পুকনিং ৱাখলগী লায়না লৈয়েংবদা খুৎপাই লাইরিক ওইনা মীপুম খুদিংনা পাবদা কান্নরবা লাইরিক “ঐদি ঙাওসু ঙাওদনা” লাইরিক অসিদা মীয়েং অমা
অইবা- দাঃ আর কে লেনিন লাইরিক্কী মমিং- ঐদি ঙাওসু ঙাওদনা (২০১১) অহানবা খুৎনম
অফোঙবা- রিন্দা পব্লিকেসন্সগীদমক ডাঃ পি বিনাতানা দেবীনা ফোঙবা
লাইরিক্কী মখল- ৱারেং
লাইরিক্কী মমল- লুপা ২০০/- লাইরিক্কী লমায় মশিং- ২২৪
লাইরিক্কী মখুম- দিলিপ ক্ষেত্রিময়ুম
খুনাই অমা লৈরবদি খুনাই অদুদা লৈরিবা মীওইশিংনা তিঞ্জং কায়জংদনা লৈবা হায়বসিনি খ্বাইদগী মরু ওইরিবসি। মথংদা লাক্লিবা ৱাফমদি পুন্সি মহিং, পুকনিং ৱাখল নুংঙাইনা লৈবা হায়বসিসু অমুক য়াম্না মরু ওইরি। চাওখৎপা নুংঙাই য়াইফবা লমদম অমা শেম্বদা লমদম অদুদা লৈরিবা মীওইশিংগী পুকনিং ৱাখলগী ফিভম অসিসু য়াম্না মরু ওই। শেনমিৎলোন, লৈবাক ঙাকলোন, ঐখোয়গী কলচর, ত্রেদিসন পুম্নমক ঙাকনা অমদি ফিভম ফনা লৈহন্নবগীদমক্তা পুকনিং ৱাখলগী অনাবা অমত্তা লৈহন্দবা হায়বসি অসুক্কি মতিক মরু ওই।
ডাক্তর রাজকুমার লেনিন সিংহ ৱাংখৈ নিংথেম পুখ্রি মপান্দা লৈবা রাজকুমার মংলেমসনা সিংহ অমদি আর কে ওংবী সত্যবতি দেবী অনিগী মচা নিপাল পোকচবগী খ্বাই অহানবা ফংজবা মচা ওইনা তাইবঙদা খোঙদারকখি। নীংশিংবা য়াই, মহাক ওল ইন্দিয়া ইন্সতিত্যুট ওফ মেদিকেল সাইন্সেসকি এমদিনি। য়ুম্বান পুন্সিদা ডাক্তর পোৎশংবম বিনাতা দেবী, হৌজীক হৌজীক মনিপুর হেলথ সার্ভিসেস্তা জোইন্ট দাইরেক্তর ওইরিবীগা খোংদাদুনা মচানুপী অনী, লক্ষমী অমদি লোরিন্দাগী অপোকপা ওইবা ফংজখি। ডাক্তর লেনিন ১৯৮৭তা মনিপুর হেলথ সার্বিসসেতা থবক চংখি। অনা লায়েংগী লমদা মনিপুরগী তোঙাণ তোঙানবা মফম কয়াদা অমদি খুঙ্গং কয়াদা লোয়ননা চীংগী দিস্ত্রিকশিংদা হকথেংনননা মীয়ামগী সেবা তৌদুনা লাকখি। ২০০০দগী রিজনেল ইন্সতিত্যুট ওফ মেদিকেল সাইন্সেস, ইম্ফালদা অমুক লাকখি। দাক্তর লেনিন হৌজীক হৌজীক দিপার্তমেন্ট ওফ সাইক্যত্রি, রিজনেল ইন্সতিত্যুট ওফ মেদিকেল সাইন্সেস্তা প্রোফেসার ওইনা থবক তৌরি। হৌজিক্কী মতমদা মীপুম খুদিংনা তাদি তানরবা অদুগা লায়না লাইওংদি খঙবদা খজিক ৱানা থোকলিবা পুকনিং ৱাখলগী লায়না অসিদা অনাবা কয়াবু লায়েংলিবা অমদি নারক্তনবা পাউতাক কয়া লেপ্তনা পিরি দাক্তর লেনিননা। হকশেলদা য়াম্না মরু ওইবা হীরম অমদা মীয়ামগী সেবা চোকথবা নাইদনা তৌরিবা দাক্তর লেনিননা ইবা ঐদি ঙাওসু ঙাওদনা লাইরিবা হকশেলগী লাইরিক অসিমক য়াম্না তঙাইফদবা মীপুম খুদিংনা পাদবা য়াদবা লাইরিক অমা ওইরি। লাইরিক অসিদা ফজরবা অমদি য়াম্না পুকনিং লৌশিং ওইরবা ৱারেং পুন্না ১৮ য়াওরি। পুকনিং ৱাখলগী লায়না অমদি মসিনা ওইহল্লকপা অনাবশিং, নেশাগী চৈথেং মায়োকনরিবা নহারোলশিংদা পীরিবা চৈথেং, মসিদগী ঙাকথোকনবা হোৎনবা। মতৌ কমদৌনা হৌরক্লিবা মীরোলনা হকচাং ফনা পুকনিং ৱাখল্গী অনাবা লৈতনা লৈহনগনি হায়না অনা লায়েংশঙগী ৱাংমদা মীয়াম্না হেন্না হীরম অসিদা খঙনবা রেদিওদা, তিভিদা, খবর অমদি চেফোঙশিংদা হকশেলগী পাওজেল অমদি পাউতাক কয়া লেপ্তনা পীরি দক্তর লেনিননা। লাইরিক অসি মীয়াম্না পাবগী চাং হেনগৎলক্লি হায়বসি লাইরিক অসিগী মরিশুবা খুৎনম ২০১৭দা অমুক নম্বসিনা লেংদ্রবা খুদম ওইরি। হৌজীক ফাওবদা লাইরিক লীশিং অহুম হেন্না য়োনখিবগী পাউদম লৈরি। লাইরিক অসিমক ২০১৪দা পাঙথোকখিবা ইম্ফাল বুক ফিয়ারদসু খ্বাইদগী কোপি মশিং য়াম্না য়োনখিবা লাইরিক অমা ওইখি।
খুনাই অমা লৈরবদি খুনাই অদুদা লৈরিবা মীওইশিংনা তিঞ্জং কায়জংদনা লৈবা হায়বসিনি খ্বাইদগী মরু ওইরিবসি। মথংদা লাক্লিবা ৱাফমদি পুন্সি মহিং, পুকনিং ৱাখল নুংঙাইনা লৈবা হায়বসিসু অমুক য়াম্না মরু ওইরি। চাওখৎপা নুংঙাই য়াইফবা লমদম অমা শেম্বদা লমদম অদুদা লৈরিবা মীওইশিংগী পুকনিং ৱাখলগী ফিভম অসিসু য়াম্না মরু ওই। শেনমিৎলোন, লৈবাক ঙাকলোন, ঐখোয়গী কলচর, ত্রেদিসন পুম্নমক ঙাকনা অমদি ফিভম ফনা লৈহন্নবগীদমক্তা পুকনিং ৱাখলগী অনাবা অমত্তা লৈহন্দবা হায়বসি অসুক্কি মতিক মরু ওই।
ডাক্তর লেনিননা ১৯৮৭তগী মনিপুর হেলথ সার্বিসসেতা থবক তৌরকপদগীনা ঙসি ফাওবসিদা থেংনরকপা পুকনিং ৱাখলগী অনাবনা নারবা মীওইশিং অমদি হায়রিবা লায়না অসিদগী পুন্সি কলহৌরবা মীওই কয়া থেংনরকপগী এক্সপরিরেন্স অদুদা য়ুম্ফম ওইদুনা ইরকপা লাইরিকনি ‘ঐদি ঙাওসু ঙাওদনা’হায়রিবসি। ৱারী ওইনা অমসুং পাউদম ওইনা, দাইলোগ য়াওনা হৌজীক হৌজীক পুকনিং ৱাখলগী অণাবশিংনা অমদি ইমুং মনুংনা ময়োকনরিবা খুদোংচাদবা কয়াসু মরিক চুম্না ইদুনা নৈনরি। অপাবশিংদা পুকনিং লৌশিং ওইহল্লি। করম্না মীওই অমবু পুকনিং ৱাখলগী অনাবা লৈরে, অনাবশিংবু কমদৌনা য়ুমগী মীওইশিংনা অমদি খুনাই অসিদা লৈরিবা মীপুম খুদিংনা লোয়নবীগদগে হায়বসি লাইরিক অসি পাবদা লায়না খঙদোকপা ঙমহল্লি। মীয়াম্না সাইক্যাত্রিস্ততা লায়েংবা চৎলবদি অঙাওবনি হায়না খনবা অরানবা থাজনবী অদুসু ময়েক শেংনা শন্দোকনা তাক্লি। অমদি পুকনিং ৱাখলগী অনাবা অদু অঙাওবা হায়বদু নত্তে লায়না মখল অমনি। মসি লায়েংলগা ফগনি হায়বা ৱাফমশিং থম্লি। লাইরিক অসিগী হেক ইহান হানবদা য়াওরিবা ‘ঐদি ঙাওসু ঙাওদনা কৈদৌবৈ সাইক্যাত্রিস্ততা চৎতোইবা!’ হায়বসিদা মৌনহা অমবু মাগী নুপানা দাক্তরদা লায়েংনবা পুরকপদা মপুরোইবদা শাওনিংবোই ইকায়বোই হায়বা দাইলোগ অমনি। তশেংবদি পুকনিং ৱাখলগী অনাবা লৈদুনা হায়রিবা অনাবশিংদা থেংনবা সিমতোম কয়াদি মরিক চুম্না নরেতরনা ফোংদোক্লি। তশেং তশেংনা অসিগুম্বা থৌদৌশিং অসি অয়াম্বা ইমুংদা হৌজিক্কি মতমদা থেংনরিবনি। মীওইবনা চাওখৎপা হেল্লকপগী মতিক অনাবা মখলদি ফনা য়াম্না লায়েংবা ঙম্লবসু মতাং মতম চানা লায়েংহৌদবা অমদি লায়ওং হান্না খঙহৌদবদগী মমল য়াম্লবা পুন্সি কয়া অমদি ইমুং কয়া অৱাফমদা তাবা কয়া য়াওরি। হায়রিবা অনাবা ময়াম অসিগী মরক্তা হৌজীক্কী মতমদা য়াম্না তোয়না থেংনবা অনাবা অমা হায়রগদি পুকনিং ৱাখলগী অনাবা অসিসু অমা ওইরক্লি। পুকনিং ৱাখলগী অনাবা মখল অসিমক মখল কয়া লৈরি হায়বদুসু দাঃ লেনিননা শন্দোকনা নৈনবা থেংনৈ। হায়রিবা পুকনিং ৱাখলগী অনাবা মখলশিং Anxiety disorders, Behavioural and emotional disorders in children, Bipolar affective disorder, Depression,Dissociation and dissociative disorders, Eating disorders, Obsessive compulsive disorder, Paranoia অসিনচিংবা অনাবশিং অসি কমদৌনা নারক্লিবা, কমদৌনা লায়েংগনি অমদি অসিগুম্বা অনাবশিং অসিবু দক্তরদা কমদৌনা লায়েংগনি, ইমুং মনুংগী মীওইশিংনা অমদি খুনাই অসিদা লৈরিবা মীপুম খুদিংনা কমদৌনা লোয়নগনি হায়বদুসু মরিক চুম্না ৱারী ওইনা সাহিত্যগী ওইবা মচাকশিং হাপচিন্দুনা নৈনবা থেংনগনি অপাবশিংনা। ৱারী লীবা ওইনা অমদি ৱারেং ওইনা লাইরিক অসিদা নুংঙাইরবা থৌদোকশিং অশেংবসু অদুগা ফিক্সনসু য়াওনা দক্তর মশাগী এক্সপরিয়েন্সতা থেংনরকপা কয়া অদুদা য়ুম্ফম ওইদুনা য়াম্না মমুৎ তানা পুকনিং ৱাখলগী অনাবা মখলশিং অদু অসিনি হায়না অপাবশিংদা লায়না পাউদম্লি। খরদং লৌখৎলগা য়েংবা য়াবশিংদি- ‘নাদবা শরুকপু য়াওশিল্লকত্রে’, ঐদি নাসু নাদনা কৈদৌবৈ হীদাক চাদোইবা!’, বাইপোলার দিসওদর অমসুং মসিগী লায়েং’, নুপীশিংদা দিপ্রেসন’, ‘খুদকসিদা শিদা শিরদবোই খল্লুই’, ‘মোই বাবা, অমুক ৱান্থখ্রেমি!’, ‘নিশা শিজিন্নরে হায়না চিঙনবা য়াবা মওং খরা’, ‘য়ুগী চৈথেং অমদি লায়েং’, পুকনিং ৱাখলগী অনাবা অমদি আত্মাঘাত, অলজাইমর্স লায়নাঃ কা হেন্না কাউগনবগী অনাবা অসিনচিংবা তোঙাণ তোঙানবা হীরম ১৮দা মেদিকেল সাইন্সকি ওইবা তার্ম অমদি তর্মিনোলোজিশিং মীচম মীয়ামদা কমদৌনা খঙহনগদগে হায়বদুসু ইমালোলদা লায়না ইথোক্তুনা য়াওরি। মসিমক পুকনিং লৌশিং য়াম্না ওই।
লাইরিক অসিমক মনিপুরদা লৈরিবা মীপুম খুদিংমকনা পাবদা পুকনিং লৌশিং য়াম্না ওইগনি। মরমদি ঙসি মনিপুরদা থেংনরিবা খ্বাইদগী তমথিরবা লান অমা হায়রগদি ময়াই কাবা নিশা শিজিন্নবনি অমদি মসিনা ইমুং মনুংদা নুপী অঙাংশিংদা অমসুং খুনাই অসিদা অসুক্কি মতিক অমাংবা কয়া থোকহল্লিবনি লোয়ননা পুকনিং ৱাখলগী ওইবা মখল কয়াগী অনাবা কয়া নাহল্লিবনি ঙসি ঙসিমক। অদুনা মপা মমা ওইবশিংনা, অহল লমননা লাইরিক অসি পারগা মচা মশুংশিং, নকনা তিন্নবা মরুপ মপাংশিং, কৈরোই লৈকাইগী, মরি মতা পুম্নমক্তা পুকনিং ৱাখলগী ওইবা অনাবা মখলশিং পুম্নমক লায়েংবদা মাংজৌননা কান্নরবা ৱাফমশিং লাইরিক অসিদগী ফংবীগনি।
ঙসি হৌরক্লিবা য়াম্না নৌরিবা অঙাংশিংনা ময়াই কাবা নিশাগী ঈপাক্তা লায়চুরকপা মতমদা থেংনরিবা অৱাবা অমদি মমা মপা ওইবশিংদা পুকনিং ৱাখলগী অনাবা অসিসু অমা ওইরক্লিবনি। স্কুল, কলেজ অমদি য়ুনিভর্সিতিদা তম্লিবা মহৈরোইশিংগী মরক্তা ময়াই কাবা নিশা শিজিন্নদুনা তম্লিবা মহৈ মশিন অদু মপুং ফাবা ঙমদনা লম্বী লাংফৈদা চৎতুনা অৱাফমদা তাবা কয়া য়াওরি। পুম্নমক অসি মতম চানা থেংনদুনা অফবা পাউতাক পাউজেল কয়া তোয়না পিবা য়াম্না মথৌ তাই খল্লি। মরি লৈনবা মেদিকেল হেল্ট ডীপার্টমেন্টনা মতম মতমগী ওইবা থৌরমশিং অমসুং অসিগুম্বা পুকনিং ৱাখলগী লায়না লায়ওং অমদি কমদৌণা লায়েংগদে হায়বগী মতাংদা পাঙথোক্লিবা থৌরমশিংদা লৈবাক মীয়াম্না হেন্না পুকনিং চংবা কাণ্ণগনি। অমরোমদা পুকনিং ৱাখলগী অনাবা লায়েংবা হৈবা দক্তর মশিং অসিমক য়াম্না লৈবা হায়বদুসু ওইদ্রি মনিপুরদা। অদুবু অনাবদি য়াম্না লৈরে হায়বা লাইরিক অসি পাবদা থেংনবীগনি। মনিপুরদা মেন্তেল হেল্টকী হোস্পিটালমকসু লৈত্রি। অমা থম্নবা থৌরাংদি লৈ হায়নদি লাইরিক অসিদা পনবা থেংনৈ। তৌইগুম্বসুং, হায়রিবা পুকনিং ৱাখলগী লায়েংদা খ্বাইদগী মরু ওইরিবসি অনাবা মীওই অদুবু ফজনা লোয়নবীবা হায়বসিসু অমনি। অদুগা অমনা খুনাই অসিদা লৈরিবা অরানবা থাজনবী অমা ওইরিবা সাইক্যাত্রিস্ততা লায়েংবা চৎলবদি অঙাওবনি হায়বসিসু মতম পুম্নমক্কি ওইনা লৌথোকপা হোংদোকপা মথৌ তাই। অসিগুম্বা সোসিয়েল স্তিক্মা অসিনা হেন্না পুকনিং ৱাখলগী অনাবা ওইহল্লি হায়বসি নীংশিংবীগদবনি। হেন্না নুংঙাইরিবা অমনা লাইরিক অসি মৈতৈ ময়েক্তসু পুন্না য়াওবসিনি। পুকনিং ৱাখলগী অনাবা হায়বসি করিনো হায়বদু মীপুম খুদিংনা পাদুনা মেদিকেল লিতরেচর পুম্নমক মীয়াম্না খঙনবা অমদি পুকনিং লৌশিং ওইনবা অসুম্না লাইরিক ওইনা ফোংদোকপীরকপসি থাগৎতবা ঙমদে। হেন্না কান্নবা মেদিকেল লিটরেচর কয়াসু ইবীরক্তুনা য়াইফবা লমদম, তিঞ্জং কায়জংদবা খুনাই অমা ওইহনবদা দক্তর আর কে লেনিননা মখা তানা হেন্না চাওরবা থৌদাং লৌবিরকখিগনি হায়না থাজবা থমজরি।
0 কমেন্ট:
কমেন্ট তৌবিয়ু