পদ্মশ্রী ৱারেপ্পা নবা লৈখিদ্রে
ইম্ফাল, জানুয়ারি ০৮ : শক্নাইরবা সঙ্কীর্তন শৈশকপা অমগী মচানুপা ওইবদা নত্তনা মণিপুরগী ত্রেদিসনেল আর্ট অমসুং কালচারগা য়াওন্নরকখিবা ময়াম্না ৱারেপ্পা নবা হায়রগা হেন্না খঙনবা দব্লিয়ু নবচন্দ্র ঙরাং নুমিদাং অমসুং ঙসি অয়ুক্কগী লোন্নবা নোংয়াই মতুং পুং ১২.১৫ রোম চৎলকপদা মশাগী অনাবা অমনা মরম ওইরদুনা শিজ হোস্পিটালদা লৈখিদ্রে।
হোস্পিটাল অসিদা মহাক থা অসিগী তাং ২দা মশাদা ফাওরকপা অনাবা অমদগী পুখৎতুনা লায়কন্নখিবনি। অদুগা লায়েংশঙ অসিদা ওপারেশন তৌরবা মতুং ফমশেন্নদুনা লৈরকখিবনি। থৱায় য়াওদ্রবা মহাক্কী হকচাং মণিপুর ষ্টেট শুমাং লীলা কাউন্সিলনা কৈরেন কৈজাওদা হাপ্তুনা বেন পার্টিগা লোয়ননা শিজ হোস্পিটালদগী ইবোয়াইমা শুমাং লীলা শঙলেন তম্না পুরক্লগা লৈ-শু কৎতুনা অরোইবা ইকায়খুম্নবা উৎখি।
একাদেমিক এজদা পোকপগী চহী নভেম্বর ১, ১৯৪৭ হায়দুনা পল্লগসু মহাক হাওবম মরক থিঙেল ঙাঙোম লৈকায়দা কুমজা ১৯৪১ গী ওক্টোবর ১৬ তা পোকখিবনি। থিয়েটারবু পামজনা হৌরকখিবা মহাক্না লৈখিদ্রবা থিয়েটারগী শক্নাইরবা পদ্মশ্রী হৈস্নাম কহ্নাইলালগী মখাদা কুমজা ১৯৬৫ দা ‘থিয়েটার মিরর’ লিংখৎলদুনা মণিপুর খক্তা নত্তনা অৱাং নোংপোক ইন্দিয়াদা থিয়েটারবু ঙাক শেন্দুনা অমসুং চাওখৎহন্নবা থবক থৌরম কয়া পাঙথোরকখি।
মীয়ামগী ওইবা খোঙজংশিংদসু কুমজা ১৯৬৭-৬৮ দা মণিপুর কোলেজগী জেনারেল সেক্রেটারি ওইখিবগা লোয়ননা কুমজা ১৯৬৫ দগী ৬৯ ফাওবা এমসুগী মখাদা মহৈরোয়শিংগী খোঙজং কয়াদা হকথেংননা শরুক য়ারকখি। থিয়েটার মিরর হাংদোকপগা লোয়ননা চোকথবা নাইদনা ত্রেদিসনেল আর্ট অমসুং কালচারদা খোঙদারকখিবা মহাক কুমজা ১৯৭৯, ১৯৮০ অমসুং ১৯৮৬ তা বেষ্ট এক্টরগী এৱার্দশিং ফংখি। কুমজা ১৯৮১, ৮২, ৮৫, ৮৭, ৮৮, ৮৯, ১৯৯০, ৯১, ৯৫, ৯৬, ৯৭ অমসুং ৯৯দা বেষ্ট দিরেক্সন এৱার্দশিং ফংখি।
থোইদোক হেন্দোক্না থিয়েটারগী লমদা তোমথিন ঙাল্লকখিবা মহাক কুমজা ১৯৯০ দা ষ্টেট কলা একাদেমি এৱার্দনা লৈতেংখি। কুমজা ২০০০দনা এলাহাবাদ নাট্য সংঘনা নাট্যশ্রী এৱার্দ পীদুনা ইকায়খুম্নখি। কুমজা ২০০৯দনা থিয়েটার মুভমেন্ট (কটক, উরিষা) না নাট্যভূষন পীখি। মসিগী মথক্তা মঙোন্দা লৈতেংখিবা এৱার্দশিংগী মনুঙদা ডা. অম্বেদকর ফেলোসিপ এৱার্দ, ২০০৯, মণিপুরী সাহিত্য পরিষদকী নাট্যভূষন, ২০১০, থিয়েটার সেন্টার মণিপুরগী লাইফ টাইম এচিভমেন্ট এৱার্দ-২০১১, উটকল যুব সংস্কৃতি সংঘনা কুমজা ২০১৩ দা নাট্যরত্ন এৱার্দ, কুমজা ২০১৩দা কলা ক্ষেত্র গুরু সন্মান, চহী অসিমক্তদা আই এন এফ এ (কাঠমন্ডু) না ইন্টারনেসনেল লাইফ টাইম এচিভমেন্ট এৱার্দ অমসুং ২০১৪ দা ইন্দো নেপ্রা ফ্রেন্দশিপ এসোসিয়েশন এৱার্দ, কুমজা ২০১৫ দা পুনেদা ইন্দিয়া এক্সিলেন্স ইন্টারনেসনেল এৱার্দ, কুমজা ২০১৫দা কলেম্বাদা ইন্দো-শ্রীলঙ্কা ফ্রেন্দশিপ এৱার্দ, কুমজা ২০১৫দা পান্থোইবী নাট্য মন্দিরনা মিংলেনখোম্বা এৱার্দ, চহী অসিমক্তদা রূপমহলনা নিলমনি নীংশিং মনা অমসুং লাংমৈদোং দ্রামাটিক য়ুনিয়ননা কুমজা ২০১৭ তা জি তোম্বী শর্ম্মা মেমোরিয়েল এৱার্দ লান্থোকখিবগা লোয়ননা খোরিফাবা আর্টিষ্ট এসোসিয়েসননা কুমজা ২০১৯ দা এল ধনঞ্জয় মেমোরিয়েল এৱার্দ অমসুং চহীসিমক্তদা জননেতা ইরাবত এৱার্দ ফংখি।
শুমাং লীলা ৬০গী মথক্তা দিরেক্সন পীরমখিবা মহাক কুমজা ২০০৯ দা মণিপুরগী মহারাজনা মহাক্কী প্লে ‘মাইবদো মাইবীদো মপুরোইবদো’ হায়বা লীলা অসিদা তামাপত্র এৱার্দ পীখি। শুমাং লীলা কাউন্সিলনস কুমজা ২০১৪ দা লাইফ টাইম এচিভমেন্ট এৱার্দ পীদুনা ইকায়খুম্নখি। মণিপুরগী শক্নাইরবা থিয়েটার থৱান্মীচাক অসি কুমজা ২০১৭ তা ইন্দিয়া লৈঙাক্না আর্ট এন্দ কালচারগী লমদা পদ্মশ্রী এৱার্দ পীদুনসু ইকায়খুম্নখ্রবনি। কুমজা ২০১৮ দনা নেসনেল ভাইওশ্রেষ্ঠ সম্মান পীখি।
মহাক্কী মচা (মচানুপা ৪গী মনুংদা ১ লৈখিদ্রগা ৩, মচানুপী ১) অমসুং মহাক্কী লোয়নবী লৈহৌরি। শক্নাইরবা মহাক্না লৈখিদবদা য়ুনাইটেদ কম্মিটি মণিপুর (য়ু সী এম), দেমোক্রেটিক ষ্টুদেন্টস এলাইন্স ওফ মণিপুর (দেসাম), কালচারেল ফোরাম, মণিপুর, উমংলাই কনবা অপূনবা লূপ (উকল), রাইটার্স ফোরাম, ইম্ফালগী মায়কৈদগী থম্মোয় শোক্না অৱাবা ফোঙদোরকপগা লোয়ননা মহাক্কী ইমুং মনুঙনা মায়োক্নহৌরিবা অৱাবদসু শরুক য়াবা ফোঙদোরক্লি।
মহাক্কী থৱায়না মপুগী মনাক্তা ঈংনা-চিক্না লৈরুনবসু থৌনিজখি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু