৭৮ দগী চহী খুদিংগী লেপ্তুনা পাঙথোক্তুনা লাকপনি। অদুবু কুমজা ২০১১ দগী হৌনা মপান লৈবাক্কী মীহুৎশিং অমদি লমদমসিগী লূপ কয়া পুনশিন্দুনা ইন্টারনেসনেল ওবজার্ভেসন কম্মিটি ওন পুয়া মৈ থাবা শেমদুনা কম্মিটি অসিনা পাঙথোকপা হৌরকখি। কুমসিসু কম্মিটি অসিগী লূপলোয় কয়াগা পুন্দুনা লেপ্তনা পাঙথোরকপা থৌরম অসি ৪৬রকশুবনি। ঙসি চহী ২৯৫ মপুং ফারবা কুমজা ১৭২৯ গী ৱাকচিংগী ২৩ নি পানবদা ঐখোয়গী কোক্লেন ওইরিবা খূৎই লাইরিকশিং মৈ থাখিবনি। নুমিৎ অদুদগী হৌনা কংলৈপাক্কী নীংতম্বগী অরংবা নুমিৎ তাখিবনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু