নুমিৎ মঙানি চুপ্না ডিসেম্বর ২০দগী ২৪ অভয়নগর পুথিবা লাই হরাওগদৌরি
আগরতলা, নভেম্বর ১৬ : চহী খুদিং তৌনা হন্দকসু উকল মণিপুরগী মতেং লৌরগা অভয়নগরগী পুথিবা লাই হরাওগনি হায়রে। ঙরাং নভেম্বর তাং ১৫, অভয়নগরগী পুথিবা শঙলেন মান্ডপতা অহল নহারোল য়াওনা খুঞ্জাশিংনা ফমখিবা মীফম অমদা চহী খুদিং তৌনা হন্দকসু লাই হরাওবা উৎসব পাঙথোকপা হায়না লেপ্নখ্রে। নুমিৎ মঙানি চুপ্না হন্দক চহী ডিসেম্বর তাং ২০ দগী ২৪ ফাওবা লাই হরাওবা উৎসব অসি পাঙথোক্কনি হায়রি।
খুন্নাইগী অহল এন নিরঞ্জন দত্তনা মীফম মপু ওইরগা পাঙথোকখিবা উৎসব অসিগী মতাংদা এস দীফপক কুমার সিংহ, এস. প্রসেনজিৎ, এম অভিরাম সিংহ, আকাশ সিংহ, সালাম নিলোজিৎ নচিংবা মীওইশিংনা নৈনবদা শরুক য়াদুনা ৱা ঙাংখি।
উৎসব অসি মতিক চানা পাঙথোকপা ঙম্ননবা মীফম অদুদা সালাম নিলোজিৎ সিংহবু প্রেসিডেন্ট হাপ্তুনা কমিটি অমসু শেমখ্রে। কমিটিদা ভাইস প্রেসিডেন্ট ওইনা এন রাজীব দত্ত, সেক্রেটারী ওইান সাপম প্রসেনজিৎ সিংহ, এসিঃ সেক্রেটারী অহুম সমীর দত্ত, সঞ্জয় সিংহ, বিধান সিংহ অদুগা ট্রেজারার ওইনা সুদীপ সিংহবু খনখ্রে হায়না চেরোল অমদা হায়রি।
চহী খুদিং পাঙথোকপা লাই হরাওবা থৌরম অসি হৌখিবা চহীগুম্না হন্দকসু পুথিবা লাই হরাওবা থৌরমদা মণিপুরদগী থাং-তা অমদি লাই হরাওবগা মরী লৈননা মখল মথেল কয়াগী থৌরমসু য়াওরি হায়রি।
সোর্স: মরূপ
0 কমেন্ট:
কমেন্ট তৌবিয়ু